ಮಳಿಗೆಗಳಿಗೆ ಕನ್ನಡ ಫಲಕ ಅಳವಡಿಸುವಂತೆ ಆಗ್ರಹ

ಆಪ್ತ ನ್ಯೂಸ್ ಸಾಗರ:

ತಾಲೂಕು ವ್ಯಾಪ್ತಿಯ ಅಂಗಡಿ, ಮಳಿಗೆಗಳ ನಾಮಫಲಕವನ್ನು ಶೇ. ೬೦:೪೦ ಅನುಪಾತದಲ್ಲಿ ಅಳಡಿಸುವಂತೆ ಒತ್ತಾಯಿಸಿ ಕರ್ನಾಟಕ ರಕ್ಷಣಾ ವೇದಿಕೆ (ನಾರಾಯಣ ಗೌಡ ಬಣ) ವತಿಯಿಂದ ಬೈಕ್ ರ‍್ಯಾಲಿ ನಡೆಸಿ, ಉಪವಿಭಾಗಾಧಿಕಾರಿ ಕಚೇರಿಗೆ ಮನವಿ ಸಲ್ಲಿಸಲಾಯಿತು.
ಕರವೇ ತಾಲೂಕು ಅಧ್ಯಕ್ಷ ಮನೋಜ್ ಕುಗ್ವೆ ಮಾತನಾಡಿ, ರಾಜ್ಯ ಸರ್ಕಾರ ಎಲ್ಲ ಅಂಗಡಿ, ಮಳಿಗೆಗಳ ನಾಮಫಲಕವನ್ನು ಕನ್ನಡದಲ್ಲಿಯೆ ಹಾಕಬೇಕೆಂಬ ಕಾನೂನು ಜಾರಿಗೊಳಿಸಿದೆ. ಆದರೂ ಒಂದಷ್ಟು ಅಂಗಡಿ ಮಾಲೀಕರು ಹಿಂದಿ, ಇಂಗ್ಲೀಷ್‌ನಲ್ಲೇ ನಾಮಫಲಕ ಇಟ್ಟುಕೊಂಡಿದ್ದಾರೆ. ಇದು ಕನ್ನಡ ಭಾಷೆಗೆ ಮಾಡುತ್ತಿರುವ ಅವಮಾನ. ಕಡ್ಡಾಯವಾಗಿ ಕನ್ನಡ ಬಳಕೆಗೆ ಆದ್ಯತೆ ನೀಡುವ ನಿಟ್ಟಿನಲ್ಲಿ ರಾಜ್ಯ ಸರ್ಕಾರ ಹೆಚ್ಚಿನ ಕ್ರಮ ಕೈಗೊಳ್ಳಬೇಕು ಎಂದು ಒತ್ತಾಯಿಸಿದರು.
ನಗರಸಭೆಯ ನಾಮಫಲಕವನ್ನು ಕನ್ನಡದಲ್ಲೇ ಹಾಕಬೇಕು. ಕೆಲವು ಬ್ಯಾಂಕ್‌ನಲ್ಲಿ ಹೊರರಾಜ್ಯದ ಅಧಿಕಾರಿ, ಸಿಬ್ಬಂದಿಗಳಿದ್ದು ಅವರು ಕನ್ನಡ ಬಿಟ್ಟು ಅನ್ಯಭಾಷೆ ಮಾತನಾಡುತ್ತಾರೆ. ಇದರಿಂದ ಬೇರೆ ಭಾಷೆ ಬಾರದ ಗ್ರಾಮೀಣ ಭಾಗದ ಕನ್ನಡಿಗರಿಗೆ ತೀವ್ರ ತೊಂದರೆಯಾಗುತ್ತಿದೆ. ಅಂಥವರನ್ನು ತಕ್ಷಣ ವರ್ಗಾವಣೆ ಮಾಡಬೇಕು ಎಂದು ಇದೇ ಸಂದರ್ಭದಲ್ಲಿ ಆಗ್ರಹಿಸಿದರು.
ಮಹಿಳಾ ಘಟಕದ ಅಧ್ಯಕ್ಷೆ ಜ್ಯೋತಿ ಸೋಮಶೇಖರ್, ಪ್ರಮುಖರಾದ ಶ್ಯಾಮಲ ಆನಂದಪುರ, ರವಿ ಶಿವಮೊಗ್ಗ, ಎಚ್.ಬಿ. ರಾಘವೇಂದ್ರ, ತೀ.ನ.ಶ್ರೀನಿವಾಸ್, ಅರುಣ್, ಸುಧಾಕರ ಕುಗ್ವೆ, ಗಣಪತಿ ಪಡವಗೋಡು, ಷಣ್ಮುಖ ಸಂದೀಪ್, ಮಹೇಶ್, ಪುನಿತ್, ಕುಶ ಕಾಗೋಡು ಮೊದಲಾದವರು ಹಾಜರಿದ್ದರು.