ಬೇಡ್ತಿ–ಅಘನಾಶಿನಿ ಯೋಜನೆ ಕೈಬಿಡಲು ಬೆಂಗಳೂರಿನಲ್ಲಿ ಜನಾಕ್ರೋಶದ ಮಹಾಪ್ರತಿಭಟನೆ

ಆಪ್ತ ನ್ಯೂಸ್ ಬೆಂಗಳೂರು:

ಉತ್ತರ ಕನ್ನಡ ಜಿಲ್ಲೆಯ ಜೀವನಾಡಿಗಳಾದ ಬೇಡ್ತಿ–ಅಘನಾಶಿನಿ ನದಿಗಳ ಉಳಿವಿಗಾಗಿ ರಾಜಧಾನಿ ಬೆಂಗಳೂರಿನ ಫ್ರೀಡಂ ಪಾರ್ಕ್‌ನಲ್ಲಿ ಶನಿವಾರ ನಡೆದ ಬೃಹತ್‌ ಪ್ರತಿಭಟನಾ ಸಭೆ ರಾಜ್ಯದ ಗಮನ ಸೆಳೆಯಿತು. ಸಾವಿರಾರು ಸಂಖ್ಯೆಯಲ್ಲಿ ಒಂದೆಡೆ ಸೇರಿದ್ದ ಉತ್ತರ ಕನ್ನಡದ ಜನರು, ಪರಿಸರ ಹೋರಾಟಗಾರರು, ವಿಜ್ಞಾನಿಗಳು, ಸಾಹಿತಿಗಳು, ಧಾರ್ಮಿಕ ಮುಖಂಡರು ಹಾಗೂ ಜನಪ್ರತಿನಿಧಿಗಳು ನದಿ ತಿರುವು ಯೋಜನೆಗಳ ವಿರುದ್ಧ ಒಕ್ಕೊರಲಿನ ಧ್ವನಿ ಎತ್ತಿದರು. ಬೇಡ್ತಿ–ವರದಾ ಹಾಗೂ ಅಘನಾಶಿನಿ–ವೇದಾವತಿ ನದಿ ಜೋಡಣೆ ಯೋಜನೆಗಳನ್ನು ಕೈಬಿಡಬೇಕು, ಬೇಡ್ತಿ–ವರದಾ ಯೋಜನೆಯ ವಿವರವಾದ ಯೋಜನಾ ವರದಿ (ಡಿಪಿಆರ್‌) ಸಿದ್ಧಪಡಿಸುವ ಪ್ರಕ್ರಿಯೆಯನ್ನು ಸ್ಥಗಿತಗೊಳಿಸಬೇಕು ಮತ್ತು ಪಶ್ಚಿಮ ಘಟ್ಟದ ಪರಿಸರ ಸಂರಕ್ಷಣೆಗೆ ಆದ್ಯತೆ ನೀಡಬೇಕು ಎಂಬುದು ಸಭೆಯ ಪ್ರಮುಖ ಆಗ್ರಹವಾಗಿತ್ತು.

ಬೇಡ್ತಿ–ಅಘನಾಶಿನಿ ಕೊಳ್ಳ ಸಂರಕ್ಷಣಾ ಸಮಿತಿಯ ನೇತೃತ್ವದಲ್ಲಿ ನಡೆದ ಈ ಜನಾಕ್ರೋಶದ ಸಭೆಯಲ್ಲಿ ಒಟ್ಟು 11 ಪ್ರಮುಖ ನಿರ್ಣಯಗಳನ್ನು ಅಂಗೀಕರಿಸಲಾಯಿತು. ಉತ್ತರ ಕನ್ನಡದ ಅರಣ್ಯ, ನದಿ, ಕೃಷಿ, ಮೀನುಗಾರಿಕೆ, ಜೀವವೈವಿಧ್ಯ ಹಾಗೂ ಜನಜೀವನದ ಮೇಲೆ ನದಿ ತಿರುವು ಯೋಜನೆಗಳಿಂದ ಉಂಟಾಗಬಹುದಾದ ಪರಿಣಾಮಗಳ ಕುರಿತು ಸಭೆಯಲ್ಲಿ ಗಂಭೀರ ಚರ್ಚೆ ನಡೆಯಿತು. ಅಭಿವೃದ್ಧಿಯ ಹೆಸರಿನಲ್ಲಿ ಪರಿಸರ ಸೂಕ್ಷ್ಮ ಪ್ರದೇಶಗಳ ಮೇಲೆ ಮತ್ತಷ್ಟು ಒತ್ತಡ ಹೇರುವ ಬದಲು, ಸ್ಥಳೀಯ ಅಗತ್ಯಗಳು ಮತ್ತು ವೈಜ್ಞಾನಿಕ ಅಧ್ಯಯನಗಳಿಗೆ ಆದ್ಯತೆ ನೀಡಬೇಕು ಎಂಬ ಸಂದೇಶವನ್ನು ಪ್ರತಿಭಟನಾಕಾರರು ಸರ್ಕಾರಕ್ಕೆ ರವಾನಿಸಿದರು.

ಜಿಲ್ಲೆಯ ಅಸ್ತಿತ್ವದ ಪ್ರಶ್ನೆ; ಪಕ್ಷಾತೀತವಾಗಿ ಒಂದಾಗಲು ಕರೆ

ಉತ್ತರ ಕನ್ನಡ ಜಿಲ್ಲೆ ಈಗಾಗಲೇ ಹಲವು ಬೃಹತ್‌ ಯೋಜನೆಗಳ ಪರಿಣಾಮಗಳನ್ನು ಎದುರಿಸುತ್ತಿದೆ. ಇಂತಹ ಸಂದರ್ಭದಲ್ಲಿ ಮತ್ತೊಂದು ನದಿ ತಿರುವು ಯೋಜನೆಯನ್ನು ಮುಂದುವರಿಸುವ ಪ್ರಯತ್ನ ಜಿಲ್ಲೆಯ ಭವಿಷ್ಯದ ಮೇಲೆ ಗಂಭೀರ ಪರಿಣಾಮ ಬೀರಬಹುದು ಎಂಬ ಆತಂಕ ಪ್ರತಿಭಟನೆಯಲ್ಲಿ ವ್ಯಕ್ತವಾಯಿತು.

ಮಲೆನಾಡಿನ ರೈತರು, ಕರಾವಳಿಯ ಮೀನುಗಾರರು, ಅರಣ್ಯವಾಸಿಗಳು ಹಾಗೂ ಪಶ್ಚಿಮ ಘಟ್ಟವನ್ನು ಅವಲಂಬಿಸಿರುವ ಅನೇಕ ಸಮುದಾಯಗಳ ಬದುಕು ನದಿಗಳ ನೈಸರ್ಗಿಕ ಹರಿವಿನೊಂದಿಗೆ ಬೆಸೆದುಕೊಂಡಿದೆ. ನದಿಗಳ ಹರಿವಿನಲ್ಲಿ ಬದಲಾವಣೆ ಉಂಟಾದರೆ ಅದು ಕೇವಲ ನೀರಿನ ಲಭ್ಯತೆಗೆ ಸೀಮಿತವಾಗದೆ, ಕೃಷಿ, ಅಂತರ್ಜಲ, ಮೀನುಗಾರಿಕೆ, ಅರಣ್ಯ ಮತ್ತು ಸ್ಥಳೀಯ ಹವಾಮಾನದ ಮೇಲೂ ಪರಿಣಾಮ ಬೀರಬಹುದು ಎಂದು ಹೋರಾಟಗಾರರು ಆತಂಕ ವ್ಯಕ್ತಪಡಿಸಿದರು.

ಪ್ರತಿಭಟನಾ ಸಭೆಯ ಆಯೋಜಕರಾದ ಅನಂತ್‌ ಹೆಗಡೆ ಅಶೀಸರ ಮಾತನಾಡಿ, ಬೇಡ್ತಿ–ಅಘನಾಶಿನಿ ನದಿಗಳ ಉಳಿವು ಉತ್ತರ ಕನ್ನಡ ಜಿಲ್ಲೆಯ ಅಸ್ತಿತ್ವದ ಪ್ರಶ್ನೆಯಾಗಿದೆ. ಈ ಹೋರಾಟವನ್ನು ಯಾವುದೇ ಒಂದು ಸಂಘಟನೆ ಅಥವಾ ಪರಿಸರ ಹೋರಾಟಗಾರರ ಹೋರಾಟವೆಂದು ಸೀಮಿತಗೊಳಿಸಬಾರದು. ಜಿಲ್ಲೆಯ ಎಲ್ಲ ಜನಪ್ರತಿನಿಧಿಗಳು ಪಕ್ಷಭೇದ ಮರೆತು ಒಂದಾಗಬೇಕು. ರಾಜಕೀಯ ಲೆಕ್ಕಾಚಾರಗಳನ್ನು ಬದಿಗಿಟ್ಟು ಜನರ ಬದುಕು ಮತ್ತು ಪ್ರಕೃತಿಯ ಉಳಿವಿಗಾಗಿ ಒಗ್ಗಟ್ಟಿನಿಂದ ನಿಲ್ಲಬೇಕು ಎಂದು ಮನವಿ ಮಾಡಿದರು.

