ಐಗೋಡು ರಕ್ಷಿತ ಅರಣ್ಯದಲ್ಲಿ ನಿಗೂಢ ಆಚರಣೆಯ ಶಂಕೆ; ಗುಂಡಿ ತೋಡಿ ವಸ್ತುಗಳನ್ನಿಟ್ಟು ಹೋಗಿರುವುದು ಪತ್ತೆ, ಪೊಲೀಸರಿಂದ ತನಿಖೆ

ಆಪ್ತ ನ್ಯೂಸ್ ಸಿದ್ದಾಪುರ:

ಉತ್ತರ ಕನ್ನಡ ಜಿಲ್ಲೆಯ ಸಿದ್ದಾಪುರ ತಾಲೂಕಿನ ಐಗೋಡು ರಕ್ಷಿತ ಅರಣ್ಯ ಪ್ರದೇಶದಲ್ಲಿ ನಿಗೂಢವಾಗಿ ಗುಂಡಿ ನಿರ್ಮಿಸಿ, ಅದರ ಮೇಲೆ ವಿವಿಧ ವಸ್ತುಗಳನ್ನು ಇಟ್ಟು ಹೋಗಿರುವ ಘಟನೆ ಹಲವು ಅನುಮಾನಗಳಿಗೆ ಕಾರಣವಾಗಿದ್ದು, ಸ್ಥಳೀಯರಲ್ಲಿ ಕುತೂಹಲ ಹಾಗೂ ಆತಂಕ ಮೂಡಿಸಿದೆ.

ಕರ್ತವ್ಯ ನಿಮಿತ್ತ ಅರಣ್ಯ ಪ್ರದೇಶಕ್ಕೆ ತೆರಳಿದ್ದ ಅರಣ್ಯ ಸಿಬ್ಬಂದಿಯ ಕಣ್ಣಿಗೆ ಈ ನಿಗೂಢ ಸ್ಥಳ ಮೊದಲು ಬಿದ್ದಿದೆ. ಸುಮಾರು ನಾಲ್ಕು ಅಡಿ ಅಗಲ ಹಾಗೂ ಮೂರು ಅಡಿ ಆಳದ ಗುಂಡಿ ತೋಡಲಾಗಿದ್ದು, ಬಳಿಕ ಅದನ್ನು ಮಣ್ಣಿನಿಂದ ಮುಚ್ಚಲಾಗಿದೆ. ಗುಂಡಿ ಮುಚ್ಚಿದ ಸ್ಥಳದ ಸಮೀಪ ಮರದ ಮೇಲೆ ಮಡಿಕೆ, ಅಕ್ಕಿ, ಭತ್ತ, ಕಾಯಿ ಹಾಗೂ ಅನ್ನ ಸೇರಿದಂತೆ ಹಲವು ವಸ್ತುಗಳನ್ನು ಇಟ್ಟು ಹೋಗಿರುವುದು ಕಂಡುಬಂದಿದೆ.

ಮೊದಲ ನೋಟದಲ್ಲೇ ಈ ದೃಶ್ಯ ಅರಣ್ಯ ಸಿಬ್ಬಂದಿಯಲ್ಲಿ ಹಲವು ಅನುಮಾನಗಳನ್ನು ಹುಟ್ಟುಹಾಕಿದೆ. ಯಾರೋ ಅರಣ್ಯ ಪ್ರದೇಶದಲ್ಲಿ ಬಲಿ ನೀಡಿ ವಾಮಾಚಾರದಂತಹ ಆಚರಣೆ ನಡೆಸಿ ತೆರಳಿರಬಹುದೇ ಎಂಬ ಶಂಕೆ ವ್ಯಕ್ತಪಡಿಸಿದ ಸಿಬ್ಬಂದಿ, ಕೂಡಲೇ ತಮ್ಮ ಮೇಲಧಿಕಾರಿಗಳಿಗೆ ಮಾಹಿತಿ ನೀಡಿದ್ದಾರೆ.

ಅಂತ್ಯಸಂಸ್ಕಾರ ನಡೆದಿರಬಹುದೇ?

ವಿಷಯ ತಿಳಿದು ಸ್ಥಳಕ್ಕೆ ಆಗಮಿಸಿದ ಅರಣ್ಯಾಧಿಕಾರಿಗಳು, ಗುಂಡಿಯ ಸ್ವರೂಪ ಹಾಗೂ ಅದರ ಸುತ್ತಲಿನ ಪರಿಸ್ಥಿತಿಯನ್ನು ಗಮನಿಸಿ ಮತ್ತಷ್ಟು ಗಂಭೀರ ಅನುಮಾನ ವ್ಯಕ್ತಪಡಿಸಿದ್ದಾರೆ. ಯಾರನ್ನಾದರೂ ಇಲ್ಲಿ ಅಂತ್ಯಸಂಸ್ಕಾರ ಮಾಡಿರಬಹುದೇ? ಅಥವಾ ಯಾವುದಾದರೂ ಅಪರಾಧ ನಡೆದ ಬಳಿಕ ಶವವನ್ನು ಗುಂಡಿಯಲ್ಲಿ ಹೂತು ಮುಚ್ಚಿರಬಹುದೇ? ಎಂಬ ಅನುಮಾನ ಅಧಿಕಾರಿಗಳಲ್ಲಿ ಮೂಡಿದೆ.

