ಜಿಲ್ಲೆಯ ಹಿತರಕ್ಷಣೆಯೇ ನಮಗೆ ಪರಮೋಚ್ಚ: ನದಿ ಜೋಡಣೆ‌ ಅನುಷ್ಠಾ ನಗೊಳಿಸಲು ಬಿಡುವುದಿಲ್ಲ ಎಂದ ಮಂಕಾಳ ವೈದ್ಯ!

ಆಪ್ತ ನ್ಯೂಸ್ ಶಿರಸಿ:

ಉತ್ತರ ಕನ್ನಡ ಜಿಲ್ಲೆಯ ಪರಿಸರ ಮತ್ತು ಜನರ ಭಾವನೆಗಳಿಗೆ ಧಕ್ಕೆ ತರುವ ಯಾವುದೇ ಯೋಜನೆಗಳನ್ನು ರಾಜ್ಯ ಸರ್ಕಾರ ಬೆಂಬಲಿಸುವುದಿಲ್ಲ. ಶರಾವತಿ ಪಂಪ್ಡ್ ಸ್ಟೋರೇಜ್ ಹಾಗೂ ಬೇಡ್ತಿ-ಅಘನಾಶಿನಿ ನದಿ ಜೋಡಣೆ ಯೋಜನೆಗಳು ಯಾವುದೇ ಕಾರಣಕ್ಕೂ ಅನುಷ್ಠಾನಗೊಳ್ಳಲು ಬಿಡುವುದಿಲ್ಲ ಎಂದು ಜಿಲ್ಲಾ ಉಸ್ತುವಾರಿ ಸಚಿವ ಮಂಕಾಳ ವೈದ್ಯ ಅವರು ದೃಢವಾಗಿ ಸಾರಿದ್ದಾರೆ.

ಶಿರಸಿಯ ಪ್ರವಾಸಿ ಮಂದಿರದಲ್ಲಿ ನಡೆದ ಮಾಧ್ಯಮಗೋಷ್ಠಿಯಲ್ಲಿ ಮಾತನಾಡಿದ ಅವರು, ಜಿಲ್ಲೆಯ ಜ್ವಲಂತ ಸಮಸ್ಯೆಗಳು ಹಾಗೂ ರಾಷ್ಟ್ರೀಯ ಹೆದ್ದಾರಿಯ ಅವ್ಯವಸ್ಥೆಯ ಕುರಿತು ಕೇಂದ್ರ ಸರ್ಕಾರದ ವಿರುದ್ಧ ವಾಗ್ದಾಳಿ ನಡೆಸಿದರು.

೧. ನದಿ ಜೋಡಣೆ ಯೋಜನೆಗೆ ಸಚಿವರ ಕಠಿಣ ವಿರೋಧ

ಹಿಂದಿನ ಬಿಜೆಪಿ ಸರ್ಕಾರ ಪ್ರಸ್ತಾಪಿಸಿದ್ದ ನದಿ ಜೋಡಣೆ ಯೋಜನೆಗೆ ಸ್ವರ್ಣವಲ್ಲೀ ಶ್ರೀಗಳು ಸೇರಿದಂತೆ ಜಿಲ್ಲೆಯ ಜನರು ವಿರೋಧ ವ್ಯಕ್ತಪಡಿಸಿದ್ದಾರೆ. ಈ ಕುರಿತು ಮಾತನಾಡಿದ ಸಚಿವರು:

• ಶ್ರೀಗಳ ಮಾರ್ಗದರ್ಶನ: "ಸ್ವರ್ಣವಲ್ಲೀ ಶ್ರೀಗಳ ನಿರ್ಧಾರಕ್ಕೆ ನಮ್ಮ ಸಂಪೂರ್ಣ ಬೆಂಬಲವಿದೆ. ನಾವೆಲ್ಲರೂ ಅವರ ಮಾರ್ಗದರ್ಶನದಲ್ಲೇ ನಡೆಯುತ್ತಿದ್ದೇವೆ."

• ಕೇಂದ್ರದ ಪಾತ್ರ: "ಇದು ಶೇ. 90ರಷ್ಟು ಕೇಂದ್ರದ ಯೋಜನೆಯಾಗಿದೆ. ನಮ್ಮ ಜಿಲ್ಲೆಯ ಸಂಸದರು ಇದರ ವಿರುದ್ಧ ದನಿ ಎತ್ತಿ, ಯೋಜನೆ ತಡೆಯುತ್ತಾರೆ ಎಂಬ ವಿಶ್ವಾಸ ನಮಗಿದೆ."

೨. ಹೆದ್ದಾರಿ ಅವ್ಯವಸ್ಥೆ: ಐಆರ್‌ಬಿ ಕಂಪೆನಿ ಹಾಗೂ ಸಂಸದರ ವಿರುದ್ಧ ಕಿಡಿ

2011ರಿಂದ ನಡೆಯುತ್ತಿರುವ ಚತುಷ್ಪಥ ಹೆದ್ದಾರಿ ಕಾಮಗಾರಿ 15 ವರ್ಷ ಕಳೆದರೂ ಮುಗಿಯದಿರುವ ಬಗ್ಗೆ ಸಚಿವರು ಆಕ್ರೋಶ ವ್ಯಕ್ತಪಡಿಸಿದರು.

