ಶಿರಸಿ: ಶಾಲಾ ಮಕ್ಕಳ ಬಳಿ ಅಸಭ್ಯ ವರ್ತನೆ; ಕಪ್ಪು ಬಣ್ಣದ ಫಾರ್ಚುನರ್ ಕಾರಿನಲ್ಲಿದ್ದವರ ಪುಂಡಾಟಕ್ಕೆ ಬೆಚ್ಚಿಬಿದ್ದ ಗ್ರಾಮಸ್ಥರು

ಆಪ್ತ ನ್ಯೂಸ್ ಶಿರಸಿ:

ತಾಲ್ಲೂಕಿನ ಶಿರಸಿ-ಹೇರೂರು ಮಾರ್ಗದಲ್ಲಿ ಇಂದು ಬೆಳಿಗ್ಗೆ ಕಪ್ಪು ಬಣ್ಣದ ಟೊಯೋಟಾ ಫಾರ್ಚುನರ್ (ಕೆಎ ೦೧, ಎಂಎಂ ೫೪೫೨) (ಬೆಂಗಳೂರು ಪಾಸಿಂಗ್‌ ನಂಬರ್) ಕಾರಿನಲ್ಲಿ ಬಂದ ಮೂವರು ಆಗಂತುಕರು, ಶಾಲಾ ಬಸ್ಸಿಗೆ ಕಾಯುತ್ತಿದ್ದ ವಿದ್ಯಾರ್ಥಿನಿಯರ ಬಳಿ ಅಸಭ್ಯವಾಗಿ ವರ್ತಿಸಿದ ಘಟನೆ ನಡೆದಿದ್ದು, ಸಾರ್ವಜನಿಕ ವಲಯದಲ್ಲಿ ತೀವ್ರ ಆತಂಕ ಸೃಷ್ಟಿಸಿದೆ.

ಘಟನೆಯ ವಿವರ:

ಇಂದು ಬೆಳಿಗ್ಗೆ ಸುಮಾರು 8.30ರ ಸಮಯಕ್ಕೆ ಸರಿಯಾಗಿ, ಶಿರಸಿ-ಹೇರೂರು ರಸ್ತೆಯ 'ಗುಬ್ಬಿಮನೆ' ಹಾಗೂ 'ಹೆಬ್ಬಲಸು ಕತ್ರಿ' ಬಳಿ ಹೈಸ್ಕೂಲ್ ವಿದ್ಯಾರ್ಥಿಗಳು ಶಾಲೆಗೆ ಹೋಗಲು ಬಸ್ಸಿಗೆ ಕಾಯುತ್ತಿದ್ದರು. ಈ ವೇಳೆ ಕಪ್ಪು ಬಣ್ಣದ ಟೊಯೋಟಾ ಫಾರ್ಚುನರ್ ಕಾರಿನಲ್ಲಿ ಬಂದ ಮೂವರು ಗಂಡಸರು, ಮಕ್ಕಳ ಬಳಿ ಕಾರು ನಿಲ್ಲಿಸಿ ಅನುಮಾನಾಸ್ಪದವಾಗಿ ವರ್ತಿಸಿದ್ದಾರೆ ಎಂದು ಪ್ರತ್ಯಕ್ಷದರ್ಶಿಗಳು ತಿಳಿಸಿದ್ದಾರೆ.

ಧೈರ್ಯ ತೋರಿದ ಮಹಿಳೆ:

ಅದೇ ಸಮಯದಲ್ಲಿ ಬಸ್ಸಿನಲ್ಲಿ ಪ್ರಯಾಣಿಸುತ್ತಿದ್ದ ಮಹಿಳೆಯೊಬ್ಬರು ಈ ದೃಶ್ಯವನ್ನು ಗಮನಿಸಿದ್ದಾರೆ. ಕೂಡಲೇ ಬಸ್ಸಿಳಿದು ಬಂದ ಅವರು, ಕಾರನ್ನು ತಡೆದು ನಿಲ್ಲಿಸಿ ಫೋಟೋ ತೆಗೆದಿದ್ದಾರೆ. "ಯಾಕೆ ಮಕ್ಕಳ ಬಳಿ ಕಾರು ನಿಲ್ಲಿಸಿದ್ದೀರಿ?" ಎಂದು ಪ್ರಶ್ನಿಸಿದಾಗ, ಕಾರಿನಲ್ಲಿದ್ದವರು ತಡಬಡಾಯಿಸುತ್ತಾ ಸಮರ್ಪಕ ಉತ್ತರ ನೀಡದೆ ನುಣುಚಿಕೊಳ್ಳಲು ಪ್ರಯತ್ನಿಸಿದ್ದಾರೆ.

