ಶಿರಸಿ-ಹಾವೇರಿ ‘ನರಕ’ ಹೈವೇ: 177 ಕೋಟಿ ಯೋಜನೆಯೋ ಅಥವಾ ಸಾರ್ವಜನಿಕರ ಶವಪೆಟ್ಟಿಗೆಯೋ? 

ಆಪ್ತ ನ್ಯೂಸ್ ಶಿರಸಿ:

ಮನುಷ್ಯ ಸತ್ತ ಮೇಲೆ ನರಕಕ್ಕೆ ಹೋಗ್ತಾನೋ ಇಲ್ಲವೋ ಗೊತ್ತಿಲ್ಲ, ಆದರೆ ಬದುಕಿದ್ದಾಗಲೇ ನರಕ ದರ್ಶನ ಮಾಡಬೇಕೆಂದರೆ ನೀವು ಒಮ್ಮೆ 'ಶಿರಸಿ-ಹಾವೇರಿ' ರಾಷ್ಟ್ರೀಯ ಹೆದ್ದಾರಿಯಲ್ಲಿ ಸಂಚರಿಸಬೇಕು! ಇದು ಕೇವಲ ರಸ್ತೆಯಲ್ಲ, ಜನರ ತಾಳ್ಮೆಯ ಪರೀಕ್ಷೆ ನಡೆಸುತ್ತಿರುವ ಮೃತ್ಯುಕೂಪ.

ಕಳೆದ ಐದು ವರ್ಷಗಳಿಂದ ಆಮೆಗತಿಯಲ್ಲಿ ಸಾಗುತ್ತಿರುವ ಈ 38 ಕಿಲೋಮೀಟರ್ ಕಾಮಗಾರಿ ಈಗ ಜಾಗತಿಕ ಮಟ್ಟದ ಹಾಸ್ಯಪ್ರಸಂಗವಾಗಿ ಮಾರ್ಪಟ್ಟಿದೆ. ಎಷ್ಟರಮಟ್ಟಿಗೆ ಅಂದರೆ, "ನಮ್ಮ ಜನಪ್ರತಿನಿಧಿಗಳ ಕೈಯಲ್ಲಿ ಇದು ಸಾಧ್ಯವಿಲ್ಲ, ಅಮೆರಿಕಾದಿಂದ ಡೊನಾಲ್ಡ್ ಟ್ರಂಪ್ ಬಂದು ರಸ್ತೆ ಮಾಡಿಕೊಡಬೇಕು" ಎಂದು ಜನ ವ್ಯಂಗ್ಯವಾಡುತ್ತಿದ್ದಾರೆ!

🛑 177 ಕೋಟಿ ರೂಪಾಯಿ.. ಎಲ್ಲಿ ಹೋಯ್ತು ಜನರ ಬೆವರಿನ ಹಣ?

ಸಾಗರಮಾಲಾ ಯೋಜನೆಯಡಿ NH 766 E ಅಭಿವೃದ್ಧಿಗಾಗಿ ಬರೋಬ್ಬರಿ 177 ಕೋಟಿ ರೂಪಾಯಿ ಬಿಡುಗಡೆಯಾಗಿದೆ. ಬಳ್ಳಾರಿ ಮೂಲದ ‘ಅಮ್ಮಾಪುರಂ ಕನ್ಸ್ಟ್ರಕ್ಷನ್’ ಈ ಕಾಮಗಾರಿಯ ಗುತ್ತಿಗೆ ಪಡೆದಿದೆ. ಆದರೆ ವಿಪರ್ಯಾಸವೆಂದರೆ, ಬಳ್ಳಾರಿಯ ಗಣಿ ಧೂಳನ್ನೇ ಸೈಡಿಗೆ ಹೊಡೆಯುವಂತೆ ಇಲ್ಲಿ ಧೂಳು ಏಳುತ್ತಿದೆ. ಸ್ವತಃ ಗುತ್ತಿಗೆದಾರನೇ ಈ ಧೂಳಿಗೆ ಹೆದರಿ ಬೇರೆ ಕಂಪನಿಗೆ ಉಪಗುತ್ತಿಗೆ ನೀಡಿದ್ದಾನೆ ಎಂದರೆ ಪರಿಸ್ಥಿತಿ ಎಷ್ಟು ಭೀಕರವಾಗಿದೆ ಊಹಿಸಿ!

😷 ಧೂಳಿನ ಗೋಡೌನ್: ಆಸ್ಪತ್ರೆಗೆ ದಾರಿ ಮಾಡಿಕೊಟ್ಟ ಹೆದ್ದಾರಿ!