ಉತ್ತರ ಕನ್ನಡದ ಅರ್ಧಕ್ಕೂ ಹೆಚ್ಚು ತಾಲೂಕುಗಳು ನದಿ ತಿರುವು ಯೋಜನೆಗಳಿಂದ ಸಂಕಷ್ಟಕ್ಕೆ ಸಿಲುಕುವ ಆತಂಕವಿದೆ. ಪರಿಸರಕ್ಕೆ ಹಾನಿಯಾಗುವ ಸಾಧ್ಯತೆ ಇರುವ ಇಂತಹ ಯೋಜನೆಗಳನ್ನು ಕೈಬಿಟ್ಟು, ಜಿಲ್ಲೆಯ ರೈತರು ಮತ್ತು ಜನಸಾಮಾನ್ಯರ ಅಗತ್ಯಗಳಿಗೆ ಪೂರಕವಾದ ಸುಸ್ಥಿರ ಪರಿಹಾರಗಳನ್ನು ರೂಪಿಸಬೇಕು ಎಂದು ಅವರು ಆಗ್ರಹಿಸಿದರು.

ನ್ಯಾ. ಸಂತೋಷ್‌ ಹೆಗ್ಡೆ: “ಸ್ಥಳೀಯರ ನೀರಿನ ಅಗತ್ಯ ತಿಳಿಯದೆ ಯೋಜನೆ ರೂಪಿಸುವುದು ಅನ್ಯಾಯ”

ಪ್ರತಿಭಟನಾ ಸಭೆಯಲ್ಲಿ ಮಾತನಾಡಿದ ನಿವೃತ್ತ ನ್ಯಾಯಮೂರ್ತಿ ಸಂತೋಷ್‌ ಹೆಗ್ಡೆ, ಬೇಡ್ತಿ–ಅಘನಾಶಿನಿ ನದಿ ಕಣಿವೆಗಳಲ್ಲಿ ವಾಸಿಸುವ ಜನರಿಗೆ ಭವಿಷ್ಯದಲ್ಲಿ ಎಷ್ಟು ನೀರು ಅಗತ್ಯವಿದೆ ಎಂಬುದರ ಕುರಿತು ಮೊದಲು ಸಮಗ್ರ ಅಧ್ಯಯನ ನಡೆಸಬೇಕು ಎಂದು ಒತ್ತಾಯಿಸಿದರು.

ಸ್ಥಳೀಯ ಜನರ ನೀರಿನ ಅಗತ್ಯ, ನದಿಗಳ ನೈಸರ್ಗಿಕ ಹರಿವು ಮತ್ತು ಪರಿಸರದ ಮೇಲಿನ ಪರಿಣಾಮಗಳನ್ನು ವೈಜ್ಞಾನಿಕವಾಗಿ ಪರಿಶೀಲಿಸದೆ ಯೋಜನೆ ರೂಪಿಸುವುದು ದೊಡ್ಡ ಅನ್ಯಾಯವಾಗುತ್ತದೆ. ಪ್ರಭಾವಶಾಲಿಗಳ ಒತ್ತಡಕ್ಕೆ ಮಣಿದು ಸರ್ಕಾರ ನಿರ್ಧಾರ ಕೈಗೊಳ್ಳುವುದು ಕೇವಲ ಕಾನೂನಿನ ಆಶಯಕ್ಕೆ ವಿರುದ್ಧವಾದ ಕ್ರಮವಲ್ಲ; ಅದು ಮಾನವೀಯತೆಯ ದೃಷ್ಟಿಯಿಂದಲೂ ಸರಿಯಲ್ಲ ಎಂದು ಅಭಿಪ್ರಾಯಪಟ್ಟರು.

ನೈಸರ್ಗಿಕ ಸಂಪತ್ತಿನ ರಕ್ಷಣೆ ಒಂದು ಜಿಲ್ಲೆಯ ಜನರ ಹೊಣೆಗಾರಿಕೆ ಮಾತ್ರವಲ್ಲ. ಪಶ್ಚಿಮ ಘಟ್ಟ ಮತ್ತು ಅಲ್ಲಿನ ನದಿಗಳನ್ನು ಉಳಿಸುವುದು ಇಡೀ ರಾಜ್ಯ ಹಾಗೂ ದೇಶದ ನಾಗರಿಕರ ಕರ್ತವ್ಯವಾಗಿದೆ. ಎಲ್ಲರ ಹಿತವನ್ನು ಪರಿಗಣಿಸಿ, ಸ್ಥಳೀಯರ ಧ್ವನಿಗೆ ಮನ್ನಣೆ ನೀಡುವ ರೀತಿಯಲ್ಲಿ ಸರ್ಕಾರ ಕಾರ್ಯನಿರ್ವಹಿಸಬೇಕು ಎಂದು ಹೇಳಿದರು.

ಬೇಡ್ತಿ–ಅಘನಾಶಿನಿ ನದಿಗಳ ಉಳಿವಿಗಾಗಿ ನಡೆಯುತ್ತಿರುವ ಹೋರಾಟದಲ್ಲಿ ತಾವು ಸದಾ ಜಿಲ್ಲೆಯ ಜನರೊಂದಿಗೆ ಇರುವುದಾಗಿ ಘೋಷಿಸಿದ ಅವರು, ಪರಿಸರ ಸಂರಕ್ಷಣೆಯ ವಿಚಾರದಲ್ಲಿ ನ್ಯಾಯಯುತ ನಿರ್ಧಾರ ಕೈಗೊಳ್ಳಬೇಕೆಂದು ಸರ್ಕಾರಕ್ಕೆ ಮನವಿ ಮಾಡಿದರು.

ತೇಜಸ್ವಿನಿ ಅನಂತ್‌ಕುಮಾರ್‌: “ಸಮುದ್ರ ಸೇರುವ ನೀರು ವ್ಯರ್ಥ ಎನ್ನುವ ಆಲೋಚನೆಯೇ ತಪ್ಪು”

ಅದಮ್ಯ ಚೇತನದ ಅಧ್ಯಕ್ಷೆ ತೇಜಸ್ವಿನಿ ಅನಂತ್‌ಕುಮಾರ್‌ ಮಾತನಾಡಿ, ಸಮುದ್ರಕ್ಕೆ ಸೇರುವ ನೀರು ವ್ಯರ್ಥವಾಗುತ್ತಿದೆ ಎಂಬ ಆಲೋಚನೆಯೇ ತಪ್ಪು ಎಂದು ಹೇಳಿದರು.

ನದಿಗಳು ಸಮುದ್ರ ಸೇರುವುದು ಪ್ರಕೃತಿಯ ಜಲಚಕ್ರದ ಅವಿಭಾಜ್ಯ ಭಾಗ. ನದಿಗಳ ನೈಸರ್ಗಿಕ ಹರಿವಿಗೆ ಅಡ್ಡಿಪಡಿಸುವುದರಿಂದ ಪರಿಸರ ವ್ಯವಸ್ಥೆಯ ಹಲವು ಕೊಂಡಿಗಳು ದುರ್ಬಲವಾಗುವ ಸಾಧ್ಯತೆಯಿದೆ. ಅಭಿವೃದ್ಧಿಯ ವ್ಯಾಖ್ಯಾನವನ್ನು ಮರುಪರಿಶೀಲಿಸುವ ಅಗತ್ಯವಿದೆ. ಇಲ್ಲದಿದ್ದರೆ ಅಭಿವೃದ್ಧಿಯ ಹೆಸರಿನಲ್ಲಿ ಪರಿಸರಕ್ಕೆ ಅಪಾರ ಹಾನಿ ಮಾಡುವ ಯೋಜನೆಗಳು ಮುಂದುವರಿಯುವ ಅಪಾಯವಿದೆ ಎಂದು ಎಚ್ಚರಿಸಿದರು.

ಪರಿಸರ ಹೋರಾಟದ ದಿಕ್ಕು ಮತ್ತು ವೇಗ ಬದಲಾಗಬೇಕು. ಪ್ರಕೃತಿ ಸಂರಕ್ಷಣೆಯನ್ನು ಕೇವಲ ಪ್ರತಿಭಟನೆಗೆ ಸೀಮಿತಗೊಳಿಸದೆ, ಅದನ್ನು ಜನರ ಬದುಕಿನ ಅವಿಭಾಜ್ಯ ಕರ್ತವ್ಯವಾಗಿ ಪರಿಗಣಿಸಬೇಕು. ಸರ್ಕಾರಗಳು ರಹಸ್ಯವಾಗಿ ಅಥವಾ ಸ್ಥಳೀಯರ ವಿಶ್ವಾಸ ಪಡೆಯದೆ ಯೋಜನೆಗಳನ್ನು ಮುಂದುವರಿಸುವ ಪರಿಸ್ಥಿತಿ ನಿರ್ಮಾಣವಾಗಬಾರದು ಎಂದು ಹೇಳಿದರು.

ಗಿರಿಧರ ಕಜೆ: “ಪಶ್ಚಿಮ ಘಟ್ಟದ ನದಿಗಳು ಅದರ ಹೃದಯವಿದ್ದಂತೆ”

ಶ್ರೀ ಅಖಿಲ ಹವ್ಯಕ ಮಹಾಸಭಾದ ಅಧ್ಯಕ್ಷ ಗಿರಿಧರ ಕಜೆ ಅವರು ನದಿ ತಿರುವು ಯೋಜನೆಗಳ ವಿರುದ್ಧ ತೀವ್ರ ಆಕ್ಷೇಪ ವ್ಯಕ್ತಪಡಿಸಿದರು.

“ಪಶ್ಚಿಮ ಘಟ್ಟದ ನದಿಗಳು ಅದರ ಹೃದಯವಿದ್ದಂತೆ. ಹೃದಯವನ್ನು ದೇಹದ ಒಂದು ಭಾಗದಿಂದ ತೆಗೆದು ಮತ್ತೊಂದು ಭಾಗಕ್ಕೆ ಕಸಿ ಮಾಡಿದಂತೆ ನದಿಗಳನ್ನು ತಿರುಗಿಸಲು ಸಾಧ್ಯವಿಲ್ಲ” ಎಂಬ ರೂಪಕದ ಮೂಲಕ ನದಿಗಳ ನೈಸರ್ಗಿಕ ವ್ಯವಸ್ಥೆಯ ಮಹತ್ವವನ್ನು ವಿವರಿಸಿದರು.

