ಅಘನಾಶಿನಿ ತೀರದಲ್ಲಿ ಅಪ್ಪೇಮಿಡಿ ಕಂಪು: ಪಾರಂಪರಿಕ ತಾಣವಾಗಿ ಕಣಿವೆ ಘೋಷಣೆಗೆ ಜೀವವೈವಿಧ್ಯ ಮಂಡಳಿ ಸಜ್ಜು

ಆಪ್ತ ನ್ಯೂಸ್ ನಾಗರಕೋಡಿ (ಬಾಳೂರು):
ಪಶ್ಚಿಮ ಘಟ್ಟದ ಸಿರಿಯಾದ ಅಘನಾಶಿನಿ ನದೀ ಪಾತ್ರದಲ್ಲಿ ಸಾಗಿದ ಮೂರು ದಿನಗಳ ಸಾಹಸಮಯ 'ಅಪ್ಪೇಮಿಡಿ ಪಾದಯಾತ್ರೆ'ಯು ಏಪ್ರಿಲ್ 1ರಂದು‌ ಸಿದ್ದಾಪುರ ತಾಲೂಕಿನ ಬಾಳೂರಿನ ಸಮೀಪದ ನಾಗರಕೋಡಿಯಲ್ಲಿ ಅದ್ಧೂರಿಯಾಗಿ ಸಮಾರೋಪಗೊಂಡಿತು. ಈ ಪಾದಯಾತ್ರೆಯ ಫಲಶ್ರುತಿಯಾಗಿ, ಅಘನಾಶಿನಿ ಅಪ್ಪೇಮಿಡಿ ವೃಕ್ಷ ಸಮೂಹ ಪ್ರದೇಶವನ್ನು 'ಪಾರಂಪರಿಕ ಜೀವವೈವಿಧ್ಯ ತಾಣ' ಎಂದು ಘೋಷಿಸುವಂತೆ ಕರ್ನಾಟಕ ಸರ್ಕಾರದ ಜೀವವೈವಿಧ್ಯ ಮಂಡಳಿಗೆ ಒತ್ತಾಯಿಸಲು ಪ್ರಯತ್ನ ನಡೆದಿದೆ.

ನದಿ ಹಾದಿಯಲ್ಲಿ ಮಾವಿನ ವೈವಿಧ್ಯದ ಶೋಧ

ಮಾರ್ಚ್ 30ರಂದು ಆರಂಭವಾದ ಈ ಪಾದಯಾತ್ರೆಯು ಅಘನಾಶಿನಿ ಕಣಿವೆಯ ದುರ್ಗಮ ಹಾದಿಗಳಲ್ಲಿ, ದಟ್ಟಾರಣ್ಯದ ಇಳಿಜಾರುಗಳಲ್ಲಿ ಸಾಗಿತು. ಈ ವೇಳೆ ಅಪ್ಪೇಮಿಡಿಯ ಅಪರೂಪದ ತಳಿಗಳ ಗಣತಿ ಮಾತ್ರವಲ್ಲದೆ, ನದಿಯ ಇಂದಿನ ಸ್ಥಿತಿಗತಿಗಳ ಬಗ್ಗೆಯೂ ಆಳವಾದ ಅಧ್ಯಯನ ನಡೆಸಲಾಯಿತು.

"ನದೀ ತೀರದ ಈ ಪಾದಯಾತ್ರೆಯು ಅಪ್ಪೇಮಿಡಿಯ ಅಸ್ತಿತ್ವ ಮತ್ತು ಅಘನಾಶಿನಿಯ ಪ್ರಚಲಿತ ವಿದ್ಯಮಾನಗಳ ಮೇಲೆ ಹೊಸ ಬೆಳಕು ಚೆಲ್ಲಿದೆ," ಎಂದು ಸಂಚಾಲಕ ಡಾ|| ಬಾಲಚಂದ್ರ ಸಾಯಿಮನೆ ತಿಳಿಸಿದರು.

