ರಾಷ್ಟ್ರೀಯ ಹೆದ್ದಾರಿ ಕಾಮಗಾರಿಗಳ ಗಡುವುಗಳು — ಎಷ್ಟು ವಿಶ್ವಾಸಾರ್ಹ?

~ಡಾ. ರವಿಕಿರಣ ಪಟವರ್ಧನ

*****

766E ರಾಷ್ಟ್ರೀಯ ಹೆದ್ದಾರಿ ಕಾಮಗಾರಿಯು ತ್ವರಿತಗತಿಯಲ್ಲಿ ಪೂರ್ಣಗೊಳ್ಳಬೇಕು ಎಂಬ ಉದ್ದೇಶದಿಂದ ಕಳೆದ ಮೂರು–ನಾಲ್ಕು ವರ್ಷಗಳಿಂದ ನಿರಂತರ ಪತ್ರ ಚಳುವಳಿ ನಡೆಯುತ್ತಿದೆ. ರಾಷ್ಟ್ರೀಯ ಹೆದ್ದಾರಿ ಅಭಿವೃದ್ಧಿ ಪ್ರಾಧಿಕಾರ (NHAI), ಕೇಂದ್ರ ಹೆದ್ದಾರಿ ಸಚಿವಾಲಯ, ಪ್ರಧಾನಮಂತ್ರಿಗಳ ಕಾರ್ಯಾಲಯ, ಕೇಂದ್ರೀಯ ಸತರ್ಕತಾ ಆಯೋಗ (CVC) ಮತ್ತು ಮಹಾಲೇಖಪಾಲರ ಕಚೇರಿ (CAG) — ಹೀಗೆ ಅನೇಕ ಸಂಸ್ಥೆಗಳಿಗೆ ಪತ್ರಗಳನ್ನು ಕಳುಹಿಸಲಾಗಿದೆ. ಪ್ರತಿ ಪತ್ರಕ್ಕೂ ಉತ್ತರ ಬಂದಿದೆ, ದೂರವಾಣಿ ಕರೆಗಳೂ ಬಂದಿವೆ. ಆದರೆ ವಾಸ್ತವದಲ್ಲಿ ಆರು ವರ್ಷಗಳು ಕಳೆದರೂ ಕಾಮಗಾರಿ ಇನ್ನೂ ಪೂರ್ಣಗೊಂಡಿಲ್ಲ. ಇದೇ ಜನರ ವಿಶ್ವಾಸ ಕುಸಿಯಲು ಪ್ರಮುಖ ಕಾರಣವಾಗಿದೆ.
ಇಲ್ಲಿ ಮೂಲ ಸಮಸ್ಯೆ ಏನೆಂದರೆ — ಉತ್ತರಗಳು ಬರುತ್ತಿವೆ, ಆದರೆ ಕೆಲಸ ಮಾತ್ರ ಗಡುವಿನೊಳಗೆ ಮುಗಿಯುತ್ತಿಲ್ಲ. ಪ್ರತಿ ಬಾರಿ ಹೊಸ ದಿನಾಂಕ, ಹೊಸ ಭರವಸೆ, ಹೊಸ ಸ್ಪಷ್ಟೀಕರಣ — ಆದರೆ ರಸ್ತೆ ಕಾಮಗಾರಿ ಇನ್ನೂ ಮುಂದುವರಿಯುತ್ತಲೇ ಇದೆ.