ಭವಿಷ್ಯದ ಪೀಳಿಗೆಗೆ ನದಿಗಳು ಜೀವಂತವಾಗಿ ಉಳಿಯಬೇಕಾದರೆ, ಇಂದಿನ ಪೀಳಿಗೆ ಅವುಗಳನ್ನು ರಕ್ಷಿಸಬೇಕಿದೆ. ಪ್ರಾಣಿಗಳ ಮೇಲೆ ತೋರಿಸುವ ದಯೆಯನ್ನು ನದಿಗಳ ಮೇಲೂ, ಅವುಗಳ ಸುತ್ತ ಬದುಕುವ ಜನರ ಮೇಲೂ ತೋರಿಸಬೇಕು. ಉತ್ತರ ಕನ್ನಡದ ಪರಿಸರ ಪ್ರೇಮಿ ಜನರ ನೋವಿಗೆ ಸರ್ಕಾರ ಸ್ಪಂದಿಸಬೇಕು. ಕಾಡು ಮತ್ತು ಮನುಷ್ಯರ ಬದುಕನ್ನು ರಕ್ಷಿಸಿಕೊಳ್ಳಲು ಜನರು ಬೀದಿಗಿಳಿಯುವ ಪರಿಸ್ಥಿತಿ ನಿರ್ಮಾಣವಾಗಿರುವುದು ದುರಂತ ಎಂದು ಹೇಳಿದರು.

ಶಾಸಕ ಭೀಮಣ್ಣ ನಾಯ್ಕ್‌: “ಡಿಪಿಆರ್‌ ಸ್ಥಗಿತಗೊಳಿಸಿ, ಸೂಕ್ತ ಸಮಿತಿ ರಚಿಸಿ”

ಶಿರಸಿ–ಸಿದ್ದಾಪುರ ವಿಧಾನಸಭಾ ಕ್ಷೇತ್ರದ ಶಾಸಕ ಭೀಮಣ್ಣ ನಾಯ್ಕ್‌ ಮಾತನಾಡಿ, ಬೇಡ್ತಿ–ಅಘನಾಶಿನಿ ನದಿ ತಿರುವು ಯೋಜನೆಯನ್ನು ರೂಪಿಸುವಾಗಲೇ ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳು ಸ್ಥಳೀಯ ಜನರ ಅಭಿಪ್ರಾಯವನ್ನು ಪಡೆಯಬೇಕಿತ್ತು ಎಂದು ಹೇಳಿದರು.

ಯಾರದ್ದೋ ಸ್ವಾರ್ಥಕ್ಕಾಗಿ ನದಿಗಳ ದಿಕ್ಕು ಬದಲಿಸಿ ಉತ್ತರ ಕನ್ನಡದ ಜನರನ್ನು ಸಂಕಷ್ಟಕ್ಕೆ ತಳ್ಳುವುದು ಸರಿಯಲ್ಲ. ಯೋಜನೆಯಿಂದ ಜಿಲ್ಲೆಯ ಪರಿಸರ, ಕೃಷಿ ಮತ್ತು ಜನಜೀವನದ ಮೇಲೆ ಆಗಬಹುದಾದ ಪರಿಣಾಮಗಳನ್ನು ಸಮಗ್ರವಾಗಿ ಪರಿಶೀಲಿಸಬೇಕು. ಉತ್ತಮ ಮಳೆಯಿಲ್ಲದ ವರ್ಷಗಳಲ್ಲಿ ಈಗಾಗಲೇ ನೀರಿನ ಸಮಸ್ಯೆ ಎದುರಾಗುತ್ತಿದೆ. ಶಿರಸಿಯಂತಹ ಪ್ರದೇಶಗಳಲ್ಲಿಯೂ ಬರದ ಆತಂಕ ಕಾಣಿಸಿಕೊಳ್ಳುತ್ತಿದೆ. ಇಂತಹ ಸಂದರ್ಭದಲ್ಲಿ ನದಿಗಳಲ್ಲಿ ಹೆಚ್ಚುವರಿ ನೀರು ಇದೆ ಎಂದು ಭಾವಿಸಿ ಯೋಜನೆ ರೂಪಿಸುವುದು ಸೂಕ್ತವಲ್ಲ ಎಂದು ಅಭಿಪ್ರಾಯಪಟ್ಟರು.

ಕೂಡಲೇ ಡಿಪಿಆರ್‌ ಪ್ರಕ್ರಿಯೆಯನ್ನು ಸ್ಥಗಿತಗೊಳಿಸಿ, ತಜ್ಞರು, ಸ್ಥಳೀಯ ಪ್ರತಿನಿಧಿಗಳು ಹಾಗೂ ಪರಿಸರ ತಜ್ಞರನ್ನು ಒಳಗೊಂಡ ಸೂಕ್ತ ಸಮಿತಿಯನ್ನು ರಚಿಸಬೇಕು ಎಂದು ಒತ್ತಾಯಿಸಿದರು.

ಶಾಂತಾರಾಮ ಸಿದ್ಧಿ ಎಚ್ಚರಿಕೆ: “ನಮ್ಮ ತಾಳ್ಮೆಯನ್ನು ಪರೀಕ್ಷಿಸಬೇಡಿ”

ವಿಧಾನ ಪರಿಷತ್ತಿನ ಮಾಜಿ ಸದಸ್ಯ ಶಾಂತಾರಾಮ ಸಿದ್ಧಿ ಮಾತನಾಡಿ, ಜನರ ಬದುಕಿನೊಂದಿಗೆ ಬೆಸೆದುಕೊಂಡಿರುವ ನದಿಗಳನ್ನು ತಿರುಗಿಸುವುದರಿಂದ ಉತ್ತರ ಕನ್ನಡದ ನೈಸರ್ಗಿಕ ಸಮತೋಲನಕ್ಕೆ ಧಕ್ಕೆಯಾಗುವ ಸಾಧ್ಯತೆಯಿದೆ ಎಂದು ಹೇಳಿದರು.

ಮಲೆನಾಡಿನ ಜನರು ಹಲವು ದಶಕಗಳಿಂದ ಪರಿಸರ ಮತ್ತು ನದಿಗಳ ರಕ್ಷಣೆಗಾಗಿ ತಾಳ್ಮೆಯಿಂದ ಹೋರಾಟ ನಡೆಸುತ್ತಿದ್ದಾರೆ. ಜನರ ಆತಂಕವನ್ನು ನಿರ್ಲಕ್ಷಿಸಿ ಯೋಜನೆಗಳನ್ನು ಮುಂದುವರಿಸುವ ಪ್ರಯತ್ನ ಮಾಡಬಾರದು. ಸ್ಥಳೀಯರ ಬದುಕು ಮತ್ತು ಪರಿಸರವನ್ನು ಕಡೆಗಣಿಸುವ ಕ್ರಮಗಳು ಮುಂದುವರಿದರೆ ಜನರ ಅಸಮಾಧಾನ ಹೆಚ್ಚಾಗಲಿದೆ ಎಂದು ಸರ್ಕಾರಕ್ಕೆ ಎಚ್ಚರಿಕೆ ನೀಡಿದರು.

ಎತ್ತಿನಹೊಳೆ ಯೋಜನೆಯ ಉದಾಹರಣೆ ನೀಡಿ ಎಚ್ಚರಿಸಿದ ವಿಜ್ಞಾನಿ ಟಿ.ವಿ. ರಾಮಚಂದ್ರ

“ನೀರಿನ ಲಭ್ಯತೆ ಮತ್ತು ಅಗತ್ಯದ ವೈಜ್ಞಾನಿಕ ಲೆಕ್ಕಾಚಾರವಿಲ್ಲದೆ ಬೃಹತ್‌ ಯೋಜನೆ ಬೇಡ”

ಭಾರತೀಯ ವಿಜ್ಞಾನ ಸಂಸ್ಥೆಯ (ಐಐಎಸ್‌ಸಿ) ಹಿರಿಯ ವಿಜ್ಞಾನಿ ಟಿ.ವಿ. ರಾಮಚಂದ್ರ ಅವರು ನದಿ ತಿರುವು ಯೋಜನೆಗಳ ಆರ್ಥಿಕ ಮತ್ತು ಪರಿಸರಾತ್ಮಕ ಪರಿಣಾಮಗಳ ಕುರಿತು ಗಮನ ಸೆಳೆದರು.

ಎತ್ತಿನಹೊಳೆ ಯೋಜನೆಯ ಪ್ರಸ್ತಾಪ ಬಂದಾಗಲೇ ತಾವು ಅದರ ಬಗ್ಗೆ ಆಕ್ಷೇಪ ವ್ಯಕ್ತಪಡಿಸಿದ್ದಾಗಿ ತಿಳಿಸಿದ ಅವರು, ಲಭ್ಯವಿರುವ ನೀರಿನ ಪ್ರಮಾಣ ಮತ್ತು ಸ್ಥಳೀಯ ಅಗತ್ಯಗಳನ್ನು ವೈಜ್ಞಾನಿಕವಾಗಿ ಲೆಕ್ಕಹಾಕದೆ ಬೃಹತ್‌ ಯೋಜನೆಗಳನ್ನು ರೂಪಿಸುವುದು ಸೂಕ್ತವಲ್ಲ ಎಂದರು.

