ಇದು ಹಿಮಾಲಯ ಅಲ್ವೇ ಅಲ್ಲ! ನಮ್ಮ ಕಲಘಟಗಿ!! ಕ್ಷಣಾರ್ಧದಲ್ಲಿ ಹಿಮಾಲಯದಂತಾದ ಊರು! ವೀಡಿಯೋ ವೈರಲ್

ಆಪ್ತ ನ್ಯೂಸ್‌ ಕಲಘಟಗಿ:

ಧಾರವಾದ ಜಿಲ್ಲೆಯ ಕಲಘಟಗಿ ತಾಲೂಕಿನಾದ್ಯಂತ ಮಂಗಳವಾರ ಮಧ್ಯಾಹ್ನದ ನಂತರ ಸುರಿದ ಭೀಕರ ಆಲಿಕಲ್ಲು ಮಳೆಯು ಇಡೀ ಪ್ರದೇಶವನ್ನು 'ಹಿಮಲೋಕ'ವನ್ನಾಗಿ ಪರಿವರ್ತಿಸಿದೆ. ನೋಡನೋಡುತ್ತಿದ್ದಂತೆ ಸುರಿದ ಮಂಜಿನ ಮಳೆಯಿಂದಾಗಿ ಕಲಘಟಗಿ ಪಟ್ಟಣ ಮತ್ತು ಸುತ್ತಮುತ್ತಲಿನ ಗ್ರಾಮಗಳು ಕಾಶ್ಮೀರವನ್ನು ನೆನಪಿಸುವಂತೆ ಸಂಪೂರ್ಣ ಬಿಳಿ ಬಣ್ಣಕ್ಕೆ ತಿರುಗಿದ್ದವು.

ಘಟನೆಯ ವಿವರ:

ಮಂಗಳವಾರ ಮಧ್ಯಾಹ್ನ 3 ಗಂಟೆಯ ನಂತರ ಹಠಾತ್ ಹವಾಮಾನ ವೈಪರೀತ್ಯ ಉಂಟಾಯಿತು. ಕಲಘಟಗಿ ಪಟ್ಟಣ ಸೇರಿದಂತೆ ಬೆಲವಂತರ, ಮಾಚಾಪುರ, ಸೋಮನಕೊಪ್ಪ ಮೊದಲಾದ ಗ್ರಾಮಗಳಲ್ಲಿ ಆರಂಭದಲ್ಲಿ ಸಾಧಾರಣವಾಗಿ ಮಳೆ ಶುರುವಾಯಿತು. ಆದರೆ ಕೆಲವೇ ನಿಮಿಷಗಳಲ್ಲಿ ಅದು ಭೀಕರ ಆಲಿಕಲ್ಲು ಮಳೆಯ ರೂಪ ಪಡೆಯಿತು. ಸುಮಾರು ಒಂದು ಗಂಟೆಗೂ ಹೆಚ್ಚು ಕಾಲ ಸತತವಾಗಿ ಆಲಿಕಲ್ಲುಗಳು ಬಿದ್ದಿದ್ದರಿಂದ ರಸ್ತೆಗಳು, ಗಲ್ಲಿಗಳು ಹಾಗೂ ಖಾಲಿ ಮೈದಾನಗಳು ದಪ್ಪನೆಯ ಮಂಜುಗಡ್ಡೆಯ ಪದರದಿಂದ ಆವೃತವಾದವು.

ಜನಜೀವನ ಅಸ್ತವ್ಯಸ್ತ:

ಮಂಗಳವಾರ ಕಲಘಟಗಿಯಲ್ಲಿ ಸಂತೆಯ ದಿನವಾಗಿದ್ದರಿಂದ, ವ್ಯಾಪಾರಕ್ಕೆ ಬಂದಿದ್ದ ಸಾರ್ವಜನಿಕರು ಅನಿರೀಕ್ಷಿತ ಮಳೆಯಿಂದಾಗಿ ತೀವ್ರ ಸಂಕಷ್ಟಕ್ಕೆ ಒಳಗಾದರು. ರಸ್ತೆಗಳ ಮೇಲೆ ಭಾರಿ ಪ್ರಮಾಣದ ಮಂಜುಗಡ್ಡೆ ಶೇಖರಣೆಯಾದ ಕಾರಣ ವಾಹನ ಸಂಚಾರಕ್ಕೆ ಅಡ್ಡಿಯಾಯಿತು. ವಾಹನ ಸವಾರರು ದಾರಿ ಕಾಣದೆ ಪರದಾಡುವಂತಾಯಿತು.

ರೈತರ ಆತಂಕ:

ಈ ಅಕಾಲಿಕ ಆಲಿಕಲ್ಲು ಮಳೆಯು ನೋಡುಗರಿಗೆ ಕುತೂಹಲ ಮತ್ತು ಆನಂದ ನೀಡಿದೆಯಾದರೂ, ರೈತರಲ್ಲಿ ದಿಗಿಲು ಹುಟ್ಟಿಸಿದೆ. ಅಕಾಲಿಕವಾಗಿ ಸುರಿದ ಈ ಮಳೆಯಿಂದಾಗಿ ಕೈಗೆ ಬಂದ ಬೆಳೆಗಳು ನಾಶವಾಗುವ ಭೀತಿ ಎದುರಾಗಿದೆ. ತೋಟಗಾರಿಕಾ ಬೆಳೆಗಳಿಗೆ ಮತ್ತು ಕಟಾವಿಗೆ ಬಂದಿದ್ದ ಧಾನ್ಯಗಳಿಗೆ ಭಾರಿ ಹಾನಿಯಾಗುವ ಸಾಧ್ಯತೆಯಿದೆ ಎಂದು ರೈತರು ಆತಂಕ ವ್ಯಕ್ತಪಡಿಸಿದ್ದಾರೆ.

ಇತರೆಡೆಯೂ ಮಳೆ ವರದಿ:

ಧಾರವಾಡ ಜಿಲ್ಲೆಯ ಕುಂದಗೋಳ ತಾಲೂಕಿನ ಬೆಟದೂರು, ಅಣ್ಣಿಗೇರಿ ಭಾಗದಲ್ಲೂ ಆಲಿಕಲ್ಲು ಮಳೆಯಾಗಿದೆ. ಇದರ ಜೊತೆಗೆ ಉತ್ತರ ಕನ್ನಡ ಜಿಲ್ಲೆಯ ದಾಂಡೇಲಿ, ವಿಜಯಪುರ ಜಿಲ್ಲೆಯ ಮುದ್ದೇಬಿಹಾಳ, ಬಾಗಲಕೋಟೆ ಜಿಲ್ಲೆ ಹಾಗೂ ಗದಗ ಜಿಲ್ಲೆಯ ರೋಣ ತಾಲೂಕಿನಲ್ಲೂ ಮಳೆಯಾದ ವರದಿಯಾಗಿದೆ.

ಒಟ್ಟಾರೆಯಾಗಿ, ಉತ್ತರ ಕರ್ನಾಟಕದ ಹಲವು ಭಾಗಗಳಲ್ಲಿ ವರುಣನ ಅಬ್ಬರ ಜೋರಾಗಿದ್ದು, ಬೇಸಿಗೆಯ ಬಿಸಿಲಿನ ನಡುವೆ ತಂಪು ನೀಡಿದ್ದರೂ ಸಹ, ರೈತರಿಗೆ ಮಾತ್ರ ಈ ಆಲಿಕಲ್ಲು ಮಳೆ ನುಂಗಲಾರದ ತುತ್ತಾಗಿ ಪರಿಣಮಿಸಿದೆ.