ಇನ್ನೂ ಆಶ್ಚರ್ಯಕರ ಸಂಗತಿ ಎಂದರೆ, ಒಮ್ಮೆ ಅಧಿಕಾರಿಗಳು "ಶ್ರದ್ಧಾಂಜಲಿ ಬಿತ್ತಿಪತ್ರ ತೆಗೆಯಿರಿ" ಎಂದು ಹೇಳಿದ ಘಟನೆ ನಡೆಯಿತು. ಇದು ಸಾರ್ವಜನಿಕರ ನೋವು ಮತ್ತು ಆಕ್ರೋಶ ಎಷ್ಟು ತೀವ್ರವಾಗಿದೆ ಎಂಬುದನ್ನು ಸ್ಪಷ್ಟಪಡಿಸುತ್ತದೆ. ರಸ್ತೆ ಕಾಮಗಾರಿ ವಿಳಂಬ ಎಂದರೆ ಕೇವಲ ಅಭಿವೃದ್ಧಿ ವಿಳಂಬವಲ್ಲ — ಅದು ಅಪಘಾತ, ಜೀವಹಾನಿ ಮತ್ತು ಜನರ ದೈನಂದಿನ ಸಂಕಷ್ಟಗಳ ಪ್ರಶ್ನೆಯಾಗಿದೆ.
ಕೇಂದ್ರೀಯ ಸತರ್ಕತಾ ಆಯೋಗಕ್ಕೆ ಮೂರನೇ ಬಾರಿ ಪತ್ರ ಬರೆದ ನಂತರ NHAI ಯಿಂದ ದಿನಗಣನೆಯ ಕಾಮಗಾರಿಯ ವಿವರಗಳೊಂದಿಗೆ ಲಿಖಿತ ಉತ್ತರ ಬಂದಿತು. ವಿಳಂಬಕ್ಕೆ ಕಾರಣಗಳನ್ನು ನಮೂದಿಸಿ ಉತ್ತರ ನೀಡಲಾಗಿತ್ತು. ಆದರೆ ಅದಕ್ಕಿಂತಲೂ ಗಂಭೀರವಾದ ಸಂಗತಿ ನಂತರ ನಡೆಯಿತು. ತಾನು NHAI ಅಧಿಕಾರಿ ಎಂದು ಹೇಳಿಕೊಂಡ ಒಬ್ಬರು ದೂರವಾಣಿ ಕರೆ ಮಾಡಿ, "ನಮ್ಮ ಪ್ರಾದೇಶಿಕ ಕಚೇರಿಯಿಂದ ಕೇಳಿದ್ದಾರೆ — ನಿಮ್ಮ ಇಚ್ಛೆ ಏನು?" ಎಂದು ಪ್ರಶ್ನಿಸಿದರು.

ಮೂರು ವರ್ಷಗಳಿಂದ ಸಾರ್ವಜನಿಕ ಹಿತಕ್ಕಾಗಿ ಪತ್ರ ಬರೆಯುತ್ತಿರುವ ನಾಗರಿಕನಿಗೆ "ನಿಮ್ಮ ಇಚ್ಛೆ ಏನು?" ಎಂದು ಕೇಳುವುದು — ಇದು NHAI ಆಡಳಿತ ವ್ಯವಸ್ಥೆಯ ನೈತಿಕ ಕುಸಿತದ ಪ್ರತಿಬಿಂಬವಾಗಿದೆ. ಸಾರ್ವಜನಿಕರ ಇಚ್ಛೆ ಒಂದೇ — ರಸ್ತೆ ಬೇಗ ಪೂರ್ಣಗೊಳ್ಳಬೇಕು. ಇದರಲ್ಲಿ ಯಾವುದೇ ವೈಯಕ್ತಿಕ ಲಾಭದ ಪ್ರಶ್ನೆ ಇಲ್ಲ.
ಆ ಅಧಿಕಾರಿ ತಮ್ಮ ಅಧಿಕೃತ ದೂರವಾಣಿಯಿಂದ ಕರೆ ಮಾಡಿರಲಿಲ್ಲ ಎನ್ನುವುದು ಗಮನಾರ್ಹ. ಪದೇ ಪದೇ ಪತ್ರ ಬರೆಯುತ್ತಿರುವುದರಿಂದ "ನಿಮ್ಮ ಇಚ್ಛೆ ಏನು?" ಎಂದು ಪ್ರಶ್ನಿಸುವ ಪರಿಸ್ಥಿತಿ ಬಂದಿರುವುದು ಆಡಳಿತದ ಮನೋಭಾವವನ್ನು ಸ್ಪಷ್ಟಪಡಿಸುತ್ತದೆ. ಆದ್ದರಿಂದಲೇ NHAI ಅನ್ನು ವಿಸರ್ಜಿಸಬೇಕು ಎಂದು ಪ್ರಧಾನಮಂತ್ರಿ ಕಾರ್ಯಾಲಯ, ಕೇಂದ್ರೀಯ ಸತರ್ಕತಾ ಆಯೋಗ ಮತ್ತು CAG ಗೆ ಈಗಾಗಲೇ ಪತ್ರ ಬರೆದಿದ್ದೇನೆ.
ಈ ಎಲ್ಲ ಅನುಭವಗಳಿಂದ ಒಂದು ದೊಡ್ಡ ವ್ಯವಸ್ಥಾತ್ಮಕ ದೋಷ ಹೊರಬರುತ್ತದೆ. ಪ್ರಧಾನಮಂತ್ರಿಗಳ ಕಾರ್ಯಾಲಯ ಅಥವಾ ಕೇಂದ್ರ ಸಚಿವಾಲಯಗಳಿಗೆ ಕಳುಹಿಸುವ ದೂರುಗಳು ಕೊನೆಗೆ ಮತ್ತೆ ಅದೇ ಜಿಲ್ಲೆಯ ಅಥವಾ ಪ್ರಾದೇಶಿಕ ಅಧಿಕಾರಿಗಳಿಗೇ ಫಾರ್ವರ್ಡ್ ಆಗುತ್ತವೆ. ಅವರು ಕೊಡುವ ಉತ್ತರವೇ ಅಂತಿಮ ಉತ್ತರವಾಗುತ್ತದೆ. ಆ ಉತ್ತರ ಸತ್ಯವೇ? ಕಾಮಗಾರಿ ನಿಜವಾಗಿಯೂ ಪ್ರಗತಿಯಲ್ಲಿದೆಯೇ? ಗಡುವು ಪಾಲನೆಯಾಗುತ್ತಿದೆಯೇ? — ಎಂಬುದರ ಸ್ವತಂತ್ರ ಪರಿಶೀಲನೆ ನಡೆಯುವುದೇ ಇಲ್ಲ. ಇದೇ ಸಮಸ್ಯೆಯ ಮೂಲ.