ಪ್ರಮುಖ ನಿರ್ಧಾರಗಳು ಮತ್ತು ಶಿಫಾರಸುಗಳು

ಸಮಾರೋಪ ಸಮಾರಂಭದಲ್ಲಿ ಉಪಸ್ಥಿತರಿದ್ದ ಗಣ್ಯರು ಅಪ್ಪೇಮಿಡಿ ಸಂರಕ್ಷಣೆಗೆ ಸಂಬಂಧಿಸಿದಂತೆ ಹಲವು ಐತಿಹಾಸಿಕ ಭರವಸೆಗಳನ್ನು ನೀಡಿದರು:

• 54ನೇ ಸಾಂಬಾರು ವಸ್ತುವಾಗಿ ಅಪ್ಪೇಮಿಡಿ?: ರಾಷ್ಟ್ರೀಯ ಸಾಂಬಾರು ಮಂಡಳಿ ನಿರ್ದೇಶಕ ಪ್ರಸನ್ನ ತುಮರಿ ಅವರು ಮಾತನಾಡಿ, "ಸದ್ಯ 53 ಸಾಂಬಾರು ಹುಟ್ಟುವಳಿಗಳಿದ್ದು, ಅಪ್ಪೇಮಿಡಿಯನ್ನು 54ನೇ ಸಾಂಬಾರು ವೃಕ್ಷವಾಗಿ ಸೇರ್ಪಡೆಗೊಳಿಸಲು ಈ ಪಾದಯಾತ್ರೆ ಶಿಫಾರಸು ಮಾಡಿದೆ. ಈ ನಿಟ್ಟಿನಲ್ಲಿ ಕೇಂದ್ರ ಸರ್ಕಾರಕ್ಕೆ ಅಗತ್ಯ ಪ್ರಸ್ತಾವನೆ ಸಲ್ಲಿಸಲಾಗುವುದು," ಎಂದರು.

• ಪಾರಂಪರಿಕ ರಕ್ಷಣೆ: ಜೀವವೈವಿಧ್ಯ ಮಂಡಳಿ ಅಧ್ಯಕ್ಷ  ವಡ್ನಾಳ್ ಜಗದೀಶ್ ಅವರು ಅಪ್ಪೇಮಿಡಿ ಸಂರಕ್ಷಕರನ್ನು ಗೌರವಿಸಿ, ಈ ಪ್ರದೇಶಕ್ಕೆ ಶೀಘ್ರದಲ್ಲೇ ಪಾರಂಪರಿಕ ತಾಣದ ಮಾನ್ಯತೆ ನೀಡುವ ನಿರ್ಣಯವನ್ನು ಪ್ರಕಟಿಸಿದರು.

• ಗ್ರಾಮ ಕಾವಲು ಸಮಿತಿ: ಪಶ್ಚಿಮ ಘಟ್ಟ ಕಾರ್ಯಪಡೆ ಮಾಜಿ ಅಧ್ಯಕ್ಷ ಅನಂತ ಹೆಗಡೆ ಅಶೀಸರ ಮಾತನಾಡಿ, ಅಪ್ಪೇಮಿಡಿ ವೃಕ್ಷನಾಶ ತಡೆಯಲು ಅರಣ್ಯ ಇಲಾಖೆಯು ತಕ್ಷಣವೇ 'ಗ್ರಾಮ ಕಾವಲು ಸಮಿತಿ'ಗಳನ್ನು ರಚಿಸಬೇಕು ಎಂದು ಒತ್ತಾಯಿಸಿದರು.

