ಮಲೆನಾಡ ಮಡಿಲಲ್ಲಿ ‘ನಿಗೂಢ’ ಹಕ್ಕಿಗಳ ಹಾರಾಟ: ಇದು ಆ ಸರ್ವೆಗೆ ಅಲ್ಲವಂತೆ, ಆದರೆ ಜಿಲ್ಲಾಡಳಿತಕ್ಕೆ ಗೊತ್ತೇ ಇಲ್ಲವಂತೆ

ಆಪ್ತ ನ್ಯೂಸ್ ಶಿರಸಿ:

ಕಳೆದ ನಾಲ್ಕೈದು ದಿನಗಳಿಂದ ಮಲೆನಾಡಿನ ಶಿರಸಿ ಮತ್ತು ಸಿದ್ದಾಪುರ ಭಾಗದ ಜನರಲ್ಲಿ ಒಂದು ರೀತಿಯ ಕುತೂಹಲ ಹಾಗೂ ಸಣ್ಣಮಟ್ಟದ ಆತಂಕ ಮನೆಮಾಡಿತ್ತು. ಮುಗಿಲಲ್ಲಿ ಅತಿ ಕೆಳಮಟ್ಟದಲ್ಲಿ ಹಾರಾಡುತ್ತಿದ್ದ ಆ ಬಿಳಿ ಬಣ್ಣದ ವಿಮಾನಗಳು ಯಾವುವು? ಎಲ್ಲಿಂದ ಬಂದವು? ಎಂಬ ಪ್ರಶ್ನೆಗಳಿಗೆ ಈಗ ಅಧಿಕೃತ ಉತ್ತರ ಸಿಕ್ಕಿದೆ. 

ಏನಿದು ನಿಗೂಢ ಹಾರಾಟ?

ಇದು ಯಾವುದೇ ಖಾಸಗಿ ಸಂಸ್ಥೆಯ ಸಾಹಸವಲ್ಲ; ಬದಲಾಗಿ ಭಾರತ ಸರ್ಕಾರದ ಗಣಿ ಸಚಿವಾಲಯದ ಅಡಿಯಲ್ಲಿ ಭಾರತೀಯ ಭೂವೈಜ್ಞಾನಿಕ ಸರ್ವೇಕ್ಷಣಾ ಸಂಸ್ಥೆ (GSI) ಹಮ್ಮಿಕೊಂಡಿರುವ ಬೃಹತ್ ‘ರಾಷ್ಟ್ರೀಯ ಭೂಭೌತ ಮ್ಯಾಪಿಂಗ್’ ಯೋಜನೆಯ ಒಂದು ಭಾಗ ಎಂದು ತಿಳಿದುಬಂದಿದೆ.

ಕಾರ್ಯಾಚರಣೆಯ ಪ್ರಮುಖ ಅಂಶಗಳು:

• ವಿಮಾನದ ಮಾದರಿ: ಭೂ ಸಮೀಕ್ಷೆಗಾಗಿ ವಿಶೇಷವಾಗಿ ವಿನ್ಯಾಸಗೊಳಿಸಲಾದ 'ಸೆಸ್ನಾ ಕ್ಯಾರವಾನ್ 208B' ಮಾದರಿಯ ಎರಡು ವಿಮಾನಗಳನ್ನು ಬಳಸಲಾಗುತ್ತಿದೆ.

  
  

• ಹಾರಾಟದ ಎತ್ತರ: ಅಚ್ಚರಿಯೆಂದರೆ, ಈ ವಿಮಾನಗಳು ಭೂಮಿಯಿಂದ ಕೇವಲ 80 ಮೀಟರ್ ಎತ್ತರದಲ್ಲಿ ಹಾರಾಟ ನಡೆಸುತ್ತಿವೆ. ಭೂಗರ್ಭದಲ್ಲಿರುವ ಅಂಶಗಳನ್ನು ನಿಖರವಾಗಿ ಪತ್ತೆಹಚ್ಚಲು ಈ ಕಡಿಮೆ ಎತ್ತರ ಅತ್ಯಗತ್ಯ.

• ಸಮಯ: ಪ್ರತಿದಿನ ಸೂರ್ಯೋದಯದಿಂದ ಸೂರ್ಯಾಸ್ತದವರೆಗೆ ಈ ಹಾರಾಟಕ್ಕೆ ಅನುಮತಿ ನೀಡಲಾಗಿದೆ.

• ಅವಧಿ: ಈ ಮಹತ್ವದ ವೈಮಾನಿಕ ಸಮೀಕ್ಷೆಯು ಜುಲೈ 31, 2026 ರವರೆಗೆ ಮುಂದುವರಿಯಲಿದೆ.

ಉದ್ದೇಶವೇನು?

ನಮ್ಮ ಭೂಮಿಯ ಅಡಿಯಲ್ಲಿ ಅಡಗಿರುವ ಅಗಾಧ ಸಂಪತ್ತನ್ನು ಹುಡುಕುವುದು ಈ ಯೋಜನೆಯ ಗುರಿ. 'ಮ್ಯಾಗ್ನೆಟಿಕ್ ಗ್ರೇಡಿಯೋಮೀಟರ್' ಮತ್ತು 'ರೇಡಿಯೋಮೀಟರ್' ಎಂಬ ಅತ್ಯಾಧುನಿಕ ಸಂವೇದಕಗಳನ್ನು ಬಳಸಿ ಭೂಮಿಯ ಕಾಂತಕ್ಷೇತ್ರದ ಬದಲಾವಣೆಗಳನ್ನು ಅಳೆಯಲಾಗುತ್ತದೆ. ಇದರಿಂದ:

1. ಭೂಗರ್ಭದಲ್ಲಿರುವ ಖನಿಜ ನಿಕ್ಷೇಪಗಳನ್ನು ವೈಜ್ಞಾನಿಕವಾಗಿ ಪತ್ತೆಹಚ್ಚಬಹುದು.

