ಪ್ರೀತಿ ಅಂದ ಮೇಲೆ 'ಟ್ಯಾಟೂ' ಹಾಕಿಸ್ಕೊಂಡ, ಬ್ರೇಕಪ್ ಆದ್ಮೇಲೆ ಹಣ ಕೊಡು ಅಂತ ಪೀಡಿಸಿದ!

ಆಪ್ತ ನ್ಯೂಸ್ ಶಿರಸಿ:

ಪ್ರೀತಿ ಎಂಬುದು ಸುಂದರ ಅನುಭವ ಅಂದುಕೊಂಡಿದ್ದ ಆ ಯುವತಿಗೆ, ಆಕೆಯ ಪ್ರಿಯಕರನೇ ಈಗ ಕಂಟಕನಾಗಿದ್ದಾನೆ. ಪ್ರೀತಿಯ ಸಂಕೇತವಾಗಿ ಕೈಮೇಲೆ ಹಾಕಿಸಿಕೊಂಡಿದ್ದ ಟ್ಯಾಟೂ ತೆಗೆಸಲು ಹಣ ಕೇಳಿ ಕಿರುಕುಳ ನೀಡಿದ ಯುವಕನ ವಿರುದ್ಧ ಈಗ ಪೊಲೀಸ್ ಕೇಸ್ ದಾಖಲಾಗಿದೆ.

ಘಟನೆಯ ಹಿನ್ನೆಲೆ:

ಶಿರಸಿಯ ಸರ್ಕಾರಿ ಪ್ರಥಮ ದರ್ಜೆ ಕಾಲೇಜಿನ ಪ್ರಥಮ ವರ್ಷದ ವಿದ್ಯಾರ್ಥಿನಿ ನಾಗಸಿರಿ ಮರಾಠಿ ಹಾಗೂ ಅದೇ ಕಾಲೇಜಿನ ವಿದ್ಯಾರ್ಥಿ ಗಣೇಶ ಮಂಜುನಾಥ ಆಚಾರಿ (21) ಕಳೆದ ಎಂಟು ತಿಂಗಳಿನಿಂದ ಪ್ರೀತಿಸುತ್ತಿದ್ದರು. ಇವರ ಪ್ರೀತಿ ಎಷ್ಟು ಗಾಢವಾಗಿತ್ತೆಂದರೆ, ಗಣೇಶ ತನ್ನ ಕೈಮೇಲೆ ಪ್ರೀತಿಯ ಸಂಕೇತವಾಗಿ ಹೃದಯಾಕಾರದ ಟ್ಯಾಟೂ ಹಾಕಿಸಿಕೊಂಡಿದ್ದ.

ಸಂಬಂಧದಲ್ಲಿ ಬಿರುಕು ಮೂಡಿದ್ದು ಏಕೆ?

ನಾಲ್ಕು ತಿಂಗಳ ನಂತರ ಇಬ್ಬರ ನಡುವೆ ಭಿನ್ನಾಭಿಪ್ರಾಯ ಶುರುವಾಗಿದೆ. "ಬೇರೆ ಹುಡುಗರ ಜೊತೆ ಮಾತನಾಡಬಾರದು" ಎಂದು ಗಣೇಶ ನಿರ್ಬಂಧ ಹೇರಿದ್ದ. ಆದರೆ ಎಲ್ಲರೊಂದಿಗೆ ಸ್ನೇಹದಿಂದ ಇರುತ್ತಿದ್ದ ನಾಗಸಿರಿ ಈ ಮಾತಿಗೆ ಅಷ್ಟಾಗಿ ತಲೆಕೆಡಿಸಿಕೊಂಡಿರಲಿಲ್ಲ. ತನ್ನ ಮಾತನ್ನು ಕೇಳುತ್ತಿಲ್ಲ ಎಂಬ ಕಾರಣಕ್ಕೆ ಗಣೇಶ ಯುವತಿಯ ಮೇಲೆ ಸಂಶಯ ಪಡಲು ಶುರುಮಾಡಿದ್ದ. ಇದರಿಂದ ಬೇಸತ್ತ ನಾಗಸಿರಿ ಆತನಿಂದ ಅಂತರ ಕಾಯ್ದುಕೊಳ್ಳಲು ನಿರ್ಧರಿಸಿದ್ದಳು.

ಟ್ಯಾಟೂ ಸುತ್ತ ನಡೆದ ಹೈಡ್ರಾಮಾ:

ಪ್ರಿಯತಮೆ ದೂರವಾಗುತ್ತಿದ್ದಂತೆ ರೊಚ್ಚಿಗೆದ್ದ ಗಣೇಶ ವಿಚಿತ್ರ ಬೇಡಿಕೆಯಿಟ್ಟಿದ್ದಾನೆ. ಪ್ರೀತಿಯಿದ್ದಾಗ ಹಾಕಿಸಿಕೊಂಡಿದ್ದ ಟ್ಯಾಟೂವನ್ನು ಈಗ ತೆಗೆಸಬೇಕೆಂದು ನಿರ್ಧರಿಸಿದ ಆತ, ಅದಕ್ಕೆ ತಗಲುವ 16 ಸಾವಿರ ರೂಪಾಯಿಗಳನ್ನು ನಾಗಸಿರಿಯೇ ನೀಡಬೇಕೆಂದು ಪಟ್ಟು ಹಿಡಿದಿದ್ದಾನೆ.

"ನನ್ನ ಬಳಿ ಅಷ್ಟು ಹಣವಿಲ್ಲ" ಎಂದು ಯುವತಿ ಹೇಳಿದ್ದಕ್ಕೆ ಆಕೆಗೆ ಕೆನ್ನೆಗೆ ಬಾರಿಸಿ (ಕಪಾಳಮೋಕ್ಷ) ದರ್ಪ ಮೆರೆದಿದ್ದಾನೆ.

ಪೊಲೀಸ್ ಮೆಟ್ಟಿಲೇರಿದ ವಿವಾದ:

ಪ್ರಿಯಕರನ ಕಿರುಕುಳ ಮತ್ತು ಹಲ್ಲೆಯಿಂದ ಬೇಸತ್ತ ನಾಗಸಿರಿ ಈಗ ಶಿರಸಿ ಗ್ರಾಮೀಣ ಪೊಲೀಸ್ ಠಾಣೆಯ ಮೆಟ್ಟಿಲೇರಿದ್ದಾಳೆ. ಪ್ರೀತಿಯ ಹೆಸರಿನಲ್ಲಿ ಕಿರುಕುಳ ನೀಡಿದ ಗಣೇಶನ ವಿರುದ್ಧ ಪ್ರಕರಣ ದಾಖಲಾಗಿದ್ದು, ಪೊಲೀಸರು ಮುಂದಿನ ಕ್ರಮ ಕೈಗೊಂಡಿದ್ದಾರೆ.