"ನದಿ ಮುನಿದರೆ ಸರ್ಕಾರವೂ ಉಳಿಯಲ್ಲ: ಬೇಡ್ತಿ ಯೋಜನೆ ವಿರುದ್ಧ ಸ್ವಾದಿ ಶ್ರೀಗಳ ಎಚ್ಚರಿಕೆ"

ಆಪ್ತ ನ್ಯೂಸ್‌ ಶಿರಸಿ:

"ಭಾರತದ ಶ್ರೇಷ್ಠ ನಾಗರಿಕತೆಗಳು ಹುಟ್ಟಿ ಬೆಳೆದಿದ್ದೇ ನದಿಗಳ ಮಡಿಲಲ್ಲಿ. ಆದರೆ ಇಂದು ಅಭಿವೃದ್ಧಿಯ ಹೆಸರಿನಲ್ಲಿ ನಾವು ನದಿಗಳಿಗೆ ಉಪದ್ರವ ಕೊಡುತ್ತಿದ್ದೇವೆ. ನದಿ ನಮ್ಮನ್ನು ಕಾಡಲು ಶುರುಮಾಡಿದರೆ ಯಾವ ಸರ್ಕಾರಗಳೂ ಉಳಿಯುವುದಿಲ್ಲ," ಎಂದು ಸೋಂದಾ ಸ್ವಾದಿ ಜೈನ ಮಠದ ಶ್ರೀ ಭಟ್ಟಾಕಳಂಕ ಪಟ್ಟಾಚಾರ್ಯವರ್ಯ ಸ್ವಾಮೀಜಿ ಸರ್ಕಾರಕ್ಕೆ ಖಡಕ್ ಎಚ್ಚರಿಕೆ ನೀಡಿದ್ದಾರೆ.

ಬೇಡ್ತಿ-ವರದಾ ನದಿ ಜೋಡಣೆ ಯೋಜನೆಯನ್ನು ವಿರೋಧಿಸಿ ಮಾತನಾಡಿದ ಅವರು, ನದಿ ಸಂರಕ್ಷಣೆ ಎಂಬುದು ಕೇವಲ ನೀರಿನ ಉಳಿವಲ್ಲ, ಅದು ನಮ್ಮ ನಾಗರಿಕತೆಯನ್ನು ಸಂರಕ್ಷಿಸುವ ಆಂದೋಲನ ಎಂದು ಅಭಿಪ್ರಾಯಪಟ್ಟರು.

ನದಿಗಳೇ ನಮ್ಮ ಮೂಲ:

ಗಂಗಾ, ಸಿಂಧೂ ಸೇರಿದಂತೆ ಹಲವು ಮಹಾನ್ ನದಿಗಳ ತೀರದಲ್ಲಿಯೇ ಮಾನವನ ಬದುಕು ರೂಪುಗೊಂಡಿದೆ. ನದಿಯ ಮಕ್ಕಳಾದ ನಾವು ಇಂದು ನದಿಯನ್ನು ಸಂರಕ್ಷಿಸುವ ಜವಾಬ್ದಾರಿಯನ್ನು ಹೊರಬೇಕಿದೆ. ಆದರೆ ಕಾಲಕಾಲಕ್ಕೆ ನದಿಗಳಿಗೆ ತೊಂದರೆ ಕೊಡುವ ಕೆಲಸಗಳು ನಡೆಯುತ್ತಲೇ ಇವೆ ಎಂದು ಅವರು ವಿಷಾದ ವ್ಯಕ್ತಪಡಿಸಿದರು.

ಸರ್ಕಾರಕ್ಕೆ ವ್ಯಂಗ್ಯದ ಚಾಟಿ:

ಉತ್ತರ ಕನ್ನಡ ಜಿಲ್ಲೆಯ ಪರಿಸ್ಥಿತಿಯ ಬಗ್ಗೆ ಮಾತನಾಡಿದ ಶ್ರೀಗಳು, "ಸರ್ಕಾರಕ್ಕೆ ಉತ್ತರ ಕನ್ನಡ ಜಿಲ್ಲೆಯ ಮೇಲೆ ಎಲ್ಲಿಲ್ಲದ ಪ್ರೀತಿ. ಆ ಪ್ರೀತಿಯಿಂದಾಗಿಯೇ ಜಿಲ್ಲೆಗೆ ಹಲವು ಮಾರಕ ಯೋಜನೆಗಳನ್ನು ತರುತ್ತಿದೆ," ಎಂದು ವ್ಯಂಗ್ಯವಾಡಿದರು. ಬೇಡ್ತಿ ಕಣಿವೆಗೆ ಕಳೆದ ಹಲವು ದಶಕಗಳಿಂದ ಒಂದಿಲ್ಲೊಂದು ತೊಂದರೆಗಳು ಬರುತ್ತಲೇ ಇವೆ. ಜನರಿಗೆ ಮತ್ತು ನದಿಗಳಿಗೆ ಹಿಂಸೆ ನೀಡುವ ಇಂತಹ ಯೋಜನೆಗಳನ್ನು ಕೂಡಲೇ ನಿಲ್ಲಿಸಬೇಕು ಎಂದು ಆಗ್ರಹಿಸಿದರು.

ಉತ್ತಮ ಸರ್ಕಾರ ಅಂದರೆ ಏನು?

ಜನರ ಪರವಾಗಿ, ಜನರ ಆರೋಗ್ಯದ ಪರವಾಗಿ, ಪ್ರಕೃತಿ ಮತ್ತು ನದಿಗಳ ಪರವಾಗಿ ಇರುವ ಸರ್ಕಾರವೇ ನಿಜವಾದ ಉತ್ತಮ ಸರ್ಕಾರ. ಜನಜೀವನವನ್ನು ಅಸ್ತವ್ಯಸ್ತಗೊಳಿಸುವ, ರೈತರ ಭೂಮಿಯ ಫಲವತ್ತತೆಯನ್ನು ನಾಶಮಾಡುವ ಮತ್ತು ಪರಿಸರಕ್ಕೆ ಹಾನಿ ಮಾಡುವ ಬೇಡ್ತಿ-ವರದಾ ನದಿ ಜೋಡಣೆಯಂತಹ ಯೋಜನೆಗಳಿಗೆ ನಮ್ಮ ಸಂಪೂರ್ಣ ವಿರೋಧವಿದೆ ಎಂದು ಸ್ವಾಮೀಜಿ ಸ್ಪಷ್ಟಪಡಿಸಿದರು.