ಜಿಐ ಟ್ಯಾಗ್ ಹಾಗೂ ಸಂರಕ್ಷಣೆಯ ಕಿಚ್ಚು

ತೋಟಗಾರಿಕಾ ಇಲಾಖೆಯ ಅಧಿಕಾರಿ ಅರುಣ್ ಅವರು ಶಿವಮೊಗ್ಗ ಮತ್ತು ಶಿರಸಿ ಭಾಗದ ಅಪ್ಪೇಮಿಡಿಗೆ ಈಗಾಗಲೇ ಭಾರತ ಸರ್ಕಾರದ 'ಜಿಯಾಲಾಜಿಕಲ್ ಇಂಡಿಕೇಟರ್' (GI Tag) ಮಾನ್ಯತೆ ಇರುವುದನ್ನು ಸ್ಮರಿಸಿದರು. ಜಾನ್ಮನೆ ವಲಯ ಅರಣ್ಯ ಅಧಿಕಾರಿ ಉಷಾ ಕಬ್ಬೇರ ಅವರು ಅಘನಾಶಿನಿಯ ವಿಶಿಷ್ಟ ತಳಿಗಳಿಗೆ ಕಾನೂನಾತ್ಮಕ ರಕ್ಷಣೆ ನೀಡುವ ಅಗತ್ಯತೆಯನ್ನು ಪ್ರತಿಪಾದಿಸಿದರು.

ಗಮನ ಸೆಳೆದ ಸನ್ಮಾನ:

ತಮ್ಮ ತೋಟಗಳಲ್ಲಿ ಅಪರೂಪದ ಅಪ್ಪೇಮಿಡಿ ತಳಿಗಳನ್ನು ಸಂರಕ್ಷಿಸಿ ಬೆಳೆಸುತ್ತಿರುವ ಶ್ರೀಪಾದ ಬಕ್ಕೇಮನೆ, ಭಾರ್ಗವ ಶೀಗೆಹಳ್ಳಿ ಹಾಗೂ ತ್ಯಾಗಲಿ ಸುಬ್ರಾಯ ಅವರನ್ನು ಈ ಸಂದರ್ಭದಲ್ಲಿ ಗೌರವಿಸಲಾಯಿತು.

ಭಾಗವಹಿಸುವಿಕೆ

ಈ ಐತಿಹಾಸಿಕ ಪಾದಯಾತ್ರೆಯಲ್ಲಿ ಬೆಂಗಳೂರು, ಶಿರಸಿ, ಸಿದ್ದಾಪುರ, ಕುಮಟಾ ಸೇರಿದಂತೆ ವಿವಿಧೆಡೆಯಿಂದ ಬಂದಿದ್ದ 46ಕ್ಕೂ ಹೆಚ್ಚು ಅಧ್ಯಯನಕಾರರು, ವಿಜ್ಞಾನಿಗಳು ಮತ್ತು ಪರಿಸರ ಪ್ರೇಮಿಗಳು ಪಾಲ್ಗೊಂಡಿದ್ದರು. ಕಾರ್ಯಕ್ರಮದಲ್ಲಿ ವಿಶ್ವೇಶ್ವರ ಭಟ್ ಕೋಟೆಮನೆ, ಕೆ. ವೆಂಕಟೇಶ, ಆನೆಗೊಳಿ ಸುಬ್ಬರಾವ್ ಮುಂತಾದ ಪ್ರಮುಖರು ಉಪಸ್ಥಿತರಿದ್ದರು.

ಅಘನಾಶಿನಿ ನದಿಯ ನೀರಿನಷ್ಟೇ ಪವಿತ್ರವಾದ ಅಪ್ಪೇಮಿಡಿಯ ಕಂಪು ಇನ್ನುಮುಂದೆ ಕೇವಲ ಉಪ್ಪಿನಕಾಯಿಗಷ್ಟೇ ಸೀಮಿತವಾಗದೆ, ಜಾಗತಿಕ ಮಟ್ಟದ ಸಾಂಬಾರು ಪದಾರ್ಥವಾಗಿ ಗುರುತಿಸಿಕೊಳ್ಳುವತ್ತ ಹೆಜ್ಜೆ ಇಟ್ಟಿರುವುದು ಪರಿಸರ ಪ್ರೇಮಿಗಳಲ್ಲಿ ಸಂತಸ ತಂದಿದೆ.