ಹಳೆಯ 6 ಮೀಟರ್ ರಸ್ತೆಯನ್ನು 10 ಮೀಟರ್‌ಗೆ ಅಗಲಿಸುವ ನೆಪದಲ್ಲಿ ಇಡೀ ರಸ್ತೆಯ ಡಾಂಬರನ್ನು ಕಿತ್ತು ಹಾಕಲಾಗಿದೆ. ಈಗ ಅಲ್ಲಿ ರಸ್ತೆಯೇ ಇಲ್ಲ, ಬದಲಿಗೆ ಕಲ್ಲು-ಮಣ್ಣಿನ ರಾಶಿ ಇದೆ.

• ಆರೋಗ್ಯದ ಮೇಲೆ ಹಲ್ಲೆ: ಚಿಪಗಿ, ಇಸಳೂರು, ಗೌಡಳ್ಳಿ, ಬಿಸಲಕೊಪ್ಪದ ಜನರಿಗೆ ಈಗ ಉಸಿರಾಟವೇ ಕಷ್ಟವಾಗಿದೆ. ಸಣ್ಣ ಮಕ್ಕಳು ಮತ್ತು ವೃದ್ಧರಲ್ಲಿ ಅಸ್ತಮಾ, ಕಣ್ಣಿನ ಉರಿ ಮತ್ತು ಕೆಮ್ಮು ಸರ್ವೇ ಸಾಮಾನ್ಯವಾಗಿದೆ.

• ದುರಂತದ ಸಂಗತಿ: ಈ ಭಾಗದಲ್ಲಿ ಒಂದೂ ಸುಸಜ್ಜಿತ ಮಲ್ಟಿ-ಸ್ಪೆಷಾಲಿಟಿ ಆಸ್ಪತ್ರೆ ಇಲ್ಲ. ರಸ್ತೆ ಹದಗೆಡಿಸಿ ಕಾಯಿಲೆ ಕೊಟ್ಟ ರಾಜಕಾರಣಿಗಳು, ಚಿಕಿತ್ಸೆ ಪಡೆಯಲು ಆಸ್ಪತ್ರೆಯನ್ನೂ ಜಿಲ್ಲೆಗೆ ತಂದಿಲ್ಲ!

⚡ ವಿಶ್ವದ 8ನೇ ಅದ್ಭುತ: ಸೋಶಿಯಲ್ ಮೀಡಿಯಾದಲ್ಲಿ ಫುಲ್ ಟ್ರೋಲ್!

ಶಿರಸಿಯ 'ಸಹಸ್ರಹೊಂಡ' ಗುಂಡಿಗಳ ನಂತರ ಈಗ ನೆಟ್ಟಿಗರ ಹಾಟ್ ಫೇವರಿಟ್ ಅಂದರೆ ಇದೇ ಹೈವೇ.

"ಇದು ಹೈವೇ ಅಲ್ಲ, ಚಂದಿರನ ಮೇಲ್ಮೈ!"

"ಈ ರಸ್ತೆಯಲ್ಲಿ ಗಾಡಿ ಓಡಿಸಿದರೆ ಬೆನ್ನುಮೂಳೆ ಮುರಿಯುವುದು ಗ್ಯಾರಂಟಿ, ಡಿಸ್ಕೌಂಟ್ ದರದಲ್ಲಿ ಚಿಕಿತ್ಸೆ ಸಿಗುತ್ತದೆಯೇ?"

ಹೀಗೆ ಸಾಲು ಸಾಲು ಟ್ರೋಲ್‌ಗಳು ಹರಿದಾಡುತ್ತಿವೆ. ಶಿರಸಿ ಜಾತ್ರೆಯ ಸಮಯದಲ್ಲಿ ಇಲ್ಲಿ ಬಿದ್ದ ಸಣ್ಣ ಮಳೆಗೆ ನೂರಾರು ಬೈಕ್ ಸವಾರರು ಜಾರಿ ಬಿದ್ದು ರಕ್ತ ಸಿಕ್ತರಾಗಿದ್ದರು. ಈಗಾಗಲೇ ಇಬ್ಬರ ಬಲಿ ಪಡೆದಿರುವ ಈ ರಸ್ತೆ ಇನ್ನೆಷ್ಟು ಜೀವಗಳನ್ನು ನುಂಗಲು ಹೊಂಚು ಹಾಕುತ್ತಿದೆ ಎಂಬುದು ಆತಂಕದ ವಿಷಯ.