ಈ ಹಿನ್ನೆಲೆಯಲ್ಲಿ ಅರಣ್ಯಾಧಿಕಾರಿಗಳು ಸಿದ್ದಾಪುರ ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ. ಸ್ಥಳಕ್ಕೆ ಆಗಮಿಸಿದ ಪೊಲೀಸರು ಅಲ್ಲಿನ ಪರಿಸ್ಥಿತಿಯನ್ನು ಪರಿಶೀಲಿಸಿ, ಸುತ್ತಮುತ್ತಲಿನ ಗ್ರಾಮಸ್ಥರಿಂದ ಮಾಹಿತಿ ಸಂಗ್ರಹಿಸಲು ಮುಂದಾಗಿದ್ದಾರೆ.

ಗ್ರಾಮಸ್ಥರ ವಿಚಾರಣೆಯಿಂದಲೂ ಸಿಗದ ಸುಳಿವು

ಪೊಲೀಸರು ಹಾಗೂ ಅಧಿಕಾರಿಗಳು ಸುತ್ತಮುತ್ತಲಿನ ಗ್ರಾಮಗಳಲ್ಲಿ ವಿಚಾರಣೆ ನಡೆಸಿದಾಗ, ಇತ್ತೀಚೆಗೆ ಯಾರಾದರೂ ನಾಪತ್ತೆಯಾಗಿರುವ ಅಥವಾ ಮೃತಪಟ್ಟಿರುವ ಬಗ್ಗೆ ಯಾವುದೇ ಮಾಹಿತಿ ಲಭ್ಯವಾಗಿಲ್ಲ ಎನ್ನಲಾಗಿದೆ.

ಇದರೊಂದಿಗೆ ಮತ್ತೊಂದು ಸಾಧ್ಯತೆಯನ್ನೂ ಪೊಲೀಸರು ಪರಿಶೀಲಿಸಿದ್ದಾರೆ. ಮನೆಗಳಲ್ಲಿ ಸಾಕುತ್ತಿದ್ದ ಜಾನುವಾರುಗಳಲ್ಲಿ ಯಾವುದಾದರೂ ಮೃತಪಟ್ಟಿದ್ದರೆ, ಅದನ್ನು ಅರಣ್ಯ ಪ್ರದೇಶಕ್ಕೆ ತಂದು ಹೂತು ಹೋಗಿರಬಹುದೇ ಎಂಬ ಅನುಮಾನವೂ ಮೂಡಿದ್ದು, ಈ ನಿಟ್ಟಿನಲ್ಲಿಯೂ ಸ್ಥಳೀಯರನ್ನು ವಿಚಾರಿಸಲಾಗಿದೆ.

ಇಷ್ಟೇ ಅಲ್ಲದೆ, ಸ್ಥಳದಲ್ಲಿ ಕಂಡುಬಂದಿರುವ ಮಡಿಕೆ ಹಾಗೂ ಇತರ ವಸ್ತುಗಳ ಮಾದರಿಯನ್ನು ಆಧರಿಸಿ, ಇಂತಹ ಮಡಿಕೆಗಳನ್ನು ಯಾರು ಮಾರಾಟ ಮಾಡುತ್ತಾರೆ ಎಂಬುದರ ಬಗ್ಗೆಯೂ ಮಾಹಿತಿ ಕಲೆಹಾಕಲಾಗಿದೆ. ಆದರೆ, ರಕ್ಷಿತ ಅರಣ್ಯ ಪ್ರದೇಶದಲ್ಲಿಯೇ ಈ ರೀತಿಯಾಗಿ ಗುಂಡಿ ನಿರ್ಮಿಸಿ ವಸ್ತುಗಳನ್ನು ಇಟ್ಟು ಹೋಗಿರುವುದಕ್ಕೆ ನಿಖರ ಕಾರಣವೇನು ಎಂಬುದು ಇನ್ನೂ ಪತ್ತೆಯಾಗಿಲ್ಲ.

ಅಮಾವಾಸ್ಯೆಯಂದು ನಡೆದ ಆಚರಣೆಯೇ?

