ಬೇಡ್ತಿ-ಅಘನಾಶಿನಿ ಯೋಜನೆ ಕೈಬಿಡುವವರೆಗೂ ಹೋರಾಟ ನಿರಂತರ: ಸ್ವರ್ಣವಲ್ಲಿ ಸ್ವಾಮೀಜಿ

ಆಪ್ತ ನ್ಯೂಸ್ ಶಿರಸಿ:

ಮಲೆನಾಡಿನ ಜೀವನಾಡಿಗಳಾದ ಬೇಡ್ತಿ ಮತ್ತು ಅಘನಾಶಿನಿ ನದಿಗಳ ತಿರುವು ಯೋಜನೆಗೆ ಕರಾವಳಿ ಮತ್ತು ಮಲೆನಾಡು ಭಾಗದಲ್ಲಿ ತೀವ್ರ ವಿರೋಧ ವ್ಯಕ್ತವಾಗುತ್ತಿದೆ. ಈ ವಿವಾದಿತ ಯೋಜನೆಯ ಪ್ರಸ್ತಾವನೆಯನ್ನು ಸರ್ಕಾರ ಸಂಪೂರ್ಣವಾಗಿ ಕೈಬಿಡುವವರೆಗೂ ನಮ್ಮ ಹೋರಾಟ ವಿಶ್ರಮಿಸುವುದಿಲ್ಲ ಎಂದು ಶ್ರೀ ಸ್ವರ್ಣವಲ್ಲೀ ಸಂಸ್ಥಾನದ  ಗಂಗಾಧರೇಂದ್ರ ಸರಸ್ವತೀ ಮಹಾಸ್ವಾಮಿಗಳು ಸರ್ಕಾರಕ್ಕೆ ಎಚ್ಚರಿಕೆ ನೀಡಿದ್ದಾರೆ.

ದಿನಾಂಕ ೨೦-೦೪-೨೦೨೬ ರಂದು ಶಿರಸಿಯ ಕದಂಬ ಮಾರ್ಕೆಂಟಿಗ ಸಭಾಭವನದಲ್ಲಿ ನಡೆದ ಬೇಡ್ತಿ-ಅಘನಾಶಿನಿ ಸಮಿತಿಯ ಮಹತ್ವದ ಸಭೆಯ ದಿವ್ಯ ಸಾನ್ನಿಧ್ಯ ವಹಿಸಿ ಶ್ರೀಗಳು ಮಾತನಾಡುತ್ತಿದ್ದರು.

ತಜ್ಞರ ವರದಿಯಲ್ಲಿ ಬಯಲಾಯ್ತು ಯೋಜನೆಯ ಕರಾಳ ಮುಖ!

ಈ ಸಭೆಯ ಪ್ರಮುಖ ಆಕರ್ಷಣೆಯೆಂದರೆ ಜಲಸಂಪನ್ಮೂಲ ತಜ್ಞ ವಿ.ಆರ್. ಹೆಗಡೆ ಶೀಗೇಮನೆ ಅವರು ಸಿದ್ಧಪಡಿಸಿದ ಬೇಡ್ತಿ ಕಣಿವೆಯ ನೈಜ ಸ್ಥಿತಿಗತಿಯ ವರದಿ. ಈ ವರದಿಯನ್ನು ಬಿಡುಗಡೆ ಮಾಡಿದ ಶ್ರೀಗಳು, ನದಿ ಕಣಿವೆಗಳ ಇಂದಿನ ವಾಸ್ತವ ಪರಿಸ್ಥಿತಿ ಮತ್ತು ನೀರಿನ ಲಭ್ಯತೆಯ ಬಗ್ಗೆ ಜನರಲ್ಲಿ ಜಾಗೃತಿ ಮೂಡಿಸುವ ಅಗತ್ಯವಿದೆ ಎಂದರು.

ವರದಿ ಮಂಡಿಸಿದ ವಿ.ಆರ್. ಹೆಗಡೆ ಅವರು ಸರ್ಕಾರದ ವಿರುದ್ಧ ಹರಿಹಾಯ್ದರು:

"NWDA ಸಿದ್ಧಪಡಿಸಿರುವ ಬೇಡ್ತಿ ಫೀಸಿಬಿಲಿಟಿ ವರದಿಯು ೨೦ನೇ ಶತಮಾನದ ಹಳೆಯ ಅಂಕಿಅಂಶಗಳನ್ನು ಆಧರಿಸಿದೆ. ಯಲ್ಲಾಪುರ ಮತ್ತು ಶಿರಸಿ ತಾಲೂಕುಗಳ ಇಂದಿನ ನೀರಿನ ಬಳಕೆ, ಕೃಷಿ ವಿಸ್ತರಣೆ, ಹೆಚ್ಚುತ್ತಿರುವ ಜನಸಂಖ್ಯೆ ಮತ್ತು ಪರಿಸರ ಹರಿವನ್ನು (Environmental Flow) ಪರಿಗಣಿಸದೆ ಈ ವರದಿ ತಯಾರಿಸಲಾಗಿದೆ. ಇದು ಅವೈಜ್ಞಾನಿಕ ಮತ್ತು ವಾಸ್ತವಕ್ಕೆ ದೂರವಾಗಿದೆ."