🤡 ಎಸಿ ಕಾರಿನಲ್ಲಿ ನಾಯಕರು.. ಧೂಳಿನಲ್ಲಿ ಮತದಾರರು!

ಜನಪ್ರತಿನಿಧಿಗಳ ನಿರ್ಲಕ್ಷ್ಯ ಯಾವ ಮಟ್ಟಕ್ಕಿದೆ ಎಂದರೆ, ಪ್ರಧಾನಿ ಕಚೇರಿಯವರೆಗೂ ದೂರು ಹೋದರೂ ಇಲ್ಲಿನ ಶಾಸಕರು, ಸಂಸದರು ಮಾತ್ರ ಕುಂಭಕರ್ಣ ನಿದ್ದೆಯಲ್ಲಿದ್ದಾರೆ. ಸಾಮಾಜಿಕ ಹೋರಾಟಗಾರ ಡಾ. ರವಿಕಿರಣ ಪಟವರ್ಧನ್ ಅವರು ಪಿಎಂಒಗೆ ಪತ್ರ ಬರೆದು ಗಮನ ಸೆಳೆದಿದ್ದಾರೆ. ಆದರೆ ಸ್ಥಳೀಯ ನಾಯಕರು ಮಾತ್ರ ಎಸಿ ಕಾರಿನ ಗಾಜು ಏರಿಸಿಕೊಂಡು, ಜನ ಸಾಮಾನ್ಯರ ಕಷ್ಟ ಕಾಣದಂತೆ ಓಡಾಡುತ್ತಿದ್ದಾರೆ.

📢 ಸಾರ್ವಜನಿಕರ ಆಕ್ರೋಶದ ನುಡಿಗಳು:

ರಸ್ತೆಯಲ್ಲಿ ಸಂಚರಿಸುವ ಚಾಲಕರು ಮತ್ತು ಸಾರ್ವಜನಿಕರು ಆಡುತ್ತಿರುವ ಮಾತುಗಳು ಕೇಳಿಸಿಕೊಳ್ಳಲು ಅಸಾಧ್ಯವಾಗಿವೆ. "ಹೊಟ್ಟೆಗೆ ಅನ್ನ ತಿನ್ನುವವರು ಇಂತಹ ರಸ್ತೆ ಮಾಡುತ್ತಾರೆಯೇ?" ಎಂಬುದು ಅವರ ನೇರ ಪ್ರಶ್ನೆ. ಐದಾರು ವರ್ಷಗಳಿಂದ 38 ಕಿಮೀ ರಸ್ತೆ ಮಾಡಲಾಗದ ಇವರು ಯಾವ ಮುಖ ಇಟ್ಟುಕೊಂಡು ಮತ ಕೇಳಲು ಬರುತ್ತಾರೆ ಎಂದು ಜನ ಪ್ರಶ್ನಿಸುತ್ತಿದ್ದಾರೆ.

⚠️ ಎಚ್ಚರಿಕೆ: ಜನರ ಸಹನೆ ಪರೀಕ್ಷಿಸಬೇಡಿ!

ಒಂದು ವೇಳೆ ಮಳೆಗಾಲದ ಒಳಗೆ ಈ ರಸ್ತೆ ಕಾಮಗಾರಿ ಪೂರ್ಣಗೊಳ್ಳದಿದ್ದರೆ ಅಥವಾ ಕನಿಷ್ಠ ಓಡಾಡಲು ಯೋಗ್ಯವಾಗದಿದ್ದರೆ, ಜಿಲ್ಲೆಯ ಜನರು ಸುಮ್ಮನಿರುವುದಿಲ್ಲ.

"ಜನಪ್ರತಿನಿಧಿಗಳೇ ನೆನಪಿರಲಿ.. ನಿಮ್ಮನ್ನು ಅಧಿಕಾರಕ್ಕೆ ಏರಿಸಿದವರೂ ಇದೇ ಜನ, ನಿಮ್ಮನ್ನು ರಸ್ತೆಗೆ ಇಳಿಸುವವರೂ ಇದೇ ಜನ!"

ಇನ್ನಾದರೂ ಒಣ ಪ್ರತಿಷ್ಠೆ ಬಿಟ್ಟು, ಗುತ್ತಿಗೆದಾರನಿಗೆ ಚಾಟಿ ಬೀಸಿ ಕೆಲಸ ಮುಗಿಸುವ ಎದೆಗಾರಿಕೆ ತೋರಿಸುತ್ತಾರಾ ನಮ್ಮ 'ಗ್ರೇಟ್' ನಾಯಕರು? ಕಾದು ನೋಡಬೇಕಿದೆ.