"ಇಲ್ಲಿನ ರಾಜಕಾರಣಿಗಳು ಐಆರ್‌ಬಿ ಕಂಪೆನಿಗೆ ಮಾರಾಟವಾಗಿದ್ದಾರೆಯೇ? ವ್ಯವಸ್ಥೆ ಸರಿಪಡಿಸುವ ಬಗ್ಗೆ ಯಾಕೆ ಇವರು ಮಾತನಾಡುತ್ತಿಲ್ಲ? ಮಾಜಿ ಮತ್ತು ಹಾಲಿ ಸಂಸದರನ್ನು ಜನತೆ ಈ ಬಗ್ಗೆ ಪ್ರಶ್ನಿಸಬೇಕಿದೆ," ಎಂದು ಕಟುವಾಗಿ ಟೀಕಿಸಿದರು.

• ಶಿರಸಿ-ಹಾವೇರಿ ರಸ್ತೆ: ರಸ್ತೆ ಕಾಮಗಾರಿ ಮಾಡಲಾಗದಿದ್ದರೆ ಅದನ್ನು ರಾಜ್ಯ ಸರ್ಕಾರಕ್ಕೆ ಹಸ್ತಾಂತರಿಸಿ ಎಂದು ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರಕ್ಕೆ ಸೂಚಿಸಲಾಗಿದೆ.

• ಸಂಸದರಿಗೆ ಸಲಹೆ: ಆರು ಬಾರಿ ಶಾಸಕರಾಗಿ ಆಯ್ಕೆಯಾದ, ಜನತೆ ಮನೆಯಲ್ಲಿ ಕುಳಿತರೂ ಗೆಲ್ಲಿಸಿದ ಸಂಸದರು ರಸ್ತೆ ಕೆಲಸ ಮುಗಿಸಲು ಒತ್ತಡ ಹೇರಬೇಕೆಂದು ಮಂಕಾಳ ವೈದ್ಯ ಆಗ್ರಹಿಸಿದರು.

೩. ಕುಡಿಯುವ ನೀರು ಮತ್ತು ಮೇವು: ಜಿಲ್ಲಾಡಳಿತ ಸನ್ನದ್ಧ

ಮುಂದಿನ ದಿನಗಳಲ್ಲಿ ನೀರಿನ ಅಭಾವ ಉಂಟಾಗದಂತೆ ಸರ್ಕಾರ ಈಗಾಗಲೇ ಮುನ್ನೆಚ್ಚರಿಕೆ ಕ್ರಮ ಕೈಗೊಂಡಿದೆ.

• ಅನುದಾನ ಬಿಡುಗಡೆ: ಪ್ರತಿ ತಾಲೂಕಿಗೆ 25 ರಿಂದ 50 ಲಕ್ಷ ರೂ. ಅನುದಾನವನ್ನು ತಹಸೀಲ್ದಾರ್ ಖಾತೆಗೆ ಜಮಾ ಮಾಡಲಾಗಿದೆ.

• ಟ್ಯಾಂಕರ್ ವ್ಯವಸ್ಥೆ: ಒಂದು ಮನೆ ಇದ್ದರೂ ಅಲ್ಲಿಗೆ ಕುಡಿಯುವ ನೀರು ಪೂರೈಸಲು ಸೂಚನೆ ನೀಡಲಾಗಿದೆ.

• ಮೇವು ಲಭ್ಯತೆ: ಜಾನುವಾರುಗಳಿಗೆ ಮೇವಿನ ಕೊರತೆಯಾಗದಂತೆ ಕ್ರಮ ವಹಿಸಲಾಗಿದ್ದು, ಜಿಲ್ಲೆಯ ಎಲ್ಲ ಶಾಸಕರು ಟಾಸ್ಕ್‌ಪೋರ್ಸ್‌ ಸಭೆಗಳನ್ನು ನಡೆಸಿದ್ದಾರೆ.

೪. ಬೆಟ್ಟ ಮತ್ತು ಹಾಡಿ ಭೂಮಿ ಸಮಸ್ಯೆ

ಮಲೆನಾಡು ಮತ್ತು ಕರಾವಳಿಯ ಜಮೀನುಗಳ ಹಕ್ಕಿನ ಕುರಿತು ಚರ್ಚಿಸಿದ ಸಚಿವರು:

• ಹಾಡಿ ಮತ್ತು ಬೆಟ್ಟ ಭೂಮಿ ಅರಣ್ಯ ಇಲಾಖೆಗೆ ಸೇರಿದ್ದಲ್ಲ, ಅವು ಕಂದಾಯ ಭೂಮಿ ವ್ಯಾಪ್ತಿಗೆ ಬರುತ್ತವೆ.

• ಶಿರಸಿ ಭಾಗದ 'ಬ' ಖರಾಬ್ ಬೆಟ್ಟ ಭೂಮಿಯ ಸಮಸ್ಯೆ ಕುರಿತು ಶಾಸಕ ಭೀಮಣ್ಣ ನಾಯ್ಕ ಅವರು ಅಧಿವೇಶನದಲ್ಲಿ ಧ್ವನಿ ಎತ್ತಿದ್ದಾರೆ. ಈ ಸಮಸ್ಯೆಯನ್ನು ಶೀಘ್ರವೇ ಬಗೆಹರಿಸಲು ಪ್ರಾಮಾಣಿಕ ಪ್ರಯತ್ನ ಮಾಡಲಾಗುವುದು ಎಂದರು.

ಈ ಸಂದರ್ಭದಲ್ಲಿ ಜಿಲ್ಲಾ ಗ್ಯಾರೆಂಟಿ ಯೋಜನಾ ಪ್ರಾಧಿಕಾರದ ಅಧ್ಯಕ್ಷರಾದ ಸತೀಶ ನಾಯ್ಕ ಹಾಗೂ ಇತರ ಪ್ರಮುಖ ಮುಖಂಡರು ಉಪಸ್ಥಿತರಿದ್ದರು.