2. ಅಂತರ್ಜಲ ಸಂಪನ್ಮೂಲಗಳ ಬಗ್ಗೆ ನಿಖರ ಮಾಹಿತಿ ಪಡೆಯಬಹುದು.

3. ಭೂಗರ್ಭದ ಸಂರಚನೆಯ ಬಗ್ಗೆ ಡೇಟಾ ಸಂಗ್ರಹಿಸಲು ಸಹಕಾರಿಯಾಗುತ್ತದೆ.

ವ್ಯಾಪ್ತಿ ಎಲ್ಲೆಲ್ಲಿ?

ಈ ಸಮೀಕ್ಷೆಯು ಕೇವಲ ಉತ್ತರ ಕನ್ನಡಕ್ಕೆ ಸೀಮಿತವಾಗಿಲ್ಲ. ಕರ್ನಾಟಕದ ಉಡುಪಿ, ಚಿಕ್ಕಮಗಳೂರು, ಶಿವಮೊಗ್ಗ, ಹಾವೇರಿ, ಧಾರವಾಡ, ಗದಗ, ಬೆಳಗಾವಿ, ದಾವಣಗೆರೆ ಮತ್ತು ಹಾಸನ ಜಿಲ್ಲೆಗಳಲ್ಲೂ ಈ ಹಕ್ಕಿಗಳು ಹಾರಾಡಲಿವೆ. ಶಿವಮೊಗ್ಗ ಮತ್ತು ಮಂಗಳೂರು ವಿಮಾನ ನಿಲ್ದಾಣಗಳನ್ನು ಕಾರ್ಯಾಚರಣೆಯ ಪ್ರಮುಖ ಕೇಂದ್ರಗಳನ್ನಾಗಿ ಬಳಸಿಕೊಳ್ಳಲಾಗುತ್ತಿದೆ.

ಒಟ್ಟಾರೆಯಾಗಿ ಸುಮಾರು 8490 ಚದರ ಕಿಲೋಮೀಟರ್ ಪ್ರದೇಶದಲ್ಲಿ ಈ ಸಂಶೋಧನೆ ನಡೆಯುತ್ತಿದ್ದು, ನಾಗರಿಕ ವಿಮಾನಯಾನ ಮಹಾನಿರ್ದೇಶನಾಲಯ ಮತ್ತು ರಕ್ಷಣಾ ಇಲಾಖೆಯಿಂದ ಇದಕ್ಕೆ ಪೂರ್ಣ ಸಹಕಾರ ಹಾಗೂ ಅನುಮತಿ ದೊರೆತಿದೆ. ಹಾಗಾಗಿ, ಮುಗಿಲಲ್ಲಿ ವಿಮಾನ ಕಂಡರೆ ಗಾಬರಿ ಬೇಡ, ಅದು ನಮ್ಮ ನಾಡಿನ ಸಂಪತ್ತಿನ ಶೋಧದ ಹಾದಿ!

ಜಿಲ್ಲಾಡಳಿತಕ್ಕೆ ಗೊತ್ತೇ ಇಲ್ಲ

ಈ ವಿಮಾನ ಹಾರಾಟದ ಕುರಿತು ಆಪ್ತ ನ್ಯೂಸ್‌ ಜಿಲ್ಲಾಡಳಿತವನ್ನು ವಿಚಾರಿಸಿದಾಗ ತಮ್ಮ ಬಳಿಯಾವುದೇ ಮಾಹಿತಿ ಇಲ್ಲ ಎಂದು ಹೇಳಿದೆ. ಹಾಗಾದರೆ ಜಿಲ್ಲಾಡಳಿತದ ಅನುಮತಿ ಇಲ್ಲದೆಯೇ (ಸ್ಥಳೀಯ ಮಟ್ಟದಲ್ಲಿ) ಹೀಗೆ ವಿಮಾನಗಳ ಹಾರಾಟ ನಡೆಸಿ, ಖನಿಜಗಳನ್ನು ಪರೀಕ್ಷೆ ಮಾಡಬಹುದೇ ಎನ್ನುವ ಪ್ರಶ್ನೆಗಳೂ ಎದ್ದಿದೆ. ಈ ನಡುವೆ ಭಾನುವಾರವೂ ಕೂಡ ಸಿದ್ದಾಪುರ ತಾಲೂಕಿನ ಹಲವು ಕಡೆಗಳಲ್ಲಿ ವಿಮಾನ ಹಾರಾಟ ನಡೆಸಿದೆ. ಜಿಲ್ಲಾಡಳಿತವು ಈ ಕುರಿತಂತೆ ಪ್ರಕಟಣೆಯನ್ನು ನೀಡಿ, ನದಿ ತಿರುವಿನ ಸರ್ವೆ ಕುರಿತಂತೆ ಸಾರ್ವಜನಿಕರಲ್ಲಿ ಎದ್ದಿರುವ ಸಂದೇಹವನ್ನು ದೂರಮಾಡಬೇಕೆಂಬ ಆಗ್ರಹ ಬಲವಾಗಿದೆ.