ಮುಂಡಗೋಡು ರಕ್ತಪಾತ: ಹೋಟೆಲ್‌ನಲ್ಲಿ ನಡೆದಿದ್ದ ಭೀಕರ ಹತ್ಯೆ ಕೇಸ್ ಫಿನಿಶ್‌! ಐವರು 'ಶೂಟರ್‌'ಗಳ ಬಂಧನ

ಆಪ್ತ ನ್ಯೂಸ್ ಮುಂಡಗೋಡು:

ಶಾಂತವಾಗಿದ್ದ ಮುಂಡಗೋಡು ಪಟ್ಟಣವನ್ನು ನಡುರಾತ್ರಿ ಬೆಚ್ಚಿಬೀಳಿಸಿದ್ದ ಜಮೀರ್ ಅಹ್ಮದ್ ದರ್ಗಾವಾಲೆ (NMD) ಹತ್ಯೆ ಪ್ರಕರಣವನ್ನು ಪೋಲಿಸರು ಕೇವಲ 48 ಗಂಟೆಗಳಲ್ಲಿ ಭೇದಿಸಿದ್ದಾರೆ. ಸಿನೆಮಾ ಶೈಲಿಯಲ್ಲಿ ಕಾರ್ಯಾಚರಣೆ ನಡೆಸಿದ ಪೊಲೀಸರು, ಬೆಂಗಳೂರಿನ ನೆಲಮಂಗಲದ ಬಳಿ ಐವರು ಆರೋಪಿಗಳನ್ನು ಹೆಡೆಮುರಿ ಕಟ್ಟುವಲ್ಲಿ ಯಶಸ್ವಿಯಾಗಿದ್ದಾರೆ.

ಬಂಧಿತ ಕಿರಾತಕರು ಯಾರು?

ಬಂಧಿತರಲ್ಲಿ ಮುಂಡಗೋಡು ಮತ್ತು ಧಾರವಾಡ ಮೂಲದ ಪ್ರಮುಖ ಆರೋಪಿಗಳಿದ್ದು, ಇವರ ಪತ್ತೆಗಾಗಿ ಪೊಲೀಸರು ಬಲೆ ಬೀಸಿದ್ದರು:

1. ಮಂಜುನಾಥ ನಾಗೇಂದ್ರ ಕಾಜಗಾರ (35) - ಸಾಲಗಾಂವ, ಮುಂಡಗೋಡು (ಮುಖ್ಯ ಸಂಚುಗಾರ)

2. ಶ್ರೀಕಾಂತ ರಾಜಶೇಖರ ಕಿರಣ್ಣನವರ್ (22) - ಇಂದಿರಾನಗರ ಕೊಪ್ಪ, ಮುಂಡಗೋಡು

3. ಅಭಿಷೇಕ್ ಮಲ್ಲಿಕಾರ್ಜುನ ಬಡಶೆಟ್ಟಿ (22) - ಧಾರವಾಡ

4. ಮಂಜುನಾಥ್ ವಿಷ್ಣು ಬೆಳಗಾವಿ (20) - ಧಾರವಾಡ

5. ದೀಪಕ ನಾಗರಾಜ ನವಲೆ (22) - ಧಾರವಾಡ

ಸಿಕ್ಕಿಬಿದ್ದ ಆಯುಧಗಳ ರಾಶಿ!

ಆರೋಪಿಗಳಿಂದ ಕೃತ್ಯಕ್ಕೆ ಬಳಸಿದ ಮಾರಕಾಸ್ತ್ರಗಳು ಮಾತ್ರವಲ್ಲದೆ, ದ್ವಿಚಕ್ರ ವಾಹನಗಳು ಹಾಗೂ ಕಾರನ್ನು ವಶಪಡಿಸಿಕೊಳ್ಳಲಾಗಿದೆ.

• ಕಂಟ್ರಿ ಮೇಡ್ ಪಿಸ್ತೂಲ್‌ಗಳು: 02

• ಸಜೀವ ಗುಂಡುಗಳು: 10

• ವಾಹನಗಳು: ಒಂದು ಕಾರು ಹಾಗೂ ಎರಡು ಬೈಕ್‌ಗಳು.

ಹತ್ಯೆಯ ಹಿಂದೆ ಇತ್ತಾ 'ಮೀಟರ್ ಬಡ್ಡಿ' ಲಿಂಕ್?

ಪೊಲೀಸ್ ತನಿಖೆಯ ಪ್ರಾಥಮಿಕ ವರದಿಗಳ ಪ್ರಕಾರ, ಮೃತ ಜಮೀರ್ ಅಹ್ಮದ್ ಮತ್ತು ಆರೋಪಿ ಮಂಜುನಾಥ ಕಾಜಗಾರ ನಡುವೆ ದೀರ್ಘಕಾಲದ ದ್ವೇಷವಿತ್ತು. ಮೀಟರ್ ಬಡ್ಡಿ ವ್ಯವಹಾರ ಮತ್ತು ರಿಯಲ್ ಎಸ್ಟೇಟ್ ವ್ಯವಹಾರದಲ್ಲಿ ಉಂಟಾದ ಹಣಕಾಸಿನ ಕಿತ್ತಾಟ ಹಾಗೂ ವೈಯಕ್ತಿಕ ಮನಸ್ತಾಪವೇ ಈ ರಕ್ತಸಿಕ್ತ ಅಂತ್ಯಕ್ಕೆ ಕಾರಣ ಎನ್ನಲಾಗಿದೆ.

ಘಟನೆಯ ಹಿನ್ನೆಲೆ: ಶುಕ್ರವಾರ ರಾತ್ರಿ ಮುಂಡಗೋಡು ಬಸ್ ನಿಲ್ದಾಣದ ಎದುರಿರುವ ಹೋಟೆಲ್‌ವೊಂದರಲ್ಲಿ ಜಮೀರ್ ಅಹ್ಮದ್ ಊಟಕ್ಕೆ ಕುಳಿತಿದ್ದಾಗ, ಏಕಾಏಕಿ ನುಗ್ಗಿದ್ದ ದುಷ್ಕರ್ಮಿಗಳ ತಂಡ ಕಣ್ಣಿಗೆ ಖಾರದ ಪುಡಿ ಎರಚಿ, ಪಿಸ್ತೂಲ್‌ನಿಂದ ಗುಂಡು ಹಾರಿಸಿ, ನಂತರ ಮಾರಕಾಸ್ತ್ರಗಳಿಂದ ಹಲ್ಲೆ ಮಾಡಿ ಬರ್ಬರವಾಗಿ ಕೊಂದಿದ್ದರು.

ಪೊಲೀಸರ ಮಿಂಚಿನ ಕಾರ್ಯಾಚರಣೆ

ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿಗಳ ಮಾರ್ಗದರ್ಶನದಲ್ಲಿ ಶಿರಸಿ ಡಿವೈಎಸ್ಪಿ ಮತ್ತು ಮುಂಡಗೋಡು ಪಿಎಸ್ಐ ನೇತೃತ್ವದ ತಂಡಗಳು ತಾಂತ್ರಿಕ ಸುಳಿವುಗಳನ್ನು ಬೆನ್ನತ್ತಿ ಹೋಗಿ, ಆರೋಪಿಗಳು ಬೆಂಗಳೂರು ಕಡೆಗೆ ಪರಾರಿಯಾಗುತ್ತಿದ್ದಾಗ ನೆಲಮಂಗಲದ ಬಳಿ ಸುತ್ತುವರಿದು ಬಂಧಿಸಿದ್ದಾರೆ.

ಪಟ್ಟಣದಲ್ಲಿ ಉದ್ವಿಗ್ನ ಪರಿಸ್ಥಿತಿ ನಿರ್ಮಾಣವಾಗಿದ್ದರೂ, ಪೊಲೀಸರ ಈ ಶೀಘ್ರ ಕಾರ್ಯಾಚರಣೆ ಸಾರ್ವಜನಿಕರಲ್ಲಿ ಸಮಾಧಾನ ತಂದಿದೆ. ಸದ್ಯಕ್ಕೆ ಬಂಧಿತರನ್ನು ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಲಾಗಿದ್ದು, ತನಿಖೆ ಮುಂದುವರಿದಿದೆ.