ಆದ್ದರಿಂದ ಮುಂದಿನ ದಿನಗಳಲ್ಲಿ ಕೇಂದ್ರ ಹಾಗೂ ರಾಜ್ಯ ಸರ್ಕಾರಗಳು ದೊಡ್ಡ ಯೋಜನೆಗಳನ್ನು ಘೋಷಿಸುವ ಮೊದಲು ಅತ್ಯಂತ ಗಂಭೀರವಾಗಿ ಪೂರ್ವ ಸಿದ್ಧತೆ ಮಾಡಿಕೊಳ್ಳಬೇಕು. ಭೂಸ್ವಾಧೀನ, ಪರಿಹಾರ, ಪರಿಸರ ಮತ್ತು ಆಡಳಿತಾತ್ಮಕ ಅನುಮತಿಗಳನ್ನು ಪೂರ್ಣಗೊಳಿಸಿದ ನಂತರವೇ ಕಾಮಗಾರಿಗೆ ಚಾಲನೆ ನೀಡಬೇಕು — ಅಡಿಗಲ್ಲು ಮತ್ತು ಭೂಮಿ ಪೂಜೆ ಆ ನಂತರವೇ ಆಗಬೇಕು. ಇಲ್ಲವಾದರೆ ಯೋಜನೆಗಳು ವರ್ಷಗಟ್ಟಲೆ ಎಳೆಯುತ್ತವೆ, ಸಾರ್ವಜನಿಕರ ವಿಶ್ವಾಸ ಕುಸಿಯುತ್ತದೆ ಮತ್ತು ಸರ್ಕಾರದ ವಿಶ್ವಾಸಾರ್ಹತೆಗೆ ಧಕ್ಕೆಯಾಗುತ್ತದೆ.
ಸಾರ್ವಜನಿಕರು ಪ್ರಶ್ನಿಸುವುದು ಅಭಿವೃದ್ಧಿಗೆ ವಿರೋಧವಲ್ಲ — ಅಭಿವೃದ್ಧಿ ಸಮಯಕ್ಕೆ ಆಗಬೇಕು ಎಂಬ ಒತ್ತಾಯ ಮಾತ್ರ.

ಈ ಎಲ್ಲ ಪತ್ರ ವ್ಯವಹಾರಗಳ ನಡುವೆ ಅಕ್ಕಿಆಲೂರು, ಹಾನಗಲ್,ನಾಲ್ಕಾರ ಕತ್ರಿ,ಹಾವೇರಿ,ಶಿರಸಿಯ ಹಲವು ನಾಗರಿಕರು ನನ್ನ ಸುರಕ್ಷತೆಯ ಬಗ್ಗೆ ವಿಶೇಷ ಕಾಳಜಿ ವಹಿಸಿ, ವೈಯಕ್ತಿಕ ಉಸ್ತುವಾರಿ ಮಾಡಿದ್ದಾರೆ . ಇನ್ನು ಪೋಲಿಸ್ ಅಧಿಕಾರಿಗಳು, ಸಿಬ್ಬಂದಿ, ಯೋಧರು,ನಿವೃತ್ತ ಯೋಧರು,ಅರೆಸೇನಾ ಪಡೆಯ
ಯೋಧರು ನನ್ನ ಸುರಕ್ಷತೆಯ ಕಾಳಜಿಯಲ್ಲಿ ಇದ್ದಾರೆ .   ಅವರೆಲ್ಲರಿಗೂ ಹೃತ್ಪೂರ್ವಕ ಕೃತಜ್ಞತೆಗಳು.