ಕೈಗಾ ಅಣು ಸ್ಥಾವರಕ್ಕೆ 'ಬಾಹುಬಲಿ' ಲಗ್ಗೆ ಇಡುವ ಮುನ್ನವೇ ಉರುಳಿಬಿದ್ದ: ಗುರಿ ತಲುಪುವ 3 ಕಿಮೀ ಮುನ್ನವೇ 'ಮಕಾಡೆ' ಮಲಗಿದ ಮಹಾಕಾಯ!

ಆಪ್ತ ನ್ಯೂಸ್ ಕಾರವಾರ:

ಸಾವಿರಾರು ಕಿಲೋಮೀಟರ್ ದೂರದಿಂದ ಸತತ ಮೂರು ತಿಂಗಳ ಕಾಲ ಕುಂಟುತ್ತಾ, ತೆವಳುತ್ತಾ ಸಾಗಿದ್ದ ಆ 'ಬಾಹುಬಲಿ' ವಾಹನಕ್ಕೆ ಕೊನೆಗೂ ದೃಷ್ಟಿ ಬಿದ್ದಂತಿದೆ. ಇನ್ನೇನು ತನ್ನ ಗುರಿ ತಲುಪಲು ಕೇವಲ 3 ಕಿಲೋಮೀಟರ್ ಬಾಕಿ ಇದೆ ಎನ್ನುವಾಗಲೇ, ಕೈಗಾ ಅಣು ವಿದ್ಯುತ್ ಸ್ಥಾವರದ ಬೃಹತ್ ಯಂತ್ರ ಹೊತ್ತ ವಾಹನ ಹರ್ಟುಗಾ ಗ್ರಾಮದ ಬಳಿ ಪಲ್ಟಿಯಾಗಿದೆ.

ಫೆಬ್ರವರಿಯಿಂದ ಶುರುವಾಗಿದ್ದ ಮಹಾ ಪಯಣ

ಗುಜರಾತ್‌ನಿಂದ ಕಳೆದ ಫೆಬ್ರವರಿಯಲ್ಲಿ ಹೊರಟಿದ್ದ ಈ ಬೃಹತ್ ಯಂತ್ರೋಪಕರಣ ಹೊತ್ತ ವಾಹನ, ಏಪ್ರಿಲ್ 15ರಂದು ಕಾರವಾರ ಪ್ರವೇಶಿಸಿತ್ತು. ಸುಮಾರು 20 ದಿನಗಳಿಂದ ಕಾರವಾರದ ರಸ್ತೆಗಳಲ್ಲಿ ಅತ್ಯಂತ ನಿಧಾನಗತಿಯಲ್ಲಿ (ಇಂಚಿಂಚಾಗಿ) ಸಾಗುತ್ತಾ ಸಾರ್ವಜನಿಕರಲ್ಲಿ ಭಾರೀ ಕುತೂಹಲ ಮೂಡಿಸಿತ್ತು. ಕೈಗಾ ಅಣು ಸ್ಥಾವರದ 5 ಮತ್ತು 6ನೇ ಘಟಕದ ಸ್ಥಾಪನೆಗಾಗಿ ಈ ಬೃಹತ್ ಯಂತ್ರವನ್ನು ತರಲಾಗುತ್ತಿತ್ತು.

ಕೊನೆ ಕ್ಷಣದಲ್ಲಿ ತಪ್ಪಿದ ಸಮತೋಲನ

ಈ ಮಹಾಕಾಯ ವಾಹನದ ಸಾಗಾಣಿಕೆಗಾಗಿ ರಸ್ತೆಯ ಅಕ್ಕಪಕ್ಕದ ಗಿಡಗಂಟಿಗಳನ್ನು ಕತ್ತರಿಸಿ ವಿಶೇಷ ದಾರಿ ಮಾಡಿಕೊಡಲಾಗಿತ್ತು. ಆದರೆ, ಗುರುವಾರ ಹರ್ಟುಗಾ ಬಳಿಯ ತಿರುವಿನಲ್ಲಿ ಚಲಿಸುವಾಗ ಭಾರೀ ತೂಕದ ಈ ಯಂತ್ರವು ವಾಹನದ ಸಮತೋಲನ ತಪ್ಪಿಸಿದೆ. ಪರಿಣಾಮವಾಗಿ ವಾಹನವು ರಸ್ತೆಯ ಪಕ್ಕಕ್ಕೆ ಉರುಳಿ ಬಿದ್ದಿದೆ. ಪಲ್ಟಿಯಾದ ರಭಸಕ್ಕೆ ರಸ್ತೆಯೂ ಕೂಡ ಜಖಂಗೊಂಡಿದೆ.

ಸ್ಥಳೀಯರ ವ್ಯಂಗ್ಯ - ಸಂಚಾರ ಅಸ್ತವ್ಯಸ್ತ

"ಇಷ್ಟು ದಿನ ರಸ್ತೆಯನ್ನೇ ಅಳತೆ ಮಾಡಿಕೊಂಡು ಬಂದ ಈ ಬಾಹುಬಲಿಗೆ ಕೊನೆಗೂ ದಣಿವಾಗಿ ದಾರಿ ಮಧ್ಯೆಯೇ ಮಲಗಿದಂತಿದೆ" ಎಂದು ಸ್ಥಳೀಯರು ವ್ಯಂಗ್ಯವಾಡುತ್ತಿದ್ದಾರೆ. ಆದರೆ, ಈ ಅಪಘಾತದಿಂದಾಗಿ ಮಲ್ಲಾಪುರ-ಕೈಗಾ ಮಾರ್ಗದಲ್ಲಿ ವಾಹನ ಸಂಚಾರ ಸಂಪೂರ್ಣ ಸ್ಥಗಿತಗೊಂಡಿದ್ದು, ಸಾರ್ವಜನಿಕರು ಪರದಾಡುವಂತಾಗಿದೆ.

ತೆರವು ಕಾರ್ಯಾಚರಣೆ ಎಂಬ ‘ಹಿಮಾಲಯ’ ಸವಾಲು!

ರಸ್ತೆಗೆ ಅಡ್ಡಲಾಗಿ ಬಿದ್ದಿರುವ ಈ ಬೃಹತ್ ಯಂತ್ರವನ್ನು ಮೇಲೆತ್ತುವುದು ಅಧಿಕಾರಿಗಳಿಗೆ ಅಕ್ಷರಶಃ ಹಿಮಾಲಯದ ಸವಾಲಾಗಿ ಪರಿಣಮಿಸಿದೆ. ಸಾಮಾನ್ಯ ಕ್ರೇನ್‌ಗಳಿಂದ ಇದನ್ನು ಅಲುಗಾಡಿಸಲು ಅಸಾಧ್ಯವಾಗಿದ್ದು, ವಿಶೇಷ ಸಾಮರ್ಥ್ಯದ ಕ್ರೇನ್‌ಗಳನ್ನು ಸ್ಥಳಕ್ಕೆ ತರಿಸಲಾಗಿದೆ. ಯಂತ್ರಕ್ಕೆ ಯಾವುದೇ ಹಾನಿಯಾಗದಂತೆ ನಾಜೂಕಾಗಿ ಕಾರ್ಯಾಚರಣೆ ನಡೆಸಬೇಕಿರುವುದರಿಂದ ತೆರವು ಪ್ರಕ್ರಿಯೆ ವಿಳಂಬವಾಗುವ ಸಾಧ್ಯತೆ ಇದೆ.

ಸದ್ಯ ಅಧಿಕಾರಿಗಳು ಮತ್ತು ತಾಂತ್ರಿಕ ಸಿಬ್ಬಂದಿ ಸ್ಥಳದಲ್ಲೇ ಬೀಡುಬಿಟ್ಟಿದ್ದು, ರಸ್ತೆ ಸಂಚಾರ ಸುಗಮಗೊಳಿಸಲು ಹರಸಾಹಸ ಪಡುತ್ತಿದ್ದಾರೆ.