“ಎತ್ತಿನಹೊಳೆ ಪ್ರದೇಶದಲ್ಲಿ ಲಭ್ಯವಾಗುತ್ತದೆ ಎಂದು ಹೇಳಲಾಗುವ 12.85 ಟಿಎಂಸಿ ನೀರಿನಲ್ಲಿ ಸುಮಾರು 12 ಟಿಎಂಸಿ ನೀರು ಸ್ಥಳೀಯ ಬಳಕೆಗೆ ಅಗತ್ಯವಿದೆ. ಉಳಿಯುವ 0.85 ಟಿಎಂಸಿ ನೀರಿಗಾಗಿ ₹24 ಸಾವಿರ ಕೋಟಿ ವೆಚ್ಚದ ಬೃಹತ್‌ ಯೋಜನೆ ರೂಪಿಸಲಾಗುತ್ತಿದೆ ಎಂಬುದು ಗಂಭೀರವಾಗಿ ಪರಿಶೀಲಿಸಬೇಕಾದ ವಿಚಾರ” ಎಂದು ಅವರು ಹೇಳಿದರು. ಇದೇ ಮಾದರಿಯ ಯೋಜನೆಯನ್ನು ಈಗ ಉತ್ತರ ಕನ್ನಡದಲ್ಲಿಯೂ ಜಾರಿಗೆ ತರಲು ಪ್ರಯತ್ನಿಸಲಾಗುತ್ತಿದೆ ಎಂಬ ಆತಂಕ ವ್ಯಕ್ತಪಡಿಸಿದರು.

ಪಶ್ಚಿಮ ಘಟ್ಟಗಳು ಕೋಟ್ಯಂತರ ಜನರಿಗೆ ನೀರುಣಿಸುವ ಪ್ರಮುಖ ನೈಸರ್ಗಿಕ ವ್ಯವಸ್ಥೆಯಾಗಿವೆ. ಈ ಪ್ರದೇಶದಲ್ಲಿ ಮಳೆಯಾಗುವುದು, ನದಿಗಳು ಹರಿಯುವುದು ಮತ್ತು ಅರಣ್ಯಗಳು ಉಳಿಯುವುದು ಹಲವು ರಾಜ್ಯಗಳ ನೀರಿನ ಭದ್ರತೆಗೆ ನಿರ್ಣಾಯಕವಾಗಿದೆ. ಇಂತಹ ಪ್ರದೇಶದ ಅರಣ್ಯ ಮತ್ತು ನದಿಗಳಿಗೆ ಹಾನಿ ಮಾಡುವ ಯೋಜನೆಗಳು ದೀರ್ಘಾವಧಿಯಲ್ಲಿ ಗಂಭೀರ ಸಮಸ್ಯೆಗಳನ್ನು ಉಂಟುಮಾಡಬಹುದು ಎಂದು ಎಚ್ಚರಿಸಿದರು.

ನದಿ ತಿರುವಿನಂತಹ ಬೃಹತ್‌ ಯೋಜನೆಗಳಿಗೆ ಪರ್ಯಾಯವಾಗಿ ಸ್ಥಳೀಯವಾಗಿ ಅರಣ್ಯ ಸಂವರ್ಧನೆ, ಕೆರೆಗಳ ಪುನರುಜ್ಜೀವನ, ಮಳೆನೀರು ಕೊಯ್ಲು ಮತ್ತು ಜಲಸಂಗ್ರಹಣೆಗೆ ಆದ್ಯತೆ ನೀಡಬೇಕು ಎಂದು ಸಲಹೆ ನೀಡಿದರು.

ಬೆಂಗಳೂರಿನಲ್ಲಿ ಸುರಿಯುವ ಮಳೆನೀರನ್ನು ಸಮರ್ಪಕವಾಗಿ ಸಂಗ್ರಹಿಸುವುದರ ಜೊತೆಗೆ, ಬಯಲುಸೀಮೆಯ ಜಿಲ್ಲೆಗಳಲ್ಲಿಯೂ ಸ್ಥಳೀಯ ಮಳೆಯ ನೀರನ್ನು ಉಳಿಸಿಕೊಳ್ಳುವ ವ್ಯವಸ್ಥೆ ರೂಪಿಸಿದರೆ ನೀರಿನ ಬೇಡಿಕೆಯ ಬಹುಪಾಲನ್ನು ಸ್ಥಳೀಯವಾಗಿಯೇ ಪೂರೈಸಲು ಸಾಧ್ಯವಿದೆ ಎಂದು ಅವರು ಅಭಿಪ್ರಾಯಪಟ್ಟರು.

ಸಾರಕ್ಕಿ ಕೆರೆಯ ಉದಾಹರಣೆ ನೀಡಿದ ಅವರು, ಕೆರೆಗಳ ಸಂರಕ್ಷಣೆ ಮತ್ತು ಪುನರುಜ್ಜೀವನವು ಅಂತರ್ಜಲ ಮಟ್ಟ ಹಾಗೂ ಸ್ಥಳೀಯ ತಾಪಮಾನವನ್ನು ಸುಧಾರಿಸುವಲ್ಲಿ ಮಹತ್ವದ ಪಾತ್ರ ವಹಿಸಬಹುದು ಎಂದು ವಿವರಿಸಿದರು.

ಸ್ವರ್ಣವಲ್ಲೀ ಶ್ರೀಗಳ ಸಂದೇಶ: “ನೀರು ಕೊಡುವುದಕ್ಕೆ ವಿರೋಧವಿಲ್ಲ; ಯೋಜನೆಯ ವೈಜ್ಞಾನಿಕತೆಯೇ ಪ್ರಶ್ನೆ”

ಪ್ರತಿಭಟನೆಯಲ್ಲಿ ಅನಿವಾರ್ಯ ಕಾರಣಗಳಿಂದ ಭಾಗವಹಿಸಲು ಸಾಧ್ಯವಾಗದ ಸ್ವರ್ಣವಲ್ಲೀ ಸಂಸ್ಥಾನ ಮಠದ ಶ್ರೀ ಗಂಗಾಧರೇಂದ್ರ ಸರಸ್ವತಿ ಸ್ವಾಮೀಜಿ ಅವರು ತಮ್ಮ ಸಂದೇಶವನ್ನು ಕಳುಹಿಸಿಕೊಟ್ಟಿದ್ದರು.

ಉತ್ತರ ಕನ್ನಡದ ಸಾವಿರಾರು ಜನರು ಪ್ರತಿಭಟನೆಯಲ್ಲಿ ಪಾಲ್ಗೊಂಡಿರುವುದು ಜಿಲ್ಲೆಯ ಲಕ್ಷಾಂತರ ಜನರ ಆತಂಕ ಮತ್ತು ಬೆಂಬಲದ ಪ್ರತೀಕವಾಗಿದೆ ಎಂದು ಅವರು ಅಭಿಪ್ರಾಯಪಟ್ಟರು. ಬೇಡ್ತಿ–ಅಘನಾಶಿನಿ ನದಿಗಳಲ್ಲಿ ಭವಿಷ್ಯದ ಅಗತ್ಯಗಳನ್ನು ಪೂರೈಸಲು ಸಾಕಷ್ಟು ನೀರು ಲಭ್ಯವಿದೆಯೇ ಎಂಬುದರ ಕುರಿತು ವೈಜ್ಞಾನಿಕ ಪರಿಶೀಲನೆ ಅಗತ್ಯವಿದೆ. ನದಿಗಳಲ್ಲಿ ನೀರಿನ ಕೊರತೆ ಉಂಟಾದರೆ ಉತ್ತರ ಕನ್ನಡದ ಜನರೇ ಭವಿಷ್ಯದಲ್ಲಿ ಜಲಕ್ಷಾಮ ಎದುರಿಸಬೇಕಾಗಬಹುದು ಎಂದು ಎಚ್ಚರಿಸಿದರು.

“ಬಯಲುಸೀಮೆಯ ಜನರಿಗೆ ನೀರು ಕೊಡಬಾರದು ಎಂದು ನಾವು ಹೇಳುತ್ತಿಲ್ಲ. ಆದರೆ ಪ್ರಸ್ತಾವಿತ ಯೋಜನೆಯಿಂದ ಅಲ್ಲಿನ ಜನರಿಗೆ ನಿಜವಾಗಿಯೂ ಪ್ರಯೋಜನವಾಗುತ್ತದೆಯೇ ಎಂಬುದನ್ನು ವೈಜ್ಞಾನಿಕವಾಗಿ ಪರಿಶೀಲಿಸಬೇಕು. ಯೋಜನೆಯಿಂದ ಉತ್ತರ ಕನ್ನಡಕ್ಕೂ ಪ್ರಯೋಜನವಿಲ್ಲ, ನೀರು ಕೊಂಡೊಯ್ಯುವ ಪ್ರದೇಶಕ್ಕೂ ನಿರೀಕ್ಷಿತ ಪ್ರಯೋಜನ ಸಿಗದಿದ್ದರೆ ಇಂತಹ ಯೋಜನೆಯ ಅಗತ್ಯವೇನು?” ಎಂಬ ಪ್ರಶ್ನೆಯನ್ನು ಮುಂದಿಟ್ಟರು.

ಸ್ಥಳೀಯರ ಅಭಿಪ್ರಾಯ, ವಿಜ್ಞಾನಿಗಳ ಅಧ್ಯಯನ ಮತ್ತು ಪರಿಸರದ ಧಾರಣಾ ಸಾಮರ್ಥ್ಯವನ್ನು ಕಡೆಗಣಿಸಿ ಯೋಜನೆ ರೂಪಿಸುವುದನ್ನು ಪ್ರಶ್ನಿಸಲೇಬೇಕು. ಇದು ನ್ಯಾಯ, ವಿಜ್ಞಾನ ಮತ್ತು ಸತ್ಯದ ಪರವಾದ ಹೋರಾಟವಾಗಿದೆ. ಸರ್ಕಾರ ಇನ್ನಾದರೂ ಜನರ ಅಹವಾಲುಗಳನ್ನು ಆಲಿಸಬೇಕು ಎಂದು ಅವರು ಆಗ್ರಹಿಸಿದರು.

ವಿದೇಶದಿಂದ ಸಂಸದ ವಿಶ್ವೇಶ್ವರ ಹೆಗಡೆ ಕಾಗೇರಿ ಸಂದೇಶ

ವಿಶ್ವಸಂಸ್ಥೆಯ ವಿಶೇಷ ಕಾರ್ಯಕ್ರಮವೊಂದರಲ್ಲಿ ಭಾಗವಹಿಸಿದ್ದ ಹಿನ್ನೆಲೆಯಲ್ಲಿ ಪ್ರತಿಭಟನೆಗೆ ಹಾಜರಾಗಲು ಸಾಧ್ಯವಾಗದ ಸಂಸದ ವಿಶ್ವೇಶ್ವರ ಹೆಗಡೆ ಕಾಗೇರಿ ಅವರು ಸಂದೇಶದ ಮೂಲಕ ತಮ್ಮ ಅಭಿಪ್ರಾಯ ವ್ಯಕ್ತಪಡಿಸಿದರು.

ಪಶ್ಚಿಮ ಘಟ್ಟಗಳು ನಾಡಿನ ಅಮೂಲ್ಯ ಜೀವಸಂಪತ್ತು. ನದಿಗಳು ಜನರ ಬದುಕಿನ ಜೀವನಾಡಿಗಳು. ಈ ನೆಲ, ಜಲ ಮತ್ತು ಪ್ರಕೃತಿಯನ್ನು ರಕ್ಷಿಸುವುದು ಪ್ರತಿಯೊಬ್ಬರ ನೈತಿಕ ಜವಾಬ್ದಾರಿಯಾಗಿದೆ ಎಂದು ಅವರು ಹೇಳಿದರು.

ಉತ್ತರ ಕನ್ನಡ ಜಿಲ್ಲೆ ಈಗಾಗಲೇ ಹಲವು ಪರಿಸರದ ಮೇಲೆ ಪರಿಣಾಮ ಬೀರುವ ಯೋಜನೆಗಳಿಂದ ಸಂಕಷ್ಟ ಎದುರಿಸುತ್ತಿದೆ. ಇಂತಹ ಸಂದರ್ಭದಲ್ಲಿ ಬೇಡ್ತಿ–ವರದಾ, ಅಘನಾಶಿನಿ–ವೇದಾವತಿ ನದಿ ಜೋಡಣೆ ಮತ್ತು ಶರಾವತಿ ಪಂಪ್ಡ್‌ ಸ್ಟೋರೇಜ್‌ ಯೋಜನೆಗಳು ಜಿಲ್ಲೆಯ ಜನಜೀವನ, ಪರಿಸರ ಸಮತೋಲನ ಮತ್ತು ಭವಿಷ್ಯದ ಹಿತದೃಷ್ಟಿಯಿಂದ ಗಂಭೀರವಾಗಿ ಪರಿಶೀಲಿಸಬೇಕಾದ ವಿಚಾರಗಳಾಗಿವೆ ಎಂದು ಅಭಿಪ್ರಾಯಪಟ್ಟರು.

ಪಶ್ಚಿಮ ಘಟ್ಟದ ಪರಿಸರ ಸೂಕ್ಷ್ಮ ಪ್ರದೇಶಗಳ ಧಾರಣಾ ಸಾಮರ್ಥ್ಯದ ಕುರಿತು ತಜ್ಞ ವಿಜ್ಞಾನಿಗಳಿಂದ ಸಮಗ್ರ ಅಧ್ಯಯನ ನಡೆಸಬೇಕು. ಅದರ ವರದಿ ಬರುವವರೆಗೆ ಉತ್ತರ ಕನ್ನಡ ಜಿಲ್ಲೆಯಲ್ಲಿ ಪರಿಸರಕ್ಕೆ ಹಾನಿ ಉಂಟುಮಾಡುವ ಸಾಧ್ಯತೆಯಿರುವ ಹೊಸ ಬೃಹತ್‌ ಯೋಜನೆಗಳನ್ನು ಕೈಗೆತ್ತಿಕೊಳ್ಳಬಾರದು ಎಂದು ಒತ್ತಾಯಿಸಿದರು.

ಜಯಂತ್‌ ಕಾಯ್ಕಿಣಿ, ಯಲ್ಲಪ್ಪ ರೆಡ್ಡಿ, ನಾಗೇಶ್‌ ಹೆಗಡೆ ಧ್ವನಿ

ಪ್ರತಿಭಟನೆಯಲ್ಲಿ ಹಿರಿಯ ಸಾಹಿತಿ ಜಯಂತ್‌ ಕಾಯ್ಕಿಣಿ, ಪರಿಸರ ಹೋರಾಟಗಾರ ಯಲ್ಲಪ್ಪ ರೆಡ್ಡಿ ಮತ್ತು ಹಿರಿಯ ಪತ್ರಕರ್ತ ನಾಗೇಶ್‌ ಹೆಗಡೆ ಅವರು ನದಿ ಹಾಗೂ ಅರಣ್ಯ ಸಂರಕ್ಷಣೆಯ ಅಗತ್ಯವನ್ನು ವಿಭಿನ್ನವಾಗಿ ವಿವರಿಸಿದರು.

ಜಯಂತ್‌ ಕಾಯ್ಕಿಣಿ: “ಸರ್ಕಾರದ ಪಾಲಿಗೆ ಉತ್ತರ ಕನ್ನಡವು ಫಲಭರಿತ ಹಣ್ಣಿನ ಮರದಂತಾಗಿದೆ. ಇಲ್ಲಿನ ಕಾಡು ಮತ್ತು ನೈಸರ್ಗಿಕ ಸಂಪತ್ತಿನ ಮೇಲೆ ಪದೇಪದೇ ಯೋಜನೆಗಳ ಒತ್ತಡ ಹೇರುವ ಪರಿಸ್ಥಿತಿ ನಿರ್ಮಾಣವಾಗಿದೆ. ಇದು ಕೇವಲ ಪರಿಸರ ಹೋರಾಟಗಾರರ ವಿಚಾರವಲ್ಲ. ಈ ಜಿಲ್ಲೆಯ ಕಾಡನ್ನು ರಕ್ಷಿಸುವುದು ಪ್ರತಿಯೊಬ್ಬ ಕನ್ನಡಿಗನ ಕೆಲಸವಾಗಿದೆ” ಎಂದು ಹೇಳಿದರು.

ಯಲ್ಲಪ್ಪ ರೆಡ್ಡಿ: ಬೇಡ್ತಿ–ಅಘನಾಶಿನಿ ನದಿ ಕಣಿವೆಗಳಲ್ಲಿ ಅಪರೂಪದ ಜೀವವೈವಿಧ್ಯವಿದೆ. ಅದರ ಪ್ರಯೋಜನವನ್ನು ಇಡೀ ದೇಶ ಪಡೆಯುತ್ತಿದೆ. ಇಂತಹ ಅಮೂಲ್ಯ ಪರಿಸರ ವ್ಯವಸ್ಥೆಗೆ ಹಾನಿ ಮಾಡುವ ನಿರ್ಧಾರಗಳನ್ನು ಸರ್ಕಾರ ಕೈಗೊಳ್ಳಬಾರದು ಎಂದು ಒತ್ತಾಯಿಸಿದರು.

ನಾಗೇಶ್‌ ಹೆಗಡೆ: ಮಲೆನಾಡು, ನದಿ, ಕಣಿವೆ ಮತ್ತು ಕಾಡುಗಳಿಗೆ ಸ್ವಾಭಾವಿಕವಾಗಿ ಹರಿಯುವ ಸ್ವಾತಂತ್ರ್ಯ ಬೇಕಿದೆ. ಅನೇಕ ಕಡೆ ಅಣೆಕಟ್ಟುಗಳ ಪರಿಣಾಮಗಳನ್ನು ಮರುಪರಿಶೀಲಿಸಿ ನದಿಗಳ ಮುಕ್ತ ಹರಿವಿಗೆ ಅವಕಾಶ ಕಲ್ಪಿಸುವ ಪ್ರಯತ್ನಗಳು ನಡೆಯುತ್ತಿರುವಾಗ, ನಮ್ಮಲ್ಲಿ ಅಪರೂಪದ ನದಿಗಳ ನೈಸರ್ಗಿಕ ಹರಿವನ್ನೇ ಬದಲಿಸುವ ಪ್ರಯತ್ನ ನಡೆಯುತ್ತಿರುವುದು ಆತಂಕಕಾರಿ ಎಂದು ಹೇಳಿದರು. ಬೇಡ್ತಿ–ಅಘನಾಶಿನಿ ನದಿಗಳ ಪಾವಿತ್ರ್ಯ ಮತ್ತು ಸ್ವಾಭಾವಿಕತೆಯನ್ನು ಉಳಿಸಲು ಎಲ್ಲರೂ ಕೈಜೋಡಿಸಬೇಕು. ನದಿಗಳಿಗೂ ಹಕ್ಕುಗಳಿರಬೇಕು ಎಂಬ ಚರ್ಚೆಗೂ ಆದ್ಯತೆ ನೀಡಬೇಕು ಎಂದು ಅಭಿಪ್ರಾಯಪಟ್ಟರು.

ಪ್ರತಿಭಟನಾ ಸಭೆಯ 11 ನಿರ್ಣಯಗಳು ಯಾವುವು?

ಬೇಡ್ತಿ–ಅಘನಾಶಿನಿ ಕೊಳ್ಳ ಸಂರಕ್ಷಣಾ ಸಮಿತಿಯ ನೇತೃತ್ವದಲ್ಲಿ ನಡೆದ ಸಭೆಯಲ್ಲಿ ಅಂಗೀಕರಿಸಿದ 11 ನಿರ್ಣಯಗಳು ನದಿಗಳ ಸಂರಕ್ಷಣೆ, ಸ್ಥಳೀಯರ ಬದುಕು, ವೈಜ್ಞಾನಿಕ ಅಧ್ಯಯನ ಮತ್ತು ಪರ್ಯಾಯ ಜಲ ನಿರ್ವಹಣೆಯ ಅಗತ್ಯವನ್ನು ಒತ್ತಿಹೇಳಿವೆ.

1. ಪಶ್ಚಿಮ ಘಟ್ಟದ 22 ಪ್ರಮುಖ ನದೀ ಕಣಿವೆಗಳ ಸಂರಕ್ಷಣೆ: ಪಶ್ಚಿಮ ಘಟ್ಟದಲ್ಲಿ ಹುಟ್ಟಿ ಹರಿಯುವ 22 ಪ್ರಮುಖ ನದೀ ಕಣಿವೆಗಳನ್ನು ರಕ್ಷಿಸಲು ಸರ್ಕಾರ ವಿಶೇಷ ಹಾಗೂ ಸುಸ್ಥಿರ ಯೋಜನೆಯನ್ನು ರೂಪಿಸಬೇಕು.

2. ನಾಲ್ಕು ಸ್ಥಳಗಳಲ್ಲಿ ಅಣೆಕಟ್ಟು ನಿರ್ಮಿಸಿ ನೀರು ಸಾಗಿಸುವ ಯೋಜನೆಗಳ ಮರುಪರಿಶೀಲನೆ: ಬೇಡ್ತಿ ಮತ್ತು ಅಘನಾಶಿನಿ ನದಿ ಕಣಿವೆಗಳಲ್ಲಿ ಅಣೆಕಟ್ಟುಗಳನ್ನು ನಿರ್ಮಿಸಿ ನೀರನ್ನು ಬೇರೆಡೆಗೆ ಸಾಗಿಸುವ ಪ್ರಸ್ತಾವಿತ ಯೋಜನೆಗಳು ರೈತರು, ಮೀನುಗಾರರು, ಅರಣ್ಯವಾಸಿಗಳು ಸೇರಿದಂತೆ ಲಕ್ಷಾಂತರ ಜನರ ಬದುಕಿನ ಮೇಲೆ ಪರಿಣಾಮ ಬೀರಬಹುದಾದ್ದರಿಂದ ಅವುಗಳನ್ನು ಕೈಬಿಡಬೇಕು.

3. ಎತ್ತಿನಹೊಳೆ ಮಾದರಿಯ ಯೋಜನೆಗಳ ಅನುಭವ ಪರಿಗಣನೆ: ಎತ್ತಿನಹೊಳೆ ಯೋಜನೆಯ ಅನುಭವವನ್ನು ಗಮನದಲ್ಲಿಟ್ಟುಕೊಂಡು, ಬೇಡ್ತಿ–ಅಘನಾಶಿನಿ ನದಿಗಳ ದಿಕ್ಕು ಬದಲಿಸುವ ಯೋಜನೆಗಳ ನೀರಿನ ಲಭ್ಯತೆ, ವೆಚ್ಚ ಮತ್ತು ವಾಸ್ತವಿಕ ಪ್ರಯೋಜನಗಳನ್ನು ಸಮಗ್ರವಾಗಿ ಪರಿಶೀಲಿಸಬೇಕು. ನೀರಿನ ಮೂಲದ ಖಚಿತತೆ ಇಲ್ಲದ ಯೋಜನೆಗಳು ನಿರೀಕ್ಷಿತ ಫಲ ನೀಡದ ಅಪಾಯವಿದೆ ಎಂದು ಸಭೆ ಎಚ್ಚರಿಸಿತು.

4. ಬೇಡ್ತಿ ನದಿಯಲ್ಲಿ ಹೆಚ್ಚುವರಿ ನೀರಿನ ಲಭ್ಯತೆ ಪರಿಶೀಲನೆ: ಬೇಡ್ತಿ ನದಿಯಲ್ಲಿ ಸ್ಥಳೀಯ ಅಗತ್ಯಗಳನ್ನು ಪೂರೈಸಿದ ನಂತರ ಬೇರೆಡೆಗೆ ಸಾಗಿಸಲು ಹೆಚ್ಚುವರಿ ನೀರು ಇದೆಯೇ ಎಂಬುದನ್ನು ವೈಜ್ಞಾನಿಕವಾಗಿ ನಿರ್ಧರಿಸಬೇಕು. ನದಿಗಳ ನೈಸರ್ಗಿಕ ಹರಿವಿಗೆ ಧಕ್ಕೆ ಉಂಟುಮಾಡುವ ಪ್ರಯತ್ನಗಳನ್ನು ಕೈಬಿಡಬೇಕು.

5. ಭೂಕುಸಿತದ ಅಪಾಯದ ವೈಜ್ಞಾನಿಕ ಅಧ್ಯಯನ: ಪಶ್ಚಿಮ ಘಟ್ಟದ ಹಲವು ಭಾಗಗಳು ಭೂಕುಸಿತದ ಅಪಾಯ ಎದುರಿಸುತ್ತಿವೆ. ಬೇಡ್ತಿ–ಅಘನಾಶಿನಿ ನದಿ ಕಣಿವೆಗಳ ಪರಿಸರ ಸೂಕ್ಷ್ಮತೆಯನ್ನು ಪರಿಗಣಿಸಿ, ಬೃಹತ್‌ ಯೋಜನೆಗಳಿಂದ ಭೂಸ್ಥಿರತೆ ಮತ್ತು ಪರಿಸರದ ಮೇಲೆ ಆಗಬಹುದಾದ ಪರಿಣಾಮಗಳನ್ನು ಅಧ್ಯಯನ ಮಾಡಬೇಕು.

6. ಕರಾವಳಿಯಲ್ಲಿ ಉಪ್ಪುನೀರು ಒಳನುಗ್ಗುವಿಕೆ ಮತ್ತು ಜೀವನೋಪಾಯದ ರಕ್ಷಣೆ: ಕುಮಟಾ–ಅಂಕೋಲಾ ಕರಾವಳಿ ಪ್ರದೇಶದಲ್ಲಿ ನದಿ ತಿರುವು ಯೋಜನೆಗಳಿಂದ ಉಪ್ಪುನೀರಿನ ಒಳನುಗ್ಗುವಿಕೆ, ಕೃಷಿ ಮತ್ತು ಮೀನುಗಾರಿಕೆಯ ಮೇಲೆ ಉಂಟಾಗಬಹುದಾದ ಪರಿಣಾಮಗಳನ್ನು ಪರಿಶೀಲಿಸಬೇಕು. ಕರಾವಳಿ ಪರಿಸರ ಹಾಗೂ ಸ್ಥಳೀಯರ ಜೀವನೋಪಾಯಕ್ಕೆ ಅಪಾಯ ಉಂಟುಮಾಡುವ ಯೋಜನೆಗಳನ್ನು ಕೈಬಿಡಬೇಕು.

7. ಅರಣ್ಯ ಮತ್ತು ವನ್ಯಜೀವಿಗಳ ಸಂರಕ್ಷಣೆ: ಲಕ್ಷಾಂತರ ಮರಗಳ ನಾಶ, ಅರಣ್ಯ ಪ್ರದೇಶಗಳ ವಿಘಟನೆ ಮತ್ತು ಮಾನವ–ವನ್ಯಜೀವಿ ಸಂಘರ್ಷ ಹೆಚ್ಚುವ ಅಪಾಯವನ್ನು ಪರಿಗಣಿಸಬೇಕು. ಪಶ್ಚಿಮ ಘಟ್ಟದ ಅಮೂಲ್ಯ ಸಸ್ಯ ಮತ್ತು ವನ್ಯಜೀವಿ ಸಂಪತ್ತನ್ನು ರಕ್ಷಿಸಬೇಕು.

8. ನದಿ ಕಣಿವೆಗಳ ಸಂರಕ್ಷಣೆ ಮತ್ತು ಪರಿಸರ ಧಾರಣಾ ಸಾಮರ್ಥ್ಯಕ್ಕೆ ಆದ್ಯತೆ: ಬೇಡ್ತಿ, ಅಘನಾಶಿನಿ ಮತ್ತು ಶಾಲ್ಮಲಾ ನದಿ ಕಣಿವೆಗಳ ಪರಿಸರ ಮಹತ್ವವನ್ನು ಪರಿಗಣಿಸಬೇಕು. ರಾಜ್ಯ ವನ್ಯಜೀವಿ ಇಲಾಖೆ 2012ರಲ್ಲಿ ಈ ಕಣಿವೆಗಳನ್ನು ವನ್ಯಜೀವಿ ಸಂರಕ್ಷಿತ ಪ್ರದೇಶಗಳೆಂದು ಘೋಷಿಸಿದೆ ಎಂಬ ಅಂಶವನ್ನು ಸಭೆ ಉಲ್ಲೇಖಿಸಿತು. ಉತ್ತರ ಕನ್ನಡ ಜಿಲ್ಲೆಯ ಪರಿಸರ ಧಾರಣಾ ಸಾಮರ್ಥ್ಯದ ಕುರಿತು ನಡೆಸಲಾದ ಅಧ್ಯಯನದ ಶಿಫಾರಸುಗಳನ್ನು ಪರಿಗಣಿಸಿ, ಬೃಹತ್‌ ಯೋಜನೆಗಳ ಸೂಕ್ತತೆಯನ್ನು ನಿರ್ಧರಿಸಬೇಕು.

9. ಉತ್ತರ ಕನ್ನಡದ ರೈತರಿಗೆ ಸುಸ್ಥಿರ ನೀರಾವರಿ: ಸ್ಥಳೀಯ ಜಲಮೂಲಗಳು, ಮಳೆನೀರು ಸಂಗ್ರಹಣೆ, ಕೆರೆಗಳ ಪುನರುಜ್ಜೀವನ ಮತ್ತು ಅರಣ್ಯ ಸಂವರ್ಧನೆಯ ಆಧಾರದ ಮೇಲೆ ಪರಿಸರಕ್ಕೆ ಹಾನಿಯಾಗದ ನೀರಾವರಿ ಯೋಜನೆಗಳನ್ನು ರೂಪಿಸಬೇಕು.

10. ಜನಪ್ರತಿನಿಧಿಗಳು, ವಿಜ್ಞಾನಿಗಳು ಮತ್ತು ಸ್ಥಳೀಯ ಸಂಸ್ಥೆಗಳ ಒತ್ತಾಯಕ್ಕೆ ಮನ್ನಣೆ: ವಿಜ್ಞಾನಿಗಳು, ಸ್ಥಳೀಯ 120 ಗ್ರಾಮ ಪಂಚಾಯಿತಿಗಳು, 160 ಗ್ರಾಮೀಣ ಸಹಕಾರ ಸಂಘಗಳು, ಉತ್ತರ ಕನ್ನಡ ಜಿಲ್ಲಾ ಕೆಡಿಪಿ ಸಭೆ ಹಾಗೂ ಧಾರ್ಮಿಕ ಮುಖಂಡರು ವ್ಯಕ್ತಪಡಿಸಿರುವ ಆತಂಕಗಳನ್ನು ಸರ್ಕಾರ ಗಂಭೀರವಾಗಿ ಪರಿಗಣಿಸಬೇಕು. ಬೇಡ್ತಿ–ಅಘನಾಶಿನಿ ನದಿ ತಿರುವು ಯೋಜನೆಗಳನ್ನು ಕೈಬಿಡುವಂತೆ ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳನ್ನು ಒತ್ತಾಯಿಸಬೇಕು.

11. ಬೇಡ್ತಿ–ವರದಾ ಹಾಗೂ ಅಘನಾಶಿನಿ–ವೇದಾವತಿ ಯೋಜನೆಗಳನ್ನು ಕೈಬಿಡಬೇಕು: ಪ್ರಸ್ತಾವಿತ ನದಿ ತಿರುವು ಯೋಜನೆಗಳನ್ನು ರದ್ದುಗೊಳಿಸಬೇಕು. ವಿಶೇಷವಾಗಿ ಬೇಡ್ತಿ–ವರದಾ ಯೋಜನೆಯ ಡಿಪಿಆರ್‌ ಸಿದ್ಧಪಡಿಸುವ ಕಾರ್ಯವನ್ನು ತಕ್ಷಣ ಸ್ಥಗಿತಗೊಳಿಸಬೇಕು.

ಸಾವಿರಾರು ಜನರ ನಡುವೆ ಶಿಸ್ತು; ಉತ್ತರ ಕನ್ನಡದ ಆತಿಥ್ಯವೂ ಗಮನ ಸೆಳೆಯಿತು

ಪ್ರತಿಭಟನೆಯ ಮತ್ತೊಂದು ವಿಶೇಷವೆಂದರೆ ಜನರ ಶಿಸ್ತು ಮತ್ತು ಸಂಘಟಿತ ಭಾಗವಹಿಸುವಿಕೆ. ಎರಡು ದಿನಗಳ ಹಿಂದೆ ಇದೇ ಸ್ಥಳದಲ್ಲಿ ನಡೆದ ಮತ್ತೊಂದು ಪ್ರತಿಭಟನೆಯ ಹಿನ್ನೆಲೆಯಲ್ಲಿ ಕಾರ್ಯಕ್ರಮಕ್ಕೂ ಮೊದಲು ಪೊಲೀಸರು ಹೆಚ್ಚಿನ ಸಂಖ್ಯೆಯಲ್ಲಿ ಜಮಾಯಿಸಿದ್ದರು. ಆದರೆ ಉತ್ತರ ಕನ್ನಡದ ಜನರು ಹೆಚ್ಚಿನ ಸಂಖ್ಯೆಯಲ್ಲಿ ಆಗಮಿಸಿ ಶಾಂತಿಯುತವಾಗಿ ಸಭೆಯಲ್ಲಿ ಪಾಲ್ಗೊಂಡ ಹಿನ್ನೆಲೆಯಲ್ಲಿ, ಪೊಲೀಸರು ತಮ್ಮ ನಿಯೋಜನೆಯನ್ನು ಕಡಿಮೆ ಮಾಡಿಕೊಂಡರು. ಸಭೆಯ ಕೊನೆಯವರೆಗೂ ಯಾವುದೇ ದೊಡ್ಡ ಅಹಿತಕರ ಘಟನೆ ನಡೆಯದಂತೆ ಪ್ರತಿಭಟನಾಕಾರರು ಶಿಸ್ತು ಕಾಪಾಡಿಕೊಂಡರು.

ಫ್ರೀಡಂ ಪಾರ್ಕ್‌ನ ನಿಗದಿತ ಪ್ರತಿಭಟನಾ ಸ್ಥಳ ಜನರಿಂದ ತುಂಬಿಹೋಗುವಷ್ಟು ದೊಡ್ಡ ಪ್ರಮಾಣದಲ್ಲಿ ಭಾಗವಹಿಸುವಿಕೆ ಕಂಡುಬಂತು. ಉತ್ತರ ಕನ್ನಡದ ಸಾಂಸ್ಕೃತಿಕ ವೈಶಿಷ್ಟ್ಯವನ್ನು ಪ್ರತಿಬಿಂಬಿಸುವ ಹಾಳೆಯ ಟೋಪಿ, ಕೋಕಂ ಜ್ಯೂಸ್‌ ಮತ್ತು ಲಘು ಭೋಜನದ ಆತಿಥ್ಯವೂ ಗಮನ ಸೆಳೆಯಿತು.

“ಸಸ್ಯ ಶ್ಯಾಮಲಾಂ ವಂದೇ ಮಾತರಂ” ಸೇರಿದಂತೆ ವಿವಿಧ ಘೋಷಣೆಗಳ ಮೂಲಕ ಪ್ರತಿಭಟನಾಕಾರರು ತಮ್ಮ ಪರಿಸರ ಪ್ರೇಮ ಮತ್ತು ನದಿ ಸಂರಕ್ಷಣೆಯ ಬದ್ಧತೆಯನ್ನು ವ್ಯಕ್ತಪಡಿಸಿದರು. ಕಲಾವಿದರಾದ ನೀರ್ನಳ್ಳಿ ರಾಮಕೃಷ್ಣ, ಲಕ್ಷ್ಮೀ ಹೆಗಡೆ ಸೇರಿದಂತೆ ಹಲವರು ತಮ್ಮ ಮಾತುಗಳ ಮೂಲಕ ಹೋರಾಟಗಾರರಲ್ಲಿ ಉತ್ಸಾಹ ತುಂಬಿದರು.

ಪರಿಸರ ಸಂರಕ್ಷಣೆಯ ಅಗತ್ಯವನ್ನು ಯುವಜನರ ದೃಷ್ಟಿಕೋನದಿಂದ ವಿವರಿಸಿದ ಪರಿಸರ ಕಾಲೇಜು ವಿದ್ಯಾರ್ಥಿನಿ ವನ್ಯಾ ಹೆಗಡೆ ಅವರಂತಹ ಯುವ ಧ್ವನಿಗಳೂ ಸಭೆಯಲ್ಲಿ ಗಮನ ಸೆಳೆದವು. ನದಿ ಮತ್ತು ಕಾಡಿನ ಉಳಿವಿನ ಹೋರಾಟವು ಹಿರಿಯರ ಕಳಕಳಿಗೆ ಮಾತ್ರ ಸೀಮಿತವಾಗಿಲ್ಲ; ಮುಂದಿನ ಪೀಳಿಗೆಯ ಬದುಕಿನ ಪ್ರಶ್ನೆಯೂ ಆಗಿದೆ ಎಂಬ ಸಂದೇಶ ಇದರಿಂದ ವ್ಯಕ್ತವಾಯಿತು.

ಗಣ್ಯರ ಉಪಸ್ಥಿತಿ; ವ್ಯಾಪಕ ಬೆಂಬಲ

ಪ್ರತಿಭಟನಾ ಸಭೆಯಲ್ಲಿ ನಿವೃತ್ತ ನ್ಯಾಯಮೂರ್ತಿ ಸಂತೋಷ್‌ ಹೆಗ್ಡೆ, ಶಾಸಕ ಭೀಮಣ್ಣ ನಾಯ್ಕ್‌, ಪರಿಸರ ಹೋರಾಟಗಾರ ಯಲ್ಲಪ್ಪ ರೆಡ್ಡಿ, ವಿಜ್ಞಾನಿ ಟಿ.ವಿ. ರಾಮಚಂದ್ರ, ಕಡಲಜೀವಿ ಶಾಸ್ತ್ರಜ್ಞ ಎ.ಎನ್. ನಾಯಕ್‌, ಶ್ರೀ ಅಖಿಲ ಹವ್ಯಕ ಮಹಾಸಭಾದ ಅಧ್ಯಕ್ಷ ಗಿರಿಧರ ಕಜೆ, ಹಿರಿಯ ಸಾಹಿತಿ ಜಯಂತ್‌ ಕಾಯ್ಕಿಣಿ, ತೇಜಸ್ವಿನಿ ಅನಂತ್‌ಕುಮಾರ್‌, ಶಾಂತಾರಾಮ ಸಿದ್ಧಿ, ಕಲಾವಿದರಾದ ನೀರ್ನಳ್ಳಿ ರಾಮಕೃಷ್ಣ, ಶಂಕರ್‌ ಭಟ್‌, ಲಕ್ಷ್ಮೀ ಹೆಗಡೆ, ಅರವಿಂದ ನಾಯಕ್‌, ನೀರಾವರಿ ತಜ್ಞರಾದ ವಿ.ಆರ್. ಹೆಗಡೆ ಮತ್ತು ಶ್ರೀನಿವಾಸ ರೆಡ್ಡಿ, ಟಿಎಸ್‌ಎಸ್‌ ಅಧ್ಯಕ್ಷ ಗೋಪಾಲಕೃಷ್ಣ ವೈದ್ಯ, ಸಾಮಾಜಿಕ ಹೋರಾಟಗಾರ್ತಿ ಸುಷ್ಮಾ ರೆಡ್ಡಿ ಸೇರಿದಂತೆ ಅನೇಕ ಗಣ್ಯರು ಪಾಲ್ಗೊಂಡರು.

ಬೇಡ್ತಿ–ಅಘನಾಶಿನಿ ಕೊಳ್ಳ ಸಂರಕ್ಷಣಾ ಸಮಿತಿಯ ಬೆಂಗಳೂರು ವಿಭಾಗದ ಪ್ರಮುಖರಾದ ಎಸ್‌.ಎಂ. ಹೆಗಡೆ, ಸ್ವರ್ಣವಲ್ಲೀ ಮಠದ ಆಡಳಿತ ಮಂಡಳಿ ಅಧ್ಯಕ್ಷ ಡಾ. ಸತೀಶ ಹೆಗಡೆ ಹುಳಗೋಳ, ಸಿದ್ದಾಪುರ ಟಿಎಂಎಸ್‌ ಅಧ್ಯಕ್ಷ ಆರ್‌.ಎಂ. ಹೆಗಡೆ ಬಾಳೇಸರ, ಸಂಘಟಕ ನರಸಿಂಹ ಹೆಗಡೆ, ಯಲ್ಲಾಪುರದ ಧುರೀಣ ವಿವೇಕ ಹೆಬ್ಬಾರ ಸೇರಿದಂತೆ ಹಲವು ಮುಖಂಡರು ಹೋರಾಟಕ್ಕೆ ಬೆಂಬಲ ಸೂಚಿಸಿದರು.

ಅಭಿವೃದ್ಧಿ ಬೇಕು; ಆದರೆ ಪ್ರಕೃತಿಯ ಬೆಲೆ ತೆತ್ತು ಅಲ್ಲ!

ಬೇಡ್ತಿ–ಅಘನಾಶಿನಿ ನದಿ ತಿರುವು ಯೋಜನೆಗಳ ವಿರುದ್ಧ ಬೆಂಗಳೂರಿನಲ್ಲಿ ನಡೆದ ಪ್ರತಿಭಟನೆ, ಉತ್ತರ ಕನ್ನಡದ ಪರಿಸರ ಮತ್ತು ಜನಜೀವನದ ಕುರಿತು ನಡೆಯುತ್ತಿರುವ ಚರ್ಚೆಗೆ ಹೊಸ ವೇಗ ನೀಡಿದೆ. ಬಯಲುಸೀಮೆಯ ನೀರಿನ ಅಗತ್ಯವನ್ನು ನಿರ್ಲಕ್ಷಿಸದೆ, ನೀರು ಸಾಗಿಸುವ ಯೋಜನೆಗಳ ವೈಜ್ಞಾನಿಕ ಸಾಧ್ಯತೆ, ಸ್ಥಳೀಯ ಜನರ ಹಕ್ಕುಗಳು ಮತ್ತು ಪರಿಸರದ ದೀರ್ಘಕಾಲೀನ ಪರಿಣಾಮಗಳನ್ನು ಸಮಗ್ರವಾಗಿ ಪರಿಶೀಲಿಸಬೇಕು ಎಂಬುದು ಪ್ರತಿಭಟನಾಕಾರರ ಮುಖ್ಯ ನಿಲುವಾಗಿದೆ.

ನದಿಗಳಲ್ಲಿ ನಿಜವಾಗಿಯೂ ಎಷ್ಟು ನೀರು ಲಭ್ಯವಿದೆ? ಸ್ಥಳೀಯ ಜನರ ಭವಿಷ್ಯದ ಅಗತ್ಯಗಳನ್ನು ಪೂರೈಸಿದ ನಂತರ ಹೆಚ್ಚುವರಿ ನೀರು ಉಳಿಯುತ್ತದೆಯೇ? ನದಿ ತಿರುವಿನಿಂದ ಅರಣ್ಯ, ಕೃಷಿ, ಮೀನುಗಾರಿಕೆ, ಅಂತರ್ಜಲ ಮತ್ತು ಕರಾವಳಿ ಪರಿಸರದ ಮೇಲೆ ಯಾವ ಪರಿಣಾಮ ಉಂಟಾಗಬಹುದು? ಯೋಜನೆಯ ವೆಚ್ಚಕ್ಕೆ ಅನುಗುಣವಾಗಿ ನಿರೀಕ್ಷಿತ ಪ್ರಯೋಜನ ಸಿಗುತ್ತದೆಯೇ? ಇಂತಹ ಪ್ರಶ್ನೆಗಳಿಗೆ ಸ್ಪಷ್ಟವಾದ ವೈಜ್ಞಾನಿಕ ಉತ್ತರ ದೊರೆಯುವವರೆಗೆ ಯೋಜನೆಯನ್ನು ಮುಂದುವರಿಸಬಾರದು ಎಂಬ ಆಗ್ರಹ ಸಭೆಯಲ್ಲಿ ಮೊಳಗಿತು.

ಬೇಡ್ತಿ–ಅಘನಾಶಿನಿ ನದಿಗಳು ಕೇವಲ ನೀರಿನ ಮೂಲಗಳಲ್ಲ. ಅವು ಉತ್ತರ ಕನ್ನಡದ ಭೌಗೋಳಿಕ ಸ್ವರೂಪ, ಜೀವವೈವಿಧ್ಯ, ಕೃಷಿ, ಮೀನುಗಾರಿಕೆ, ಸಂಸ್ಕೃತಿ ಮತ್ತು ಜನರ ಬದುಕಿನ ಅವಿಭಾಜ್ಯ ಭಾಗಗಳಾಗಿವೆ. ಹೀಗಾಗಿ ಅವುಗಳ ಭವಿಷ್ಯದ ಕುರಿತು ನಿರ್ಧಾರ ಕೈಗೊಳ್ಳುವಾಗ ಸ್ಥಳೀಯ ಜನರ ಅಭಿಪ್ರಾಯಕ್ಕೆ ಆದ್ಯತೆ ನೀಡಬೇಕು ಎಂಬುದು ಹೋರಾಟಗಾರರ ಒತ್ತಾಯ.

ಒಟ್ಟಿನಲ್ಲಿ, ಬೆಂಗಳೂರಿನ ಫ್ರೀಡಂ ಪಾರ್ಕ್‌ನಲ್ಲಿ ನಡೆದ ಈ ಬೃಹತ್‌ ಸಭೆಯು 11 ನಿರ್ಣಯಗಳ ಮೂಲಕ ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳಿಗೆ ಸ್ಪಷ್ಟ ಸಂದೇಶ ನೀಡಿದೆ: ನೀರು ನಿರ್ವಹಣೆಗೆ ಪರಿಹಾರ ಹುಡುಕುವಾಗ ಒಂದು ಪ್ರದೇಶದ ಬದುಕನ್ನು ಮತ್ತೊಂದು ಪ್ರದೇಶದ ಅಗತ್ಯಕ್ಕೆ ಬಲಿಕೊಡಬಾರದು. ವೈಜ್ಞಾನಿಕ ಅಧ್ಯಯನ, ಪರಿಸರ ಸಂರಕ್ಷಣೆ ಮತ್ತು ಜನರ ಸಹಮತದ ಆಧಾರದ ಮೇಲೆಯೇ ಯೋಜನೆಗಳ ಕುರಿತು ನಿರ್ಧಾರ ಕೈಗೊಳ್ಳಬೇಕು. ಬೇಡ್ತಿ–ಅಘನಾಶಿನಿ ನದಿಗಳ ಉಳಿವಿಗಾಗಿ ಆರಂಭವಾಗಿರುವ ಈ ಹೋರಾಟಕ್ಕೆ ಜಿಲ್ಲೆಯ ಜನಪ್ರತಿನಿಧಿಗಳು ಪಕ್ಷಾತೀತವಾಗಿ ಕೈಜೋಡಿಸಬೇಕು.