ಸ್ಥಳೀಯರಿಂದ ಲಭ್ಯವಾದ ಮಾಹಿತಿಯ ಪ್ರಕಾರ, ಅಮಾವಾಸ್ಯೆಯ ದಿನ ಯಾರೋ ಈ ವಸ್ತುಗಳನ್ನು ತಂದು ಸ್ಥಳದಲ್ಲಿ ಇಟ್ಟು ಹೋಗಿರಬಹುದು ಎಂಬ ಅನುಮಾನ ವ್ಯಕ್ತವಾಗಿದೆ. ಹೀಗಾಗಿ ಇದು ಯಾವುದಾದರೂ ಧಾರ್ಮಿಕ ಆಚರಣೆಯ ಭಾಗವೇ, ವಾಮಾಚಾರಕ್ಕೆ ಸಂಬಂಧಿಸಿದ ಚಟುವಟಿಕೆಯೇ ಅಥವಾ ಬೇರೆ ಯಾವುದೇ ಉದ್ದೇಶದಿಂದ ಮಾಡಿರುವ ಕೃತ್ಯವೇ ಎಂಬ ಪ್ರಶ್ನೆ ಇದೀಗ ಎದುರಾಗಿದೆ.

ಪ್ರಾಣಿ ಬಲಿ ನೀಡಿರುವ ಸಾಧ್ಯತೆಯನ್ನೂ ಅಧಿಕಾರಿಗಳು ತಳ್ಳಿಹಾಕಿಲ್ಲ. ಅದೇ ರೀತಿ, ಗುಂಡಿಯೊಳಗೆ ಏನಾದರೂ ಹೂತು ಮುಚ್ಚಲಾಗಿದೆಯೇ ಎಂಬ ಅನುಮಾನವೂ ಮುಂದುವರಿದಿದೆ. ಆದರೆ, ಗುಂಡಿ ತೆರೆಯುವವರೆಗೂ ವಾಸ್ತವಾಂಶ ಏನು ಎಂಬುದು ಸ್ಪಷ್ಟವಾಗುವುದಿಲ್ಲ.

ತಹಶೀಲ್ದಾರ್ ನೇತೃತ್ವದಲ್ಲಿ ಗುಂಡಿ ತೆರೆಯಲು ಸಿದ್ಧತೆ

ಪ್ರಕರಣದ ಗಂಭೀರತೆಯನ್ನು ಪರಿಗಣಿಸಿರುವ ಪೊಲೀಸರು ಹಾಗೂ ಅಧಿಕಾರಿಗಳು, ಮುಚ್ಚಿರುವ ಗುಂಡಿಯನ್ನು ಪರಿಶೀಲಿಸಲು ಮುಂದಾಗಿದ್ದಾರೆ. ತಹಶೀಲ್ದಾರ್ ಮಂಜುಳಾ ನಾಯ್ಕ ಅವರ ನೇತೃತ್ವದಲ್ಲಿ ಗುಂಡಿಯನ್ನು ಅಗೆದು ಪರಿಶೀಲಿಸಲು ಸಿದ್ಧತೆ ನಡೆಸಲಾಗಿದೆ.

ಗುಂಡಿ ತೆರೆದ ಬಳಿಕ ಅದರೊಳಗೆ ಏನಾದರೂ ವಸ್ತು ಅಥವಾ ಪ್ರಾಣಿಯ ಅವಶೇಷಗಳು ಪತ್ತೆಯಾಗುತ್ತವೆಯೇ? ಅಥವಾ ಕೇವಲ ಆಚರಣೆಯೊಂದರ ಭಾಗವಾಗಿ ಗುಂಡಿ ನಿರ್ಮಿಸಿ ಮಣ್ಣಿನಿಂದ ಮುಚ್ಚಲಾಗಿದೆಯೇ? ಎಂಬುದಕ್ಕೆ ಉತ್ತರ ಸಿಗುವ ನಿರೀಕ್ಷೆಯಿದೆ.

ಸದ್ಯ ಐಗೋಡು ರಕ್ಷಿತ ಅರಣ್ಯದಲ್ಲಿ ಪತ್ತೆಯಾಗಿರುವ ಈ ನಿಗೂಢ ಸ್ಥಳದ ಸುತ್ತ ಹಲವು ಪ್ರಶ್ನೆಗಳು ಮೂಡಿದ್ದು, ಪೊಲೀಸರ ಪರಿಶೀಲನೆ ಹಾಗೂ ಗುಂಡಿ ತೆರೆಯುವ ಕಾರ್ಯದ ಬಳಿಕವಷ್ಟೇ ಪ್ರಕರಣದ ಸತ್ಯಾಸತ್ಯತೆ ಹೊರಬರಲಿದೆ.