ಶ್ರೀಮನ್ನೆಲೆಮಾವಿನ ಮಠದಲ್ಲಿ ಯಕ್ಷಗಾನ ತಾಳಮದ್ದಲೆ

ಆಪ್ತ ನ್ಯೂಸ್‌ ಹೇರೂರು:

ಶ್ರೀಮನ್ನೆಲೆಮಾವಿನ ಮಠದಲ್ಲಿ ಸೆ.18ರಂದು ಯಕ್ಷಗಾನ ಹಾಗೂ ಭರತನಾಟ್ಯ ಕಲೆಯ ಸೊಬಗನ್ನು ಪರಿಚಯಿಸುವ ವಿಶೇಷ ಸಾಂಸ್ಕೃತಿಕ ಕಾರ್ಯಕ್ರಮ ಆಯೋಜಿಸಲಾಗಿದೆ.

ಶ್ರೀಮಜ್ಜಗದ್ಗುರು ಶ್ರೀ ಶಂಕರಾಚಾರ್ಯ ಶ್ರೀ ಶ್ರೀ ಮಾಧವಾನಂದ ಭಾರತೀ ಮಹಾಸ್ವಾಮಿಗಳ ಅನುಗ್ರಹದಿಂದ, ಶ್ರೀ ಲಕ್ಷ್ಮೀನರಸಿಂಹ ‘ಸಂಸ್ಕೃತಿ ಸಂಪದ’ ವೇದಿಕೆಯ ಆಶ್ರಯದಲ್ಲಿ ಈ ಕಾರ್ಯಕ್ರಮ ನಡೆಯಲಿದೆ. ಶ್ರೀಮಠದ ಶ್ರೀ ಮಂಗಲಧಾಮದ ಸಭಾಂಗಣದಲ್ಲಿ ಸಂಜೆ ಕಲಾ ಕಾರ್ಯಕ್ರಮಗಳು ಜರುಗಲಿವೆ.

ಕಾರ್ಯಕ್ರಮದ ಆರಂಭದಲ್ಲಿ ಕುಮಾರಿ ಪ್ರೀತಿಕಾ ಸತೀಶ್, ಹುತ್ತಗಾರು ಅವರಿಂದ ‘ನೃತ್ಯ ಪೂಜೆ’ ಎಂಬ ಭರತನಾಟ್ಯ ಪ್ರಸ್ತುತಿ ನಡೆಯಲಿದೆ. ಶುಕ್ರವಾರ ಸೆ.18ರಂದು ಸಂಜೆ 4.30ಕ್ಕೆ ಭರತನಾಟ್ಯ ಕಾರ್ಯಕ್ರಮ ಆರಂಭವಾಗಲಿದೆ.

ಇದಾದ ಬಳಿಕ ಸಂಜೆ 5 ಗಂಟೆಯಿಂದ ಯಕ್ಷಗೆಜ್ಜೆ (ರಿ.), ಶಿರಸಿ ಇವರ ವತಿಯಿಂದ ‘ಸತ್ಯವಾನ ಸಾವಿತ್ರಿ’ ಯಕ್ಷಗಾನ ತಾಳಮದ್ದಲೆ ಕಾರ್ಯಕ್ರಮ ನಡೆಯಲಿದೆ. ಪೌರಾಣಿಕ ಕಥಾನಕದ ಮೂಲಕ ಭಕ್ತಿ, ಸಂಸ್ಕೃತಿ, ವಾಗ್ವೈಖರಿ ಹಾಗೂ ಯಕ್ಷಗಾನ ಪರಂಪರೆಯ ಸೊಗಡನ್ನು ಪ್ರೇಕ್ಷಕರಿಗೆ ಪರಿಚಯಿಸುವ ಉದ್ದೇಶದಿಂದ ಕಾರ್ಯಕ್ರಮ ಆಯೋಜಿಸಲಾಗಿದೆ.

ತಾಳಮದ್ದಲೆಯ ಹಿಮ್ಮೇಳದಲ್ಲಿ ಶ್ರೀ ಗಜಾನನ ಭಟ್ಟ ತುಳಗೇರಿ, ಪ್ರಶಾಂತ್ ಭಂಡಾರಿ ಹಾಗೂ ರವಿ ಮೂರೂರು ಭಾಗವಹಿಸಲಿದ್ದಾರೆ. ಮುಮ್ಮೇಳದಲ್ಲಿ ನಿರ್ಮಲಾ ಹೆಗಡೆ, ಲತಾ ಗಿರಿಧರ, ರೇಣುಕಾ ನಾಗರಾಜ್, ಭವಾನಿ ಭಟ್ಟ, ಜ್ಯೋತಿ ಭಟ್ಟ ಹಾಗೂ ಸಂಧ್ಯಾ ಅಜಯ್ ಅವರು ಕಲಾ ಪ್ರದರ್ಶನ ನೀಡಲಿದ್ದಾರೆ.

ಭರತನಾಟ್ಯದ ನೃತ್ಯ ವೈಭವದೊಂದಿಗೆ ಆರಂಭವಾಗಿ, ಯಕ್ಷಗಾನ ತಾಳಮದ್ದಲೆಯ ಮಾತುಗಾರಿಕೆ, ಪೌರಾಣಿಕ ಕಥನ ಮತ್ತು ಕಲಾವಿದರ ಪ್ರತಿಭೆಯ ಮೂಲಕ ಮುಂದುವರಿಯುವ ಈ ಕಾರ್ಯಕ್ರಮವು ಕಲಾಸಕ್ತರಿಗೆ ವಿಶೇಷ ಅನುಭವ ನೀಡುವ ನಿರೀಕ್ಷೆಯಿದೆ.

ಕಲೆ ಮತ್ತು ಕಲಾವಿದರನ್ನು ಪ್ರೋತ್ಸಾಹಿಸುವ ಉದ್ದೇಶದಿಂದ ಆಯೋಜಿಸಿರುವ ಈ ಸಾಂಸ್ಕೃತಿಕ ಕಾರ್ಯಕ್ರಮಕ್ಕೆ ಕಲಾಸಕ್ತರು ಹೆಚ್ಚಿನ ಸಂಖ್ಯೆಯಲ್ಲಿ ಆಗಮಿಸಿ ಕಾರ್ಯಕ್ರಮದ ಸೊಬಗನ್ನು ಸವಿಯುವುದರೊಂದಿಗೆ ಕಲಾವಿದರಿಗೆ ಪ್ರೋತ್ಸಾಹ ನೀಡಬೇಕೆಂದು ಶ್ರೀಮಠದ ಪ್ರಕಟಣೆ ತಿಳಿಸಿದೆ.