ಮದ್ಯಪಾನ ಮತ್ತು ಅಸಭ್ಯ ವರ್ತನೆಯ ಆರೋಪ:

ಸ್ಥಳೀಯರು ಮತ್ತು ಘಟನೆಯನ್ನು ಹತ್ತಿರದಿಂದ ಕಂಡವರು ನೀಡಿದ ಮಾಹಿತಿಯ ಪ್ರಕಾರ, ಕಾರಿನಲ್ಲಿದ್ದವರು ಮದ್ಯಪಾನ ಮಾಡಿದ್ದರು ಎನ್ನಲಾಗಿದೆ. ಅಷ್ಟೇ ಅಲ್ಲದೆ, ಬಸ್ಸಿಗೆ ಕಾಯುತ್ತಿದ್ದ ಹೈಸ್ಕೂಲ್ ವಿದ್ಯಾರ್ಥಿನಿಯರನ್ನು ನೋಡಿ ಅಸಭ್ಯ ಸನ್ನೆಗಳನ್ನು ಮಾಡುತ್ತಿದ್ದರು ಎಂಬ ಗಂಭೀರ ಆರೋಪವೂ ಕೇಳಿಬಂದಿದೆ.

ಪೋಷಕರಲ್ಲಿ ಆವರಿಸಿದ ಆತಂಕ:

ಈ ಘಟನೆಯಿಂದಾಗಿ ಗ್ರಾಮೀಣ ಭಾಗದ ಪೋಷಕರು ಮತ್ತು ವಿದ್ಯಾರ್ಥಿಗಳು ಭಯಭೀತರಾಗಿದ್ದಾರೆ.

• ಈ ಆಗಂತುಕರು ಯಾರು? ಪರ ಊರಿನವರೇ ಅಥವಾ ಸ್ಥಳೀಯರೇ?

• ಶಾಲಾ ಸಮಯದಲ್ಲೇ ಮಕ್ಕಳನ್ನು ಗುರಿಯಾಗಿಸಿಕೊಂಡು ಬರಲು ಕಾರಣವೇನು?

• ವಿದ್ಯಾರ್ಥಿನಿಯರಿಗೆ ತೊಂದರೆ ಕೊಡುವ ಅಥವಾ ಅಪಹರಣದಂತಹ ದುಷ್ಕೃತ್ಯ ಎಸಗುವ ಉದ್ದೇಶವಿತ್ತೇ?

  ಎಂಬಿತ್ಯಾದಿ ಪ್ರಶ್ನೆಗಳು ಸಾರ್ವಜನಿಕರನ್ನು ಕಾಡುತ್ತಿವೆ.

ಪೊಲೀಸರ ಕ್ರಮಕ್ಕೆ ಆಗ್ರಹ:

ಮಕ್ಕಳ ಸುರಕ್ಷತೆಯ ದೃಷ್ಟಿಯಿಂದ ಈ ಪ್ರಕರಣವನ್ನು ಹಗುರವಾಗಿ ಪರಿಗಣಿಸಬಾರದು. ಪೊಲೀಸರು ಕೂಡಲೇ ಕಾರಿನ ನಂಬರ್ ಆಧರಿಸಿ ಆಗಂತುಕರನ್ನು ಪತ್ತೆ ಹಚ್ಚಬೇಕು. ಅವರು ಯಾವ ಉದ್ದೇಶದಿಂದ ಈ ಮಾರ್ಗದಲ್ಲಿ ಸಂಚರಿಸುತ್ತಿದ್ದರು ಮತ್ತು ಮಕ್ಕಳ ಬಳಿ ಏಕೆ ಅಸಭ್ಯವಾಗಿ ವರ್ತಿಸಿದರು ಎಂಬುದರ ಕುರಿತು ನಿಷ್ಪಕ್ಷಪಾತ ತನಿಖೆ ನಡೆಸಬೇಕು. ತಪ್ಪಿತಸ್ಥರ ವಿರುದ್ಧ ಕಠಿಣ ಕಾನೂನು ಕ್ರಮ ಜರುಗಿಸಬೇಕು ಎಂದು ಗ್ರಾಮಸ್ಥರು ಮತ್ತು ಪೋಷಕರು ಒತ್ತಾಯಿಸಿದ್ದಾರೆ.