ಹೋರಾಟದ ಮುಂದಿನ ಹಾದಿ: ಜೂನ್ ೫ ರಿಂದ ವೃಕ್ಷಾರೋಪಣ

ಈ ಹೋರಾಟ ಕೇವಲ ಪ್ರತಿಭಟನೆಗೆ ಸೀಮಿತವಾಗದೆ, ಪರಿಸರ ಸಂರಕ್ಷಣೆಯ ಅಭಿಯಾನವಾಗಿಯೂ ಬದಲಾಗುತ್ತಿದೆ. ಜೂನ್ ೫ ರಂದು ವಿಶ್ವ ಪರಿಸರ ದಿನದ ಅಂಗವಾಗಿ ಬೃಹತ್ ವೃಕ್ಷಾರೋಪಣ ಅಭಿಯಾನವನ್ನು ನಡೆಸಲು ಶ್ರೀಗಳು ಕರೆ ನೀಡಿದರು. ಸಮಿತಿಯ ಅಧ್ಯಕ್ಷರಾದ ಅನಂತ ಹೆಗಡೆ ಅಶೀಸರ ಮಾತನಾಡಿ, ಈಗಾಗಲೇ ದಕ್ಷಿಣ ಕನ್ನಡ, ಕುಮಾರಧಾರಾ, ಬೆಂಗಳೂರು ಸೇರಿದಂತೆ ವಿವಿಧೆಡೆ ಅಭಿಯಾನ ಯಶಸ್ವಿಯಾಗಿದೆ. ಈಗ ಬಯಲು ಸೀಮೆಯ ಜನರಿಗೂ 'ಸಹ್ಯಾದ್ರಿ ಉಳಿಸಿ' ಸಂದೇಶವನ್ನು ತಲುಪಿಸಲಾಗುತ್ತಿದೆ ಎಂದರು.

ಅಘನಾಶಿನಿ ಅಪ್ಪೇಮಿಡಿಗೆ ಸಿಗಲಿದೆಯೇ ವಿಶೇಷ ಮಾನ್ಯತೆ?

ಸಭೆಯಲ್ಲಿ ಅಘನಾಶಿನಿ ಕಣಿವೆಯ ವಿಶಿಷ್ಟ ಬೆಳೆಯಾದ 'ಅಪ್ಪೇಮಿಡಿ' ಸಂರಕ್ಷಣೆಯ ಕುರಿತು ಗಂಭೀರ ಚರ್ಚೆ ನಡೆಯಿತು.

• ಸಾಕ್ಷ್ಯಚಿತ್ರ ಪ್ರದರ್ಶನ: ಸಾಕ್ಷ್ಯಚಿತ್ರ ನಿರ್ದೇಶಕ ಅಶ್ವಿನಿ ಕುಮಾರ ಅವರು ಸಿದ್ಧಪಡಿಸಿದ ಪಾದಯಾತ್ರೆಯ ಕಿರುಚಿತ್ರವು ಸಹ್ಯಾದ್ರಿಯ ಜೀವವೈವಿಧ್ಯವನ್ನು ಅನಾವರಣಗೊಳಿಸಿತು.

• ಸಂರಕ್ಷಿತ ಪ್ರದೇಶ: ವನ್ಯಜೀವಿ ತಜ್ಞ ಡಾ. ಬಾಲಚಂದ್ರ ಸಾಯಿಮನೆ ಅವರು 'ಅಘನಾಶಿನಿ ಅಪ್ಪೇಮಿಡಿ ಸಂರಕ್ಷಿತ ಪ್ರದೇಶ' ಘೋಷಿಸುವ ಕುರಿತು ಪ್ರಸ್ತಾವನೆಯನ್ನು ಮಂಡಿಸಿದರು.

ಸಭೆಯ ಪ್ರಮುಖ ಮುಖ್ಯಾಂಶಗಳು:

• ನಿರ್ಣಯ: ಯೋಜನೆಯನ್ನು ಕೈಬಿಡುವವರೆಗೂ ಸರಣಿ ಹೋರಾಟಕ್ಕೆ ನಿರ್ಧಾರ.

• ಜಾಗೃತಿ: ಕಾನೂನು ತಜ್ಞರ ಸಲಹೆಯಂತೆ ನ್ಯಾಯಾಲಯದ ಹೋರಾಟಕ್ಕೂ ಸಿದ್ಧತೆ.

• ಗಣ್ಯರ ಉಪಸ್ಥಿತಿ: ಶ್ರೀ ವಿ.ಎನ್. ಹೆಗಡೆ ಬೊಮ್ಮನಳ್ಳಿ ಪ್ರಸ್ತಾವಿಕವಾಗಿ ಮಾತನಾಡಿದರೆ, ವಿಶ್ವೇಶ್ವರ ಭಟ್ ಕೋಟೆಮನೆ ಸ್ವಾಗತಿಸಿದರು. ಕದಂಬ ಅಧ್ಯಕ್ಷ ಶಂಭುಲಿಂಗ ಹೆಗಡೆ ಗೌರವ ಸಮರ್ಪಣೆ ಮಾಡಿದರು. ದೋಂಡು ಪಾಟೀಲ ಅವರು ಹೋರಾಟದ ನಿರ್ಣಯಗಳನ್ನು ಓದಿದರು.

ಈ ಸಭೆಯಲ್ಲಿ ಜಿಲ್ಲೆಯ ವಿವಿಧ ಭಾಗಗಳಿಂದ ಆಗಮಿಸಿದ್ದ ಪರಿಸರ ಪ್ರೇಮಿಗಳು, ರೈತ ಮುಖಂಡರು ಮತ್ತು ನೂರಾರು ಕಾರ್ಯಕರ್ತರು ಪಾಲ್ಗೊಂಡು ಬೇಡ್ತಿ-ಅಘನಾಶಿನಿ ನದಿಗಳನ್ನು ಉಳಿಸಿಕೊಳ್ಳಲು ಪಣ ತೊಟ್ಟರು.