ಉತ್ತರ ಕನ್ನಡದ ರೈತರ 'ಬೆಟ್ಟ ಭೂಮಿ' ಹಕ್ಕುಗಳ ರಕ್ಷಣೆಗೆ ಆಗ್ರಹ: ಅರಣ್ಯ ಇಲಾಖೆಯ ಧೋರಣೆ ಹಾಗೂ ಒತ್ತುವರಿ ವಿರುದ್ಧ ಸಿಡಿದೆದ್ದ ಬೆಟ್ಟ ಬಳಕೆದಾರರು

ಆಪ್ತ ನ್ಯೂಸ್‌ ಶಿರಸಿ:

ಜಿಲ್ಲೆಯ ರೈತರ ಜೀವನಾಡಿಯಾಗಿರುವ, ಶತಮಾನಗಳಿಂದ ಅನುಭವಿಸಿಕೊಂಡು ಬರುತ್ತಿರುವ 'ಅಸ್ಸೆಸ್ಸಡ್ ಮತ್ತು ಅಸೈನಡ್' (Assessed and Assigned) ಬೆಟ್ಟ ಭೂಮಿಯ ಮೇಲೆ ಅರಣ್ಯ ಇಲಾಖೆ ಅನಗತ್ಯ ಹಸ್ತಕ್ಷೇಪ ನಡೆಸುತ್ತಿದ್ದು, ಕೂಡಲೇ ಒತ್ತುವರಿ ತೆರವುಗೊಳಿಸಿ ಮೂಲ ಹಕ್ಕುಗಳನ್ನು ಉಳಿಸಿಕೊಡಬೇಕೆಂದು ಬೆಟ್ಟ ಬಳಕೆದಾರರಾದ ಮಹೇಶ್ವರ ಹೆಗಡೆ ಬಲವಳ್ಳಿ ಅವರು ಒತ್ತಾಯಿಸಿದ್ದಾರೆ.

ಈ ಕುರಿತು ಪತ್ರಿಕಾ ಹೇಳಿಕೆ ನೀಡಿರುವ ಅವರು, ಉತ್ತರ ಕನ್ನಡದ ಬೆಟ್ಟ ಭೂಮಿಗಳ ಸ್ವರೂಪ, ಕಾನೂನಾತ್ಮಕ ಹಕ್ಕುಗಳು ಮತ್ತು ಪ್ರಸ್ತುತ ಎದುರಾಗುತ್ತಿರುವ ಸಮಸ್ಯೆಗಳ ಬಗ್ಗೆ ಸವಿಸ್ತಾರವಾಗಿ ವಿವರಿಸಿದ್ದಾರೆ.

ಉತ್ತರ ಕನ್ನಡದ ಬೆಟ್ಟ ಭೂಮಿಗಳೇ ವಿಶಿಷ್ಟ:

ರಾಜ್ಯದ ದಕ್ಷಿಣ ಕನ್ನಡದ ಕುಮ್ಕಿ, ಮೈಸೂರಿನ ಕಾನು ಅಥವಾ ಸೊಪ್ಪಿನ ಬೆಟ್ಟ, ಕೊಡಗಿನ ಜಮ್ಮಾ ಬಾಣೆ ಹಾಗೂ ಹೈದರಾಬಾದ್ ಕರ್ನಾಟಕದ ಮೋಟಸ್ಥಳ ಭೂಮಿಗಳಿಗಿಂತ ಉತ್ತರ ಕನ್ನಡದ ಬೆಟ್ಟ ಭೂಮಿಗಳು ಸಂಪೂರ್ಣ ಭಿನ್ನ ಮತ್ತು ವಿಶಿಷ್ಟ ಸ್ವರೂಪದ್ದಾಗಿವೆ. ಇಲ್ಲಿನ ರೈತರು ತಮ್ಮ ತೋಟಗಳ (ಲಾಗೂ ಭಾಗಾಯತ) ಜೊತೆಗೆ ಈ ಬೆಟ್ಟ ಭೂಮಿಗೂ ಸರ್ಕಾರಕ್ಕೆ ಕಂದಾಯ (ತೀರ್ವೆ) ಪಾವತಿಸುತ್ತಿದ್ದಾರೆ. ಕಂದಾಯ ಪಾವತಿಸುವ ಕಾರಣಕ್ಕಾಗಿಯೇ ಇವುಗಳನ್ನು 'ಅಸ್ಸೆಸ್ಸಡ್ ಬೆಟ್ಟ' ಎಂದು ಕರೆಯಲಾಗುತ್ತದೆ. ಹೀಗಾಗಿ ಇವು ಕಂದಾಯ ಇಲಾಖೆಯ ಸುಪರ್ದಿಗೆ ಒಳಪಟ್ಟ ಭೂಮಿಗಳಾಗಿವೆ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.

ಕಾನೂನು ಏನು ಹೇಳುತ್ತದೆ?

ಬ್ರಿಟಿಷರ ಆಳ್ವಿಕೆಯ ಬಾಂಬೆ ಪ್ರೆಸಿಡೆನ್ಸಿ ಕಾಲದಿಂದಲೂ ಈ ಭೂಮಿಯ ಮೇಲೆ ರೈತರಿಗೆ ವಿಶೇಷ ಹಕ್ಕುಗಳನ್ನು ನೀಡಲಾಗಿದೆ. ಪ್ರಸ್ತುತ ಕರ್ನಾಟಕ ಭೂಕಂದಾಯ ಅಧಿನಿಯಮ ೧೯೬೪ರ ಕಲಂ ೭೯/೨ರ ಉಪ ಪ್ರಕರಣ (೧)ರ ಅಡಿಯಲ್ಲಿ ಈ ವಿಶೇಷ ಹಕ್ಕುಗಳು ಮುಂದುವರಿಯತಕ್ಕದ್ದು ಎಂದು ಸ್ಪಷ್ಟವಾಗಿ ಉಲ್ಲೇಖಿಸಲಾಗಿದೆ. ಹಾಗೆಯೇ ಕರ್ನಾಟಕ ಅರಣ್ಯ ಕೈಪಿಡಿ ೧೩೧ಎಫ್ (131F) ನಲ್ಲಿಯೂ ರೈತರ ಹಕ್ಕುಬಾಧ್ಯತೆಗಳನ್ನು ವಿವರಿಸಲಾಗಿದೆ. ಬ್ರಿಟಿಷ್ ಕಾಲದ ಆದೇಶ ಪ್ರತಿಗಳು ಇಂದಿಗೂ ಈ ಹಕ್ಕುಗಳಿಗೆ ಸಾಕ್ಷಿಯಾಗಿವೆ ಎಂದು ಮಹೇಶ್ವರ ಹೆಗಡೆ ತಿಳಿಸಿದ್ದಾರೆ.

ಅರಣ್ಯ ಇಲಾಖೆಯ ಅಡ್ಡಿ ಮತ್ತು ಒತ್ತುವರಿ ಹಾವಳಿ:

ಸ್ಪಷ್ಟವಾದ ಕಾನೂನು ಮತ್ತು ದಾಖಲೆಗಳಿದ್ದರೂ, ಅರಣ್ಯ ಇಲಾಖೆಯ ಅಧಿಕಾರಿಗಳು ಬೆಟ್ಟ ಭೂಮಿಯ ಬಳಕೆಯ ಹಕ್ಕಿಗೆ ಅಡ್ಡಿಪಡಿಸುತ್ತಿದ್ದಾರೆ. ರೈತರು ತಮ್ಮ ಕೆಲಸ ಕಾರ್ಯಗಳನ್ನು ನಡೆಸಲು ಹೋದರೆ ತೊಂದರೆ ನೀಡುತ್ತಿದ್ದು, ಪ್ರಶ್ನಿಸಿದರೆ ಅಸಮರ್ಪಕ ಉತ್ತರ ನೀಡುತ್ತಿದ್ದಾರೆ. ಇನ್ನೊಂದೆಡೆ, ಈ ಬೆಟ್ಟ ಭೂಮಿಗಳಲ್ಲಿ ಅನಧಿಕೃತ ಒತ್ತುವರಿದಾರರ ಹಾವಳಿ ಹೆಚ್ಚಾಗಿದ್ದು, ಅಧಿಕಾರಿಗಳು ಸೂಕ್ತ ಕಾನೂನು ಕ್ರಮ ಕೈಗೊಳ್ಳದ ಕಾರಣ ಭೂಗಳ್ಳರಿಗೆ ಕುಮ್ಮಕ್ಕು ನೀಡಿದಂತಾಗಿದೆ ಎಂದು ಅವರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಪ್ರಮುಖ ಬೇಡಿಕೆಗಳು:

ಈ ಹಿನ್ನೆಲೆಯಲ್ಲಿ ಬೆಟ್ಟ ಬಳಕೆದಾರರ ಪರವಾಗಿ ಮಹೇಶ್ವರ ಹೆಗಡೆ ಅವರು ಸರ್ಕಾರದ ಮುಂದೆ ಎರಡು ಪ್ರಮುಖ ಬೇಡಿಕೆಗಳನ್ನು ಇಟ್ಟಿದ್ದಾರೆ:

೧. ಪಹಣಿ ತಿದ್ದುಪಡಿ: ಉತ್ತರ ಕನ್ನಡದ ಬೆಟ್ಟಗಳು ತೀರ್ವೆ ಪಾವತಿಸುವ ಭೂಮಿಯಾಗಿರುವುದರಿಂದ, ಆಕಾರಬಂದ್‌ನ ೫ಬಿ ಕಾಲಂನಲ್ಲಿ ತಪ್ಪಾಗಿ ನಮೂದಾದ ಕ್ಷೇತ್ರವನ್ನು ೨೮ನೇ ಕಾಲಂನಲ್ಲಿ ಗುರುತಿಸಬೇಕು. ಪಹಣಿಯ ೩ನೇ ಕಾಲಂನಲ್ಲಿ 'ಖರಾಬು' ಎಂದು ತೋರಿಸದೇ, ಸಂಪೂರ್ಣ ಕ್ಷೇತ್ರವನ್ನು ೯ನೇ ಕಾಲಂನಲ್ಲಿ ದಾಖಲಿಸಿ ರೈತರಿಗೆ ನ್ಯಾಯ ಒದಗಿಸಬೇಕು.

೨. ಒತ್ತುವರಿ ತೆರವು: ತೀರ್ವೆ ತುಂಬುವ ಅಸ್ಸೆಸ್ಸಡ್ ಮತ್ತು ಅಸೈನಡ್ ಬೆಟ್ಟಗಳಲ್ಲಿ ಆಗಿರುವ ಅನಧಿಕೃತ ಅತಿಕ್ರಮಣವನ್ನು ಶೀಘ್ರವಾಗಿ ತೆರವುಗೊಳಿಸಬೇಕು. ಮೂಲ ಬಳಕೆದಾರರಿಗೆ ಯಾವುದೇ ಅಡೆತಡೆಯಿಲ್ಲದೆ ಬೆಟ್ಟವನ್ನು ಉಪಯೋಗಿಸಲು ಅನುವು ಮಾಡಿಕೊಡಬೇಕು.

ಕಂದಾಯ ಇಲಾಖೆ, ಅರಣ್ಯ ಇಲಾಖೆ ಹಾಗೂ ಸಕ್ಷಮ ಪ್ರಾಧಿಕಾರಗಳು ಈ ಕೂಡಲೇ ಎಚ್ಚೆತ್ತುಕೊಂಡು, ಕಾನೂನು ಹೋರಾಟಕ್ಕೆ ಅವಕಾಶ ನೀಡದೇ ರೈತರ ಸಮಸ್ಯೆ ಬಗೆಹರಿಸಬೇಕೆಂದು ಅವರು ಆಗ್ರಹಿಸಿದ